৩৭. উগ্গহনিদ্দেসৱণ্ণনা

২৮১. দসভেদম্পীতি সচে কেনচি হেট্ঠা দস্সিতং দসৱিধং ৰতনং আনেত্ৱা ‘‘ইদং সঙ্ঘস্স ৱা চেতিযস্স ৱা নৱকম্মস্স ৱা অঞ্ঞপুগ্গলস্স ৱা সুত্তন্তিকগণস্স ৱা দম্মী’’তি ৱুত্তে ‘‘সাধূ’’তি সম্পটিচ্ছন্তস্স দুক্কটং হোতীতি অত্থো.

২৮২-৩. তেসু দসৱিধেসু ৰতনেসূতি অত্থো. দ্ৱীসূতি ৰজতজাতৰূপেসু. গণসঙ্ঘপুগ্গলে (পাৰা. অট্ঠ. ২.৫৩৮-৫৩৯) অনামসিত্ৱা ‘‘ইদং হিৰঞ্ঞসুৱণ্ণং চেতিযস্স দম্মি, নৱকম্মস্স দম্মী’’তি ৱুত্তে ন পটিক্খিপেতি অত্থো. কিং কাতব্বন্তি চে? তং দস্সেতুং ‘‘ৱদে’’তিআদি ৱুত্তং. ‘‘ইমে এৱং ৱদন্তী’’তি কপ্পিযকাৰানং আচিক্খিতব্বন্তি অত্থো.

২৮৪. ন কেৱলং হিৰঞ্ঞসুৱণ্ণাদিকমেৱ, অঞ্ঞম্পি খেত্তৱত্থাদিকং অকপ্পিযং ন সম্পটিচ্ছিতব্বন্তি তং দস্সেতুং ‘‘খেত্তং ৱত্থু’’ন্তিআদিমাহ. দাসপসুআদিকং দাসপস্ৱাদিকং. সচে হি কোচি ‘‘ময্হং সস্সসম্পাদকং মহাতড়াকং অত্থি, তং সঙ্ঘস্স দম্মী’’তি ৱদতি, তঞ্চে সঙ্ঘো সম্পটিচ্ছতি. পটিগ্গহণেপি পৰিভোগেপি আপত্তিযেৱ. এৱং সেসেসুপি.

কপ্পিযেন কমেন গণ্হেয্যাতি সম্বন্ধো. ‘‘খেত্তং দম্মী’’তি ৱুত্তে ‘‘ন ৱট্টতী’’তি পটিক্খিপিত্ৱা ‘‘ইতো চত্তাৰো পচ্চযে পৰিভুঞ্জথা’’তি ৱা ‘‘চতুপচ্চযপৰিভোগত্থায দম্মী’’তি ৱা ৱদতি চে, গহেতব্বং. ৱত্থুম্হিপি এসেৱ নযো. ‘‘তড়াকং দম্মী’’তি ৱুত্তে পটিক্খিপিত্ৱা ‘‘চত্তাৰো পচ্চযে পৰিভুঞ্জথা’’তি ৱা ‘‘সঙ্ঘো উদকং পৰিভুঞ্জিস্সতি, ভণ্ডকং ধোৱিস্সতী’’তি ৱা আদিনা নযেন ৱুত্তে সম্পটিচ্ছিতব্বং. ‘‘দাসং দম্মী’’তি ৱুত্তে পটিক্খিপিত্ৱা ‘‘আৰামিকং, ৱেয্যাৱচ্চকৰং, কপ্পিযকাৰকং দম্মী’’তি ৱুত্তে সম্পটিচ্ছিতব্বং. ‘‘গোমহিংসঅজেড়কাদযো দম্মী’’তি ৱুত্তে পটিক্খিপিত্ৱা ‘‘পঞ্চগোৰসপৰিভোগত্থাযা’’তি ৱুত্তে সম্পটিচ্ছিতব্বং. এদিসং গহণং সন্ধায ‘‘পটিক্খিপিত্ৱা গণ্হেয্যা’’তি ৱুত্তং.

২৮৫-৬. নৱমাতিককেদাৰতড়াককিৰিযা (পাৰা. অট্ঠ. ২.২৩৮-২৩৯) চ অনৱে পুব্বে কপ্পিযৱোহাৰেন পটিক্খিপিত্ৱা গহিততড়াকে মত্তিকুদ্ধৰণঞ্চ ভিন্নট্ঠানে পাড়িবন্ধো চ দুব্বলট্ঠানে আড়িযা থিৰকাৰো চ অনৱে কেদাৰে পুৰাণভাগতো অতিৰেকভাগগ্গহণঞ্চ নৱে কেদাৰে অপৰিচ্ছিন্নভাগে ‘‘সস্সে দেথ এত্তকে’’তি কহাপণুট্ঠাপনঞ্চাপীতি ইদং সব্বং ভিক্খুস্স কাতুং ন ৱট্টতি. সচে কৰোতি, এৱমাদিকং সব্বেসম্পি অকপ্পিযন্তি অত্থো.

