৩৯. ৱস্সূপনাযিকনিদ্দেসৱণ্ণনা

৩০৯-৩১০. ইদানি ৱস্সূপগমনং দস্সেতুং ‘‘পুৰিমিকা’’তিআদিমাহ. তত্থ পুৰিমিকা পচ্ছিমিকা (মহাৱ. ১৮৪; মহাৱ. অট্ঠ. ১৮৫) চেতি দ্ৱে ৱস্সূপনাযিকাতি অত্থো. আলযপৰিগ্গাহো ৱা ৱচীভেদো ৱা ৱস্সূপনাযিকাতি পাঠসেসো. ইদানি ৱত্তব্বং সন্ধায ‘‘এদিসো’’তি ৱুত্তং. ‘‘ইধ ৱস্সং ৱসিস্সামী’’তি চিত্তুপ্পাদেত্থ আলযো (মহাৱ. অট্ঠ. ২০৩). আলযপৰিগ্গাহো পন ৱজে ৱা সত্থে ৱা নাৱায ৱা ৱস্সং উপগন্তুকামস্স তত্থ সেনাসনং অলভন্তস্স লব্ভতি, সত্থাদীসু পন ৱস্সং উপগন্তুং ন ৱট্টতীতি কত্ৱা. যদি সত্থাদীসু কৱাটবন্ধং সেনাসনং লব্ভতি, তত্থ উপগন্তব্বং. উপগচ্ছন্তেন চ ‘‘ইধ ৱস্সং উপেমী’’তি তিক্খত্তুং ৱত্তব্বং. ৱিহাৰে পন ৱচীভেদো ৱা কাতব্বো. সচে ‘‘ইধ ৱস্সং ৱসিস্সামী’’তি আলযো অত্থি, অসতিযা পন ৱস্সং ন উপেতি, ছিন্নৱস্সো ন হোতি, পৱাৰেতুঞ্চ লভতি এৱ.

৩১১. নোপেতুকামো আৱাসং, তদহূতিক্কমেয্য ৱাতি পাঠে (মহাৱ. ১৮৬) অতিক্কমন্তস্স আৱাসং তদহু ৱস্সূপনাযিকাতিপি অত্থো. আৱাসং অতিক্কমেয্য ৱাতি সম্বন্ধো. জানং ৱানুপগচ্ছতোতি এত্থ ৱিহাৰে নিসীদিত্ৱাপি অনুপগচ্ছতো দুক্কটাপত্তি হোতীতি অধিপ্পাযো.

৩১২. ছিন্নৱস্সো (ৱজিৰ. টী. মহাৱগ্গ ২০৮) ৱা কেনচি অন্তৰাযেন পঠমং অনুপগতো (মহাৱ. ১৮৫-১৮৬) ৱা দুতিযং উপগচ্ছেয্যাতি সম্বন্ধো. তেমাসন্তি পুৰিমং ৱা তেমাসং পচ্ছিমং ৱা তেমাসং. ‘‘ন ভিক্খৱে ৱস্সং উপগন্ত্ৱা পুৰিমং ৱা পচ্ছিমং ৱা তেমাসং অৱসিত্ৱা চাৰিকা পক্কমিতব্বা. যো পক্কমেয্য, আপত্তি দুক্কটস্সা’’তি (মহাৱ. ১৮৫) হি ৱুত্তং.

৩১৩-৫. ‘‘অনুজানামি, ভিক্খৱে, সত্তন্নং সত্তাহকৰণীযেন অপ্পহিতেপি গন্তুং, পগেৱ পহিতে, ‘ভিক্খুস্স ভিক্খুনিযা সিক্খমানায সামণেৰস্স সামণেৰিযা মাতুযা চ পিতুস্স চ, গিলানভত্তং ৱা পৰিযেসিস্সামি, গিলানুপট্ঠাকভত্তং ৱা পৰিযেসিস্সামি, গিলানভেসজ্জং ৱা পৰিযেসিস্সামি, পুচ্ছিস্সামি ৱা উপট্ঠহিস্সামি ৱা’তি সত্তাহং সন্নিৱত্তো কাতব্বো’’তি (মহাৱ. ১৯৮) ৱুত্তত্তা ‘‘মাতাপিতূনমত্থায…পে… উপট্ঠিস্স’’ন্তি ৱুত্তং. তত্থাযং সঙ্খেপো – ‘‘মাতাদীনং গিলানভত্তং ৱা তদুপট্ঠাকভত্তং ৱা গিলানানং ওসধং ৱা এসিস্সং পৰিযেসিস্স’’ন্তি ৱা ‘‘তে গিলানে গন্ত্ৱা পুচ্ছিস্সামী’’তি ৱা ‘‘উপট্ঠিস্স’’ন্তি ৱা পহিতেপি অপ্পহিতেপি সত্তাহকিচ্চেন গন্তুং লভতি.

