৩৪. পথৱীনিদ্দেসৱণ্ণনা

২৪২. জাতা (পাচি. ৮৬; পাচি. অট্ঠ. ৮৬-৮৮; কঙ্খা. অট্ঠ. পথৱীখণনসিক্খাপদৱণ্ণনা) অজাতাতি দুৱিধা পথৱীতি অত্থো. ইদানি তদুভযং দস্সেতুং ‘‘সুদ্ধমত্তিকপংসুকা’’তিআদিমাহ. তত্থ সুদ্ধমত্তিকপংসুকা চ অদড্ঢা চ বহুমত্তিকপংসুকা চ চাতুমাসাধিকোৱট্ঠপংসুমত্তিকৰাসি চ জাতপথৱীতি সম্বন্ধো. এত্থ পন অদড্ঢাতি উদ্ধনপচনকুম্ভকাৰাৱাপভাজনপচনাদিৱসেন তথা তথা অদড্ঢা. অযং পন ৱিসুং নত্থি, সুদ্ধপংসুআদীসু অঞ্ঞতৰাৱ ৱেদিতব্বা. সুদ্ধপংসু সুদ্ধমত্তিকা যেভুয্যেনপংসু যেভুয্যেনমত্তিকা অতিৰেকচাতুমাসাধিকোৱট্ঠমত্তিকাপংসুপুঞ্জা চ অদড্ঢা চাতি অযং সব্বাপি জাতপথৱীতি ৱেদিতব্বা.

২৪৩. দুতিযাতি অজাতপথৱীতি অত্থো. ৱুত্তৰাসীতি মত্তিকৰাসি চ পংসুৰাসি চ চাতুমাসোমৱট্ঠকো অজাতপথৱীতি অত্থো.

২৪৪. ইদানি যেভুয্যেনমত্তিকা যেভুয্যেনপংসুকা যেভুয্যেনসক্খৰাতি এৱং ৱুত্তাসু কিত্তাৱতা যেভুয্যতা হোতীতি তং দস্সেতুং ‘‘দ্ৱে ভাগা’’তিআদিমাহ. তত্থ তীসু ভাগেসু দ্ৱে ভাগা মত্তিকা যস্সা ভূমিযা, এসা যেভুয্যমত্তিকাতি সম্বন্ধো. উপড্ঢপংসুআদযোপি কপ্পিযা এৱ অকপ্পিযভাগস্স অনতিৰেকতো. ‘‘যেভুয্যেনমত্তিকা যেভুয্যেনপংসুকা’’তি (পাচি. ৮৬) হি ৱুত্তং, ন ‘‘উপড্ঢমত্তিকা, উপড্ঢপংসুকা’’তি. সেসেসুপীতি যেভুয্যপংসুকাদীসুপি.

২৪৫. জাতসঞ্ঞিস্স পাচিত্তীতি সম্বন্ধো. দ্ৱেড়্হস্স ৱিমতিস্স দুক্কটং. জাতে অজাতসঞ্ঞিস্স অনাপত্তি.

২৪৬. একাযাণত্তিযা একাতি সচে সকিং আণত্তো দিৱসম্পি খণতি, আণাপকস্স একা এৱাতি অত্থো. ৱাচসোতি ৱাচায ৱাচাযাতি অত্থো.

২৪৭. এত্থ ‘‘জালেহি অগ্গি’’ন্তি ৱা ৱত্তুং ন ৱট্টতি. অনিযমেত্ৱা পন ‘‘পোক্খৰণিং খণ, পথৱিং খণ, ৱাপিং খণ, আৱাটং খণ, কন্দং খণা’’তি ৱত্তুং ৱট্টতি.

২৪৮. এদিসন্তি এত্থ অঞ্ঞম্পি এৱৰূপং কপ্পিযৱোহাৰৱচনং ৱট্টতীতি অধিপ্পাযো.

২৪৯. কোপেতুং লব্ভন্তি সম্বন্ধো, ঘটাদীহি গহেতুং সক্কুণেয্যকং উস্সিঞ্চনীযকদ্দমং.

২৫১-২. উদকসন্তিকে পতিতেতি সম্বন্ধো. উদকে পতিতং পন সব্বকালং কপ্পিযমেৱ, তস্মা অকপ্পিযং দস্সেতুং ‘‘উদকসন্তিকে’’তি ৱুত্তং. পাসাণে লগ্গে ৰজে চ নৱসোণ্ডিযা পতিতে ৰজে চাতি সম্বন্ধো. অব্ভোকাসুট্ঠিতে ৱম্মিকে চ মত্তিকাকুট্টে চাতি অত্থো, তথা এতেপি সব্বে চাতুমাসাধিকোৱট্ঠা ন কোপেতব্বাতি অত্থো.

২৫৩-৫. ভূমিং ৱিকোপযং থম্ভাদিং গণ্হিতুং ন চ কপ্পতীতি সম্বন্ধো. ধাৰাযাতি পস্সাৱধাৰায. পদং দস্সেস্সামীতি সম্বন্ধো.

২৫৭. সেকোতি সিঞ্চনং. ভূমিযা অল্লহত্থং ঠপেত্ৱাতি সম্বন্ধো.

২৫৮. অৱসে সতীতি হত্থদাহাদীসু আপদাসূতি অত্থো. পথৱীৱিনিচ্ছযো.

পথৱীনিদ্দেসৱণ্ণনা নিট্ঠিতা.