২৮৭-৯. ইদানি তংযেৱ অকপ্পিযং দস্সেতুং ‘‘অৱত্ৱা’’তিআদি ৱুত্তং. তস্সত্থো (পাৰা. অট্ঠ. ২.২৩৮-২৩৯) – যো পন ‘‘কস, ৱপ্প’’ ইচ্চাদিকং অৱত্ৱা ‘‘এত্তিকায ভূমিযা এত্তকো ভাগো দেয্যো’’তি ভূমিং ৱা পতিট্ঠাপেতি, ‘‘এত্তকে ভূমিভাগে সস্সং কতং, এত্তকং গণ্হথা’’তি কস্সকে ৱদন্তে পমাণগণ্হনত্থং দণ্ডৰজ্জুভি মিনতি, খলে ঠত্ৱা ৰক্খণাদীনি কৰোতি, তস্সেৱ অকপ্পিযন্তি.

২৯০. ভণ্ডাগাৰিকসীসেন পিতুসন্তকম্পি সচে পটিসামেয্য, পাচিত্তিযন্তি অত্থো.

২৯১-২. পিতূনন্তি মাতাপিতূনং. সাটকাদিকপ্পিযং ৱত্থুং. ‘‘পটিসামেত্ৱা দেহী’’তি ৱুত্তেতি সম্বন্ধো. পাতেত্ৱান গতে যস্মা অজ্ঝাৰামসিক্খাপদৱসেন (পাচি. ৫০৫-৫০৬) পলিবোধো, তস্মা গোপিতুং লব্ভন্তি অত্থো.

২৯৩-৪. সকং ৱাসিআদিপৰিক্খাৰন্তি অত্থো. ইদং ঠানং গুত্তন্তি দস্সেতব্বং. ‘‘এত্থ ঠপেথা’’তি পন ন ৱত্তব্বং.

২৯৫. এত্থ ‘‘অঞ্ঞো কোচি ন পৱিসতি, ভিক্খূহি ৱা সামণেৰেহি ৱা গহিতং ভৱিস্সতী’’তি সঙ্কন্তীতি অত্থো. ৱত্থুম্হীতি অলঙ্কাৰাদিৱত্থুম্হীতি অত্থো. তাদিসেতি যাদিসে ৱত্থুম্হি নট্ঠে আসঙ্কা হোতি, তাদিসে ৱত্থুম্হি নট্ঠেতি সম্বন্ধো.

২৯৬. ইদানি অসঙ্কিতব্বট্ঠানং দস্সেতুং ‘‘ৱিহাৰাৱসথস্সন্তো’’তিআদিমাহ. ৱিহাৰস্স চ ঘৰস্স চাতি অত্থো. ৰতনন্তি দসৱিধং ৰতনং. ৰত্নসম্মতন্তি সাটকৱেঠনাদিকং. গহেত্ৱানাতি কপ্পিযকাৰকে অসতি অত্তনাপি গহেত্ৱান নিক্খিপেয্যাতি অত্থো. মগ্গেৰঞ্ঞেপীতি মগ্গেপি অৰঞ্ঞেপি. তাদিসেতি ‘‘ভিক্খূহি গহিতং ভৱিস্সতী’’তি আসঙ্কিতব্বট্ঠানে. পতিৰূপং কৰীযতীতি মগ্গে ৱা অৰঞ্ঞে ৱা তাদিসং ভণ্ডং পস্সিত্ৱা মগ্গা ওক্কম্ম নিসীদিতব্বং, সামিকেসু আগতেসু তং ঠানং আচিক্খিতব্বং. সচে সামিকে ন পস্সতি, ৰতনসম্মতং পংসুকূলং গহেতব্বং. ৰতনঞ্চে হোতি, তুণ্হীভূতেন গন্তব্বন্তি অত্থো. অযং মগ্গাৰঞ্ঞকেসু পটিপত্তি. ৱিহাৰাৱসথানং পন অন্তো তাদিসং দিস্ৱা ভণ্ডকং মুঞ্চিত্ৱা ‘‘এত্থ এত্তকা কহাপণা’’তিআদিনা নযেন ৰূপেন ৱা লঞ্ছনায ৱা পিলোতিকায ৱা সঞ্ঞাণং কত্ৱা নিক্খিপিতব্বং, ততো পক্কমন্তেন পতিৰূপানং ভিক্খূনং আচিক্খিতব্বং. উগ্গহৱিনিচ্ছযো.

উগ্গহনিদ্দেসৱণ্ণনা নিট্ঠিতা.