৩২. নিস্সযনিদ্দেসৱণ্ণনা

২৩০. ব্যত্তস্সাতি এত্থ কিত্তাৱতা ব্যত্তো হোতীতি চে? নিস্সযমুচ্চনকেন পন সব্বন্তিমেন ধম্মপৰিচ্ছেদেন অত্থতো চ ব্যঞ্জনতো চ দ্ৱে মাতিকা পগুণা ৱাচুগ্গতা কাতব্বা, পক্খদিৱসেসু ধম্মস্সাৱনত্থায সুত্তন্ততো চত্তাৰো ভাণৱাৰা, সম্পত্তানং পৰিসানং পৰিকথনত্থায অন্ধকৱিন্দমহাৰাহুলোৱাদধম্মক্খন্ধসদিসো একো কথামগ্গো, সঙ্ঘভত্তমঙ্গলামঙ্গলেসু অনুমোদনত্থায তিস্সো অনুমোদনা, উপোসথপ্পৱাৰণাদিৱিজাননত্থং কম্মাকম্মৱিনিচ্ছযো, সমণধম্মকৰণত্থং সমাধিৱসেন ৱা ৱিপস্সনাৱসেন ৱা অৰহত্তপৰিযোসানং একং কম্মট্ঠানং এত্তকং উগ্গহেতব্বং. এত্তাৱতা ব্যত্তো নাম হোতি চাতুদিসো, ইতৰথা অব্যত্তো.

২৩১. ইদানি নিস্সযগ্গহণাকাৰং দস্সেতুং ‘‘একংস’’ন্তিআদি ৱুত্তং. এত্থ (মহাৱ. ১০৩) আযস্মতোতি আযস্মন্তং.

২৩২. ইদানি পটিপ্পস্সদ্ধিৱিধানং দস্সেতুং ‘‘পক্কন্তে’’তিআদি ৱুত্তং, ‘‘পঞ্চিমা, ভিক্খৱে, নিস্সযপ্পটিপ্পস্সদ্ধিযো উপজ্ঝাযম্হা. উপজ্ঝাযো পক্কন্তো ৱা হোতি ৱিব্ভন্তো ৱা কালকতো ৱা পক্খসঙ্কন্তো ৱা আণত্তিযেৱ পঞ্চমী’’তি (মহাৱ. ৮৩), ‘‘ছযিমা, ভিক্খৱে, নিস্সযপ্পটিপ্পস্সদ্ধিযো আচৰিযম্হা. আচৰিযো পক্কন্তো ৱা হোতি ৱিব্ভন্তো ৱা কালকতো ৱা পক্খসঙ্কন্তো ৱা আণত্তিযেৱ পঞ্চমী, উপজ্ঝাযেন ৱা সমোধানগতো হোতী’’তি ইদং পন উভযং ইধ দস্সিতং. সচে আচৰিযুপজ্ঝাযা সামন্তৱিহাৰেসুপি অপৰিক্খিত্তেসু লেড্ডুপাতদ্ৱযব্ভন্তৰে ৱসন্তি, নিস্সযো ন পটিপ্পস্সম্ভতি. পৰিক্খিত্তেসুপি ন পটিপ্পস্সম্ভতীতি একে. আচৰিযা পন ন ইচ্ছন্তি. কস্মাতি চে? নিস্সযগ্গহণপ্পটিপ্পস্সদ্ধীনং উপচাৰসীমায পৰিচ্ছিন্নত্তা. লেড্ডুপাতেন উপচাৰসীমাপৰিচ্ছেদো পন অপৰিক্খিত্তেসু এৱ লব্ভতি, ন পৰিক্খিত্তেসু. তস্মা আচৰিযানং ৱিনিচ্ছযেৱ ঠাতব্বং.

পক্কন্তেতি এত্থ (মহাৱ. অট্ঠ. ৮৩) সচে আচৰিযো অন্তেৱাসিকং অনামন্তেত্ৱাৱ উপচাৰসীমং অতিক্কমতি, নিস্সযো পটিপ্পস্সম্ভতি. সচে উপচাৰসীমং অনতিক্কমিত্ৱাৱ নিৱত্ততি, ন পটিপ্পস্সম্ভতি. আচৰিযং অনামন্তেত্ৱা অন্তেৱাসিকস্স গমনেপি এসেৱ নযো. সচে আচৰিযো কত্থচি গন্তুকামো অন্তেৱাসিকং আপুচ্ছতি, অন্তেৱাসিকোপি ‘‘সাধু সাধূ’’তি সম্পটিচ্ছতি, তঙ্খণে এৱ পটিপ্পস্সম্ভতি. এৱং আচৰিযং আপুচ্ছিত্ৱা অন্তেৱাসিকস্স গমনেপি. দ্ৱীসুপি অন্তোৱিহাৰেযেৱ ঠিতেসু আচৰিযো ৱা অন্তেৱাসিকং, অন্তেৱাসিকো ৱা আচৰিযং অনাপুচ্ছিত্ৱাৱ সচে দ্