ইদানি সহধম্মিকে এৱ সন্ধায ‘‘অনভিৰত’’ন্তিআদি ৱুত্তং. ‘‘ৱিসভাগৰূপং দিস্ৱা অনভিৰতি, ততো ৱূপকাসিস্সং, তং গহেত্ৱা অঞ্ঞত্থ গমিস্স’’ন্তি অধিপ্পাযেন গন্তুম্পি লব্ভতীতি অত্থো. কুক্কুচ্চং ৱিনোদনঞ্চ দিট্ঠিং ৱিৱেচনঞ্চ অহং ৱা কৰেয্যং অঞ্ঞেহি ৱা কাৰেয্যন্তি সম্বন্ধো. পৰিৱাসমানত্তআদীহি ৱুট্ঠানং ৱা গৰুকা. আদি-সদ্দেন সচে সঙ্ঘেন কম্মং কতং হোতি, তস্স পটিপ্পস্সদ্ধিযা অনুস্সাৱনকৰণাদীসু উস্সুক্কং কৰেয্যন্তি গন্তুং লব্ভতীতি অত্থো. সত্তাহকিচ্চেনাতি সত্তাহকৰণীযেন.

৩১৬. ধম্মসৱনত্থং নিমন্তিতো এৱং ৱজেতি অত্থো. গৰূ নাম আচৰিযুপজ্ঝাযা, তেহি ভণ্ডধোৱনকিচ্চেন পহিতস্স গন্তুং ৱট্টতীতি অত্থো.

৩১৭. ন ভণ্ডধোৱন…পে… দস্সনেতি এত্থ (মহাৱ. অট্ঠ. ১৯৯) এতেসুপি ন ৱজেতি সম্বন্ধো. লব্ভন্তি এত্থ ‘‘অজ্জেৱ আগমিস্স’’ন্তি অদূৰগো যদি ন পাপুণেয্য, লব্ভন্তি সম্বন্ধো. কিং ৱুত্তং হোতি? ‘‘অজ্জেৱ আগমিস্সামী’’তি সামন্তৱিহাৰং গন্ত্ৱা পুন আগচ্ছন্তস্স অন্তৰামগ্গে সচে অৰুণুট্ঠানং হোতি, ৱস্সচ্ছেদোপি ন হোতি, ৰত্তিচ্ছেদেন দুক্কটম্পি নাপজ্জতীতি ৱুত্তং হোতি.

৩১৮. সেসঞাতিহীতি ভাতুভগিনীআদীহি. ভিক্খুনিস্সিতকেন চ পহিতেতি সম্বন্ধো. নিদ্দিসিত্ৱাতি ‘‘আগচ্ছন্তু ভদন্তা, ইচ্ছামি দানঞ্চ দাতুং ধম্মঞ্চ সোতুং ভিক্খুঞ্চ পস্সিতু’’ন্তিআদিনা যং কিঞ্চি নিদ্দিসিত্ৱাৱ পেসিতে গন্তুং ৱট্টতি. কেৱলং ‘‘আগচ্ছন্তু ভিক্খূ, ইচ্ছামি ভিক্খূনং আগমন’’ন্তি এৱং অনিদ্দিসিত্ৱা ৱুত্তে গন্তুং ন লব্ভতীতি অত্থো.

৩১৯. অচ্ছৰাযে সতত্তনোতি দসৱিধেসু অন্তৰাযেসু একস্মিম্পি অন্তৰাযে অত্তনো সতীতি অত্থো. সঙ্ঘসামগ্গিযা ৱা ৱস্সচ্ছেদে অনাপত্তীতি অত্থো. ৱুত্তঞ্হেতং ‘‘ইধ পন, ভিক্খৱে, ৱস্সূপগতো ভিক্খু পস্সতি সম্বহুলে ভিক্খূ সঙ্ঘভেদায পৰক্কমন্তে. তত্ৰ চে ভিক্খুনো এৱং হোতি, ‘গৰুকো খো সঙ্ঘভেদো ৱুত্তো ভগৱতা. মা মযি সম্মুখীভূতে সঙ্ঘো ভিজ্জী’তি পক্কমিতব্বং, অনাপত্তি ৱস্সচ্ছেদস্সা’’তি (মহাৱ. ২০২). এৱং ছিন্নৱস্সো নো পৱাৰযেতি অত্থো.

৩২০. ৰুক্খস্স সুসিৰেতি এত্থ (মহাৱ. ২০৪; মহাৱ. অট্ঠ. ২০৩) পন সুদ্ধে ৰুক্খসুসিৰে এৱ ন ৱট্টতি, মহন্তস্স পন সুসিৰস্স অন্তো পদৰচ্ছদনং কুটিকং কত্ৱা পৱিসনদ্ৱাৰং যোজেত্ৱা উপগন্তুং ৱট্টতি. ৰুক্খস্স ৱিটপেতি এত্থাপি সুদ্ধৱিটপমত্তে ন ৱট্টতি, মহাৱিটপে পন অট্টকং বন্ধিত্ৱা ৱুত্তনযেন কুটিকং কত্ৱা উপগন্তুং ৱট্টতি. ছৱকুটি নাম পাসাণকুটিকন্তি ৱদন্তি. তীসু পস্সেসু পাসাণে উস্সাপেত্ৱা উপৰি পাসাণেন পটিচ্ছন্না.

৩২১. নাৱাদীসু পন উপগতো পৱাৰেতুঞ্চ লব্ভতীতি সম্বন্ধো. ৱস্সূপনাযিকৱিনিচ্ছযো.

ৱস্সূপনাযিকনিদ্দেসৱণ্ণনা নিট্ঠিতা.