৪৩. ছন্দদাননিদ্দেসৱণ্ণনা

৩৯৯. কম্মপ্পত্তে সঙ্ঘে সমাগতেতি সম্বন্ধো. এতেন সঙ্ঘে অসমাগতে ছন্দদানং ন ৰুহতীতি দীপিতং হোতীতি ৱদন্তি. এত্থাযং ৱিচাৰণা – পঞ্চভিক্খুকে ৱিহাৰে একস্স ছন্দপাৰিসুদ্ধিং আহৰিত্ৱা সেসানং উপোসথাদিকৰণং অনুঞ্ঞাতং পাড়িযং (পৰি. ৪৯৬-৪৯৭) অট্ঠকথাযঞ্চ (পৰি. অট্ঠ. ৪৮৭-৪৮৮). তেসু একো ছন্দদাযকো, একো ছন্দহাৰকো, তে মুঞ্চিত্ৱা ন এত্থ সন্নিপতিতো সঙ্ঘো তিণ্ণং সমূহভাৱতো, তস্মা অসমাগতেপি দাতুং ৱট্টতি. আৰোচেন্তেন পন সমাগতে এৱ আৰোচেতব্বং. ইধাপি ‘‘হৰেয্যা’’তি ৱুত্তং, ন ‘‘দেসেয্যা’’তি. তত্থ ছন্দহাৰকেন সদ্ধিং কম্মপ্পত্তানং সন্নিপাতো ৱেদিতব্বো.

৪০০. ইদানি ছন্দদানৱিধিং দস্সেতুং ‘‘একং ভিক্খু’’ন্তিআদিমাহ (কঙ্খা. অট্ঠ. নিদানৱণ্ণনা).

৪০১. (ক) ‘‘ছন্দং দম্মী’’তি এত্তকমেৱ অলং, ‘‘হৰ, আৰোচেহী’’তি ইমেহি কিংপযোজনন্তি চে? ৱুচ্চতে – ‘‘অনুজানামি, ভিক্খৱে, তদহুপোসথে পাৰিসুদ্ধিং দেন্তেন ছন্দম্পিদাতুং, সন্তি সঙ্ঘস্স কৰণীয’’ন্তি (মহাৱ. ১৬৫) ৱুত্তত্তা ভগৱতো আণং কৰোন্তেন ‘‘ছন্দং দম্মী’’তি ৱুত্তং. ‘‘ছন্দহাৰকো চে, ভিক্খৱে, দিন্নে ছন্দে অন্তৰামগ্গে পক্কমতি, অনাহটোৱ হোতি ছন্দো’’তি (মহাৱ. ১৬৫) ৱুত্তত্তা ছন্দহাৰকস্স অঞ্ঞস্স অপক্কমনত্থায পাৰিসুদ্ধিং দেন্তেন ‘‘ইদং কৰোহি এৱা’’তি আণাপেন্তেন ‘‘ছন্দং মে হৰা’’তি ৱুত্তং. ‘‘ছন্দহাৰকো চে, ভিক্খৱে, দিন্নে ছন্দে সঙ্ঘপ্পত্তো সঞ্চিচ্চ নাৰোচেতি, আহটো হোতি ছন্দো, ছন্দহাৰকস্স আপত্তি দুক্কটস্সা’’তি (মহাৱ. ১৬৫) ৱুত্তত্তা ‘‘যদিত্ৱং সঞ্চিচ্চ নাৰোচেস্সসি, আপত্তিং আপজ্জিস্সসি, আৰোচেহি এৱা’’তি তস্স আচিক্খন্তো ‘‘আৰোচেহী’’তি আহাতি এৱমেত্থ ইমেসং পদানং সপ্পযোজনতা ৱেদিতব্বা. এৱং পাৰিসুদ্ধিদানেপীতি.

৪০২. সেসকম্মন্তি যদি সঙ্ঘো উপোসথগ্গে অঞ্ঞং অপলোকনাদিকম্মং কৰোতি, তং কম্মং ৱিবাধতি, ৱিকোপেতীতি অত্থো.

৪০৩. দ্ৱযন্তি উপোসথঞ্চ সেসকম্মঞ্চাতি অত্থো. নত্তনোতি অত্তনো উপোসথং ন সম্পাদেতি.

৪০৫. ‘‘একংসং উত্তৰাসঙ্গং কৰিত্ৱা উক্কুটিকং নিসীদিত্ৱা’’তিআদিকং (মহাৱ. ২১৩) সব্বূপচাৰং কত্ৱানাতি অত্থো.

৪০৬. ‘‘ইত্থন্নামেন পৱাৰণা দিন্না’’তি আৰোচেত্ৱা.

৪০৮. পটিজানেয্য নাহটাতি (মহাৱ. ১৬৪-১৬৫, ২১৩) পাঠে ন আহটাতি নাহটা, আহটা ন হোতীতি অত্থো. তথা হেয্যাতি ৱিব্ভমনাদীনি কৰেয্যাতি অত্থো.

৪০৯. সুত্তো ৱা নাৰোচযেয্য, আহটা হোতীতি সম্বন্ধো. অনাপত্তিৱাতি অনাপত্তি এৱ. ছন্দদানৱিনিচ্ছযো.

ছন্দদাননিদ্দেসৱণ্ণনা নিট্ঠিতা.