৩৫. পৰিক্খাৰনিদ্দেসৱণ্ণনা

২৫৯-২৬০. গিৰিকূটন্তি মকৰদন্তকং. সিব্বিতুঞ্চ ছিন্দিতুঞ্চ ন ৱট্টতীতি সব্বত্থ যোজনা. দণ্ডেতি ছত্তদণ্ডে.

২৬১. সিব্বিতুং ৱা পঞ্জৰং ৱিনন্ধিতুং ৱা থিৰত্থং ছত্তে বন্ধিতুং দণ্ডে লেখা ৱট্টতীতি সম্বন্ধো. সচে ৱুত্তপ্পকাৰং অকপ্পিযছত্তং লভতি, ঘটকম্পি ৱাড়ৰূপম্পি ছিন্দিত্ৱা ধাৰেতব্বং, লেখাপি ঘংসেত্ৱা অপনেতব্বা, সুত্তকেন ৱা দণ্ডো ৱেঠেতব্বো.

২৬২. অনুৱাতং সন্ধায ‘‘অন্তে ৱা’’তি ৱুত্তং. দ্ৱিন্নং পট্টানং সঙ্ঘটিতট্ঠানং সন্ধায ‘‘পট্টমুখে ৱাপী’’তি ৱুত্তং. ৱৰকসীসাকাৰেন সিব্বনং সন্ধায ‘‘ৱেণিকা’’তি চ সতপদাকাৰেন সিব্বনং সন্ধায ‘‘সঙ্খলিকাপি ৱা’’তি চ ৱুত্তং. সতপদিসদিসং অঞ্ঞং ৱা সূচিৱিকাৰং ন কপ্পতি, পকতিসূচিকম্মমেৱ ৱট্টতীতি অত্থো. পাড়িকণ্ণিকআদিকং চীৱৰে ন চ কপ্পতীতি সম্বন্ধো.

২৬৩-৪. চতুকোণাৱ (পাৰা. অট্ঠ. ১.৮৫) কপ্পৰেতি সম্বন্ধো. অগ্ঘিকন্তি অগ্ঘিযং চেতিযসদিসং. এত্থাতি গণ্ঠিপাসকপট্টে. কোণসুত্তা চ পীড়কাতি ন কেৱলং চতুকোণা গণ্ঠিকপাসকপট্টাৱ কপ্পন্তি, অথ খো দুৱিঞ্ঞেয্যা কোণসুত্তপীড়কা চ কপ্পৰেতি অত্থো. গন্ধং তেলং ৱাতি গন্ধং ৱা তেলং ৱা.

২৬৫. ৰত্তন্তি (পাৰা. অট্ঠ. ১.৮৫) ৰজিতং. অঞ্ঞেন ৱাতি মুগ্গৰাদিনা ৱা. কত্ৱাতি ঠপেত্ৱা. পহাৰে ন চ মুট্ঠিনাতি মুট্ঠিনা ন পহাৰেয্যাতি অত্থো.

২৬৬-৭. ছত্তৱট্টিযং (পাৰা. অট্ঠ. ১.৮৫) লেখং ঠপেত্ৱা ধম্মকৰণে লেখা ন ৱট্টতীতি সম্বন্ধো. কুঞ্চিকায চ পিপ্ফলে চ মণিকা চ পীড়কা চ ন ৱট্টতীতি সম্বন্ধো. তত্থ মণিকাতি একা এৱ ৱট্টমণিকা. পীড়কা মুত্তৰাজিসদিসা বহূ.

২৬৮-৯. মালাদ্যৰণিযন্তি (পাৰা. অট্ঠ. ১.৮৫) অৰণিযং মালাদি ৱণ্ণমট্ঠং ন ৱট্টতীতি সম্বন্ধো. এৱং সব্বত্থ. তিপুসীসমযে পত্তমণ্ডলে ভিত্তিকম্মঞ্চ ন ৱট্টতীতি অত্থো. হিত্ৱাতি ঠপেত্ৱা. সূচিসণ্ডাসকো (পাৰা. অট্ঠ. ১.৮৫) নাম সূচিং ডংসাপেত্ৱা ঘংসিতুং কতো দাৰুমযো. ‘‘অনুজানামি, ভিক্খৱে, মকৰদন্তকং ছিন্দিতু’’ন্তি (চূড়ৱ. ২৫৩) ৱুত্তত্তা পত্তমণ্ডলে মকৰদন্তকং ৱট্টতি, অঞ্ঞং ভিত্তিকম্মাদিৱিকাৰমেৱ ন ৱট্টতি, তস্মা গিৰিকূটং পত্তমণ্ডলে ঠপেত্ৱা অৱসেসে ন ৱট্টতীতি ৱেদিতব্বং.

২৭২. সেনাসনেতি (পাৰা. অট্ঠ. ১.৮৫) পাসাদাদিসেনাসনেতি অত্থো.

২৭৩. পুমিত্থিৰূপৰহিতন্তি পুৰিসৰূপইত্থিৰূপৰহিতন্তি অত্থো. পৰিক্খাৰৱিনিচ্ছযো.

পৰিক্খাৰনিদ্দেসৱণ্ণনা নিট্ঠিতা.