৩৬. ভেসজ্জনিদ্দেসৱণ্ণনা

২৭৪-৫. সহধম্মিনং লব্ভং ভেসজ্জকৰণন্তি সম্বন্ধো. ন কেৱলং পঞ্চন্নং সহধম্মিকানংযেৱ ভিক্খাচৰিযৱিঞ্ঞত্তিসকেহি ভেসজ্জকৰণং লব্ভতি, অথ খো অপৰেসম্পি পঞ্চন্নং লব্ভতি, তে দস্সেন্তো ‘‘পিতূন’’ন্তিআদিমাহ. পিতূনন্তি মাতাপিতূনন্তি অত্থো. যে মাতাপিতৰো জগ্গন্তি উপট্ঠহন্তি, তে তদুপট্ঠাকা নাম. ভিক্খুং এৱ নিস্সায জীৱন্তো ভিক্খুনিস্সিতকো নাম. পব্বজ্জাপেক্খো ‘‘ভণ্ডূ’’তি ৱুচ্চতি.

২৭৬. অপৰেসম্পি দসন্নং কাতুং ৱট্টতি, তে দস্সেতুং ‘‘মহাচূড়পিতা’’তিআদিমাহ. এত্থ (পাৰা. অট্ঠ. ২.১৮৫-১৮৭) পন মহাপিতা চূড়পিতা মহামাতা চূড়মাতা মহাভাতা চূড়ভাতা মহাভগিনী চূড়ভগিনীতি ইমেহি অট্ঠহি আদি-সদ্দেন পিতুভগিনিঞ্চ মাতুভাতিকঞ্চ গহেত্ৱা দস. এতেসং পন সকেন ভেসজ্জেন কাতব্বং. অত্তনিযে চ অসতীতি পাঠসেসো.

২৭৭. ন কেৱলঞ্চ এতেসং দসন্নং, ইমেহি সম্বন্ধানং পুত্তনত্তাদীনং যাৱসত্তমা কুলপৰিৱট্টা কাতুং ৱট্টতীতি দস্সনত্থং ‘‘কুলদূসনা’’তিআদিমাহ. অঞ্ঞোপি (পাৰা. অট্ঠ. ২.২৮৫-২৮৭) যো আগন্তুকো ৱা চোৰো ৱা যুদ্ধপৰাজিতো ৱা ইস্সৰো ঞাতকেহি পৰিচ্চত্তো ৱা গমিযমনুস্সো ৱা গিলানো হুত্ৱা ৱিহাৰং পৱিসতি, সব্বেসম্পি অপচ্চাসীসন্তেন ভেসজ্জং কাতব্বং.

২৭৮. মাতা (পাৰা. অট্ঠ. ২.১৮৫-১৮৭) পিতা তদুপট্ঠাকো ভিক্খুনিস্সিতকো পণ্ডুপলাসো ৱেয্যাৱচ্চকৰোতি ইমেসং ছন্নং অনামট্ঠপিণ্ডপাতো অৱাৰিতোতি অত্থো. কিঞ্চ ভিয্যো – দামৰিকচোৰস্স চ ইস্সৰিযস্স চ দাতুমৱাৰিতোতি অত্থো.

২৭৯. তেসন্তি (পাৰা. অট্ঠ. ২.১৮৫-১৮৭) গহট্ঠানং. সাসনোগধন্তি ৰতনপৰিত্তআটানাটিযপৰিত্তাদিপৰিত্তং ভণিতব্বন্তি অত্থো.

২৮০. ‘‘আগন্ত্ৱা (পাৰা. অট্ঠ. ২.১৮৫-১৮৭) সীলং দেতু, ধম্মঞ্চ পৰিত্তঞ্চ ভাসতূ’’তি কেনচি পেসিতোতি সম্বন্ধো. দাতুং ৱত্তুন্তি সীলং দাতুং, ধম্মঞ্চ পৰিত্তঞ্চ ৱত্তুং লব্ভতীতি অত্থো. ভেসজ্জৱিনিচ্ছযো.

ভেসজ্জনিদ্দেসৱণ্ণনা নিট্ঠিতা.