৩৩. কাযবন্ধননিদ্দেসৱণ্ণনা

২৩৫. অকাযবন্ধনোতি কাযবন্ধনং অবন্ধিত্ৱাতি অত্থো. ততো পট্ঠায চীৱৰং পাৰুপিতব্বং, ততো পট্ঠায এৱ কাযবন্ধনং বন্ধিতব্বং. ‘‘ন ভিক্খৱে অকাযবন্ধনেন গামো পৱিসিতব্বো. যো পৱিসেয্য, আপত্তি দুক্কটস্সা’’তি (চূড়ৱ. ২৭৮) হি ৱুত্তং. তত্থেৱাসতিযা গতোতি অসতিযা গতো যত্থ সৰতি, তত্থেৱ বন্ধিতব্বং. সৰিত্ৱা পন যাৱ ন বন্ধতি, তাৱ পিণ্ডায চৰিতুং ন ৱট্টতি. যদি অন্তোগামে সৰতি, কাযবন্ধনে সতি একমন্তে ঠত্ৱা বন্ধিতব্বং, অসতি চে নিক্খমিত্ৱা বন্ধিত্ৱা পুন পিণ্ডায পৱিসিতব্বন্তি ৱদন্তি.

২৩৬. ‘‘অনুজানামি, ভিক্খৱে, দ্ৱে কাযবন্ধনানি পট্টিকং সূকৰন্তক’’ন্তি (চূড়ৱ. ২৭৮) ৱুত্তত্তা ‘‘দুৱিধ’’ন্তি ৱুত্তং. তত্থ সূকৰন্তং নাম কুঞ্চিকাকোসকা ৱিয অন্তে সুসিৰং কত্ৱা কোট্টিতং. ৰজ্জু চ একাতি একৱট্টা ৰজ্জু চ. তদনুলোমিকাতি তেসং দ্ৱিন্নং অনুলোমিকা.

২৩৭. মচ্ছকণ্ডকখজ্জুৰী-পত্তা মট্ঠা চ পট্টিকাতি এত্থ (চূড়ৱ. অট্ঠ. ২৭৮) এতে মচ্ছকণ্টকাদযো মট্ঠা ৱিকাৰৰহিতা পট্টিকা চ তদন্তোগধাতি অধিপ্পাযো. লব্ভা দসা চতস্সোতি একায ৱা দ্ৱীসু ৱা তীসু ৱা কথা এৱ নত্থীতি অধিপ্পাযো, ততো পৰং ন ৱট্টতি. অন্তেসূতি উভোসু অন্তেসু. গুণসুত্তকন্তি দিগুণসুত্তকং.

২৩৯. মকৰমুখাদিন্তি আদি-সদ্দেন দেড্ডুভসীসং গহিতং. উভন্তেতি উভোসু অন্তেসু. কস্সাতি? ৱিধস্স. ঘটকাতি ঘটকতো. লেখাতি লেখায. ঘটকতো চ লেখায চ অঞ্ঞং চিত্তকং ন কপ্পতীতি অত্থো.

২৪০. দেড্ডুভকন্তি (চূড়ৱ. ২৭৮; চূড়ৱ. অট্ঠ. ২৭৮) উদকসপ্পসিৰসদিসং. মুৰজন্তি বহুৰজ্জুকে একতো সঙ্কড্ঢিত্ৱা একায ৰজ্জুযা পলিৱেঠেত্ৱা কতৰজ্জু. মদ্দৱীণন্তি পামঙ্গসদিসং. কলাবুকন্তি অনেকৱট্টং. এতানি পন সব্বানি ন কপ্পন্তি. দসাসু দ্ৱে মজ্ঝিমাতি মুৰজং মদ্দৱীণন্তি দ্ৱে মজ্ঝিমা এৱ. কপ্পৰেতি কপ্পন্তীতি অত্থো.

২৪১. গণ্ঠিযো চাপীতি (চূড়ৱ. ২৭৯) চীৱৰগণ্ঠিযোপি. ৱেড়ুআদিমযা কপ্পন্তীতি পসঙ্গেন ৱুত্তং. কাযবন্ধনৱিনিচ্ছযো.

কাযবন্ধননিদ্দেসৱণ্ণনা নিট্ঠিতা.

পঠমভাণৱাৰং.