৪৫. পৱাৰণানিদ্দেসৱণ্ণনা

৪৩৩. ‘‘অনুজানামি, ভিক্খৱে, পঞ্চন্নং সঙ্ঘে পৱাৰেতু’’ন্তি (মহাৱ. ২১৫) ৱুত্তত্তা ‘‘সেসা সঙ্ঘপ্পৱাৰণা’’তি (মহাৱ. ২১৫ আদযো) ৱুত্তা.

৪৩৪. অজ্জ পৱাৰণাতি এত্থ (মহাৱ. ২১৫ আদযো) পন চাতুদ্দসিকায পৱাৰণায ‘‘অজ্জ পৱাৰণা চাতুদ্দসী’’তি পুব্বকিচ্চং কাতব্বং, পন্নৰসিযং ‘‘অজ্জ পৱাৰণা পন্নৰসী’’তি.

৪৩৭. থেৰেসু উক্কুটিকং নিসজ্জ পৱাৰেন্তেসু সযং পন নৱো যাৱ পৱাৰেতি, তাৱ উক্কুটিকোৱ অচ্ছতূতি অত্থো. ‘‘ন ভিক্খৱে থেৰেসু উক্কুটিকং নিসিন্নেসু পৱাৰযমানেসু আসনেসু অচ্ছিতব্বং. যো অচ্ছেয্য, আপত্তি দুক্কটস্স. অনুজানামি, ভিক্খৱে, তদমন্তৰা উক্কুটিকং নিসীদিতুং, যাৱ পৱাৰেতি, পৱাৰেত্ৱা আসনে নিসীদিতু’’ন্তি (মহাৱ. ২১১) হি ৱুত্তং.

৪৪০-২. এৱং তেৱাচিকপ্পৱাৰণং দস্সেত্ৱা ইদানি দ্ৱেৱাচিকএকৱাচিকসমানৱস্সিকপ্পৱাৰণাসু কত্তব্বং দস্সেতুং ‘‘দানেনা’’তিআদিমাহ. তত্থ দানেনাতি দানেন ৱা. ধম্মসাকচ্ছাতি ইমিনা ধম্মকথাসুত্তসঙ্গাযনাৱিনযৱিনিচ্ছযাদযো গহিতা. দানেন ৱা ধম্মসাকচ্ছায ৱা কলহেন ৱা ৰত্তিযা খেপিতভাৱতো তেৱাচিকায ওকাসে অসতি দসৱিধে ৱা অন্তৰাযে অনুৰূপতো উত্তিং ঠপেত্ৱা পৱাৰেয্যাতি সম্বন্ধো.

ইদানি যথানুৰূপতো ঞত্তি ঠপিতা, তং দস্সেতুং ‘‘সুণাতু মে’’তিআদিমাহ. যথাঠপিতঞত্তিযাতি এত্থ সব্বসঙ্গাহিকাচেঞত্তিঠপিতা, তেৱাচিকদ্ৱেৱাচিকএকৱাচিকানং ৱসেন পৱাৰেতব্বং, সমানৱস্সিকপ্পৱাৰণাৱ একা ন ৱট্টতি. সচে ‘‘সঙ্ঘো তেৱাচিকং পৱাৰেয্যা’’তি ঠপিতা, তেৱাচিকা এৱ ৱট্টতি, দ্ৱেৱাচিকাদযো ন ৱট্টন্তি. ‘‘দ্ৱেৱাচিকং পৱাৰেয্যা’’তি ৱুত্তে দ্ৱেৱাচিকঞ্চ তেৱাচিকঞ্চ ৱট্টতি, একৱাচিকসমানৱস্সিকা ন ৱট্টন্তি. ‘‘একৱাচিকং পৱাৰেয্যা’’তি ৱুত্তে পন সমানৱস্সিকং ঠপেত্ৱা সেসা ৱট্টন্তি. ‘‘সমানৱস্সিক’’ন্তি পন ৱুত্তে সব্বং ৱট্টতীতি. আদিকে চেত্থ আহৰেতি এত্থ পৱাৰণাযপি পুব্বে উপোসথে ৱুত্তে ‘‘যদি সমা আগচ্ছেয্যু’’ন্তিআদিকে ৱাৰে আহৰেতি অত্থো.

৪৪৩. ইদানি ৱত্তব্বং সন্ধায ‘‘এৱ’’ন্তি ৱুত্তং. তিৱগ্গো চ চতুৱগ্গো চ তিচতুৱগ্গো.

৪৫০. ‘‘ন ভিক্খৱে সাপত্তিকেন পৱাৰেতব্বং. যো পৱাৰেয্য, আপত্তি দুক্কটস্সা’’তি (মহাৱ. ২৩৫) ৱুত্তত্তা সাপত্তিকেনপি ৱেমতিকেনপি পৱাৰিযমানে আপত্তিং সৰন্তেনপি উপোসথে ৱুত্তনযেন পটিপজ্জিতব্বং. ‘‘ৱগ্গে সমগ্গে ৱগ্গোতি-সঞ্ঞিনো ৱিমতিস্স ৱা’’তিআদিগাথাতো পট্ঠায যাৱ ‘‘অন্তৰাযং ৱ সঙ্ঘং ৱা-ধিট্ঠাতুং সীমমেৱ ৱা’’তি অৱসানগাথা, তাৱ সেসা উপোসথে ৱুত্তা গাথাযোতি অধিপ্পেতা.

৪৫১. পৱাৰিতে চাতি (মহাৱ. ২১৩ আদযো) পঠমপৱাৰণায সঙ্ঘম্হি পৱাৰিতেতি অধিপ্পাযো. এত্থ অৱুত্থোতি পচ্ছিমিকায উপগতো অপৰিনিট্ঠিতত্তা ‘‘অৱুত্থো’’তি ৱুচ্চতি.

৪৫২. চাতুমাসিনীতি কত্তিকপুণ্ণমী. এত্থ ৱুত্থৱস্সা নাম পচ্ছিমিকায উপগতা. পৱাৰণাৱিনিচ্ছযো.

পৱাৰণানিদ্দেসৱণ্ণনা নিট্ঠিতা.