৩৮. কুলদূসননিদ্দেসৱণ্ণনা

২৯৭. ‘‘কুলানি দূসেতি পুপ্ফেন ৱা ফলেন ৱা চুণ্ণেন ৱা মত্তিকায ৱা দন্তকট্ঠেন ৱা ৱেড়ুযা ৱা ৱেজ্জিকায ৱা জঙ্ঘপেসনিযেন ৱা’’তি (পাৰা. ৪৩৭) ৱুত্তত্তা তানি অট্ঠ ৱত্থূনি দস্সেতুং ‘‘পুপ্ফ’’ন্তিআদিমাহ. ইমায মিচ্ছাপটিপত্তিযা কুলানং অঞ্ঞেসু সীলৱন্তেসু পসাদং দূসেতি ৱিনাসেতীতি কুলদূসনং দুক্কটং আপজ্জতি. তং পন অত্তনো সন্তকে চ পৰসন্তকে চ ৱেদিতব্বং.

২৯৮. ইদানি ইমেসু ৱত্থূসু ন কেৱলং কুলদূসনদুক্কটমেৱ আপজ্জতি, থুল্লচ্চযাদীনিপি আপজ্জতীতি দস্সেতুং ‘‘থুল্লচ্চয’’ন্তিআদিমাহ. সঙ্ঘিকং গৰুভণ্ডং ইস্সৰেন দেন্তস্স থুল্লচ্চযন্তি সম্বন্ধো. সেনাসনত্থায নিযমিতং পন পুপ্ফাদি গৰুভণ্ডং হোতি. সঙ্ঘস্স ৱা অঞ্ঞস্স ৱা সন্তকং থেয্যচিত্তেন দেন্তস্স দুক্কটাদীনি হোন্তীতি পাঠসেসো, তস্স ভণ্ডস্স অগ্ঘৱসেন দুক্কটথুল্লচ্চযপাৰাজিকানি হোন্তীতি অত্থো.

২৯৯-৩০০. সব্বথাতি (পাৰা. অট্ঠ. ২.৪৩১) কপ্পিযৱোহাৰঅকপ্পিযৱোহাৰপৰিযাযওভাসনিমিত্তকম্মাদীহি ন ৱট্টতীতি অত্থো. ৱতিআদীনি কত্ৱা জগ্গিতুঞ্চ. অত্তনো পৰিভোগত্থন্তি ফলপৰিভোগত্থং. ৰোপনাদীনীতি ৰোপাপনাদীনি. আদি-সদ্দেন সিঞ্চাপনওচিনাপনাদীনি গহিতানি. কুদ্দালখণিত্তিৱাসিফৰসুউদকভাজনাদীনি আহৰিত্ৱা সমীপে ঠপনৱসেন নিমিত্ততো চ কুদ্দালখণিত্তাদীনি চ মালাৱচ্ছে চ গহেত্ৱা ঠিতে ‘‘সামণেৰাদযো দিস্ৱা ‘থেৰো কাৰাপেতুকামো’তি আগন্ত্ৱা কৰোন্তী’’তি সঞ্ঞায ওভাসতো চ ‘‘ইমং ৰুক্খং জান, ইমং আৱাটং জানা’’তিআদিকপ্পিযৱোহাৰতো চ ‘‘পণ্ডিতেন মালাৱচ্ছাদযো ৰোপাপেতব্বা, ন চিৰস্সেৱ উপকাৰায সংৱত্তন্তী’’তিআদিপৰিযাযতো চ ৰোপনাদীনি লব্ভৰেতি সম্বন্ধো.

৩০১-২. ইদানি অট্ঠসু ৱত্থূসু অৱসেসানি দ্ৱে ৱত্থূনি দস্সেতুং ‘‘ৱুত্তাৱ ৱেজ্জিকা জঙ্ঘপেসনে’’তি ৱুত্তং. তত্থ ৱেজ্জিকা পুব্বে ৱুত্তাৱ, ইদানি জঙ্ঘপেসনাদিৱিনিচ্ছযং ৱক্খামীতি অত্থো. পিতৰোতি (পাৰা. অট্ঠ. ২.৪৩৬-৪৩৭) মাতাপিতৰো. ভণ্ডুন্তি পব্বজ্জাপেক্খং. ভিক্খুস্স সকং ৱেয্যাৱচ্চকৰঞ্চাতি এতে ঠপেত্ৱা কসিৱাণিজ্জাদিগিহিকম্মেসু দূতসাসনং হৰণে দুক্কটন্তি অত্থো. পঠমং সাসনং অগ্গহেত্ৱা পুন তং দিস্ৱা ৱা তস্স সন্তিকং গন্ত্ৱা ৱা ৱদতোপি দুক্কটমেৱাতি অত্থো. সাসনং অগ্গহেত্ৱা আগতানং পন ‘‘ভন্তে, তস্মিং গামে ইত্থন্নামস্স কা পৱত্তী’’তি পুচ্ছিযমানে কথেতুং ৱট্টতি. পুচ্ছিতপঞ্হে দোসো নত্থি.

৩০৩. এৱং কুলদূসনেন উপ্পন্নপচ্চযা. ‘‘পঞ্চন্নম্পী’’তি ৱুত্তত্তা অনুপসম্পন্নেন কতম্পি এদিসং ন ৱট্টতি এৱ মিচ্ছাজীৱত্তা. আতুমাৱত্থু (মহাৱ. ৩০৩) চেত্থ নিদস্সনং. কিং ৱিযাতি চে, তং দস্সেতুং ‘‘অভূতাৰোচনাৰূপ-সব্যোহাৰুগ্গহাদিসা’’তি ৱুত্তং. তত্থ উগ্গহাদিসাতি এতেহি উপ্পন্নপচ্চযসদিসাতি অত্থো.

৩০৪. ইদানি পুপ্ফাদীনি কেসং দাতুং ৱট্টন্তি, কেসং দাতুং ন ৱট্টন্তীতি তং দস্সেতুং ‘‘হৰাপেত্ৱা’’তিআদিমাহ. পিতূনং (পাৰা. অট্ঠ. ২.৪৩৬-৪৩৭) দাতুং লব্ভতীতি সম্বন্ধো. সেসঞাতীনং পত্তানং এৱ. লিঙ্গন্তি সিৱলিঙ্গং.

৩০৫. তথা ফলন্তি ফলম্পি মাতাপিতূনং হৰিত্ৱাপি হৰাপেত্ৱাপি দাতুং লব্ভতীতি অত্থো. ন কেৱলং মাতাপিতূনংযেৱ, অঞ্ঞেসম্পি দাতুং লব্ভতীতি দস্সেতুং ‘‘গিলানান’’ন্তিআদিমাহ. সপৰসন্তকন্তি এত্থ পৰোতি অত্তনো ৱিস্সাসঞ্ঞাতকো এৱ অধিপ্পেতো.

৩০৬. ভাজেন্তেতি সঙ্ঘস্স ফলপুপ্ফম্হি ভাজিযমানে সম্মতেন দেয্যন্তি সম্বন্ধো. ইতৰেন অসম্মতেন অপলোকেত্ৱা দাতব্বন্তি অত্থো.

৩০৭. পৰিচ্ছিজ্জাতি আগতানং দাতব্বন্তি ফলৱসেন ৱা ৰুক্খৱসেন ৱা পৰিচ্ছিন্দিত্ৱাতি অত্থো. ইতৰস্সাতি ইস্সৰাদিকস্স. কতিকং ৱত্ৱাতি ‘‘ইমস্মিং ৰুক্খে এত্তকানি ফলানি লব্ভন্তী’’তি এৱং ৱত্ৱা.

৩০৮. সেসেতি মত্তিকাদন্তকট্ঠৱেড়ুম্হি (পাৰা. অট্ঠ. ২.৪৩৬-৪৩৭). যথাৱুত্তনযো এৱাতি এত্থ অত্তনো চ পৰস্স চ সন্তকং কুলসঙ্গহত্থায দদতো দুক্কটন্তিআদিনা হেট্ঠা ৱুত্তনযেনেৱ ৱিনিচ্ছযো ৱেদিতব্বোতি অত্থো. পণ্ণম্পীতি কিঞ্চাপি পাড়িযং পণ্ণদানং ন ৱুত্তং, তথাপি কুলদূসনে পৱেসযেতি অত্থো. কুলদূসনৱিনিচ্ছযো.

কুলদূসননিদ্দেসৱণ্ণনা নিট্ঠিতা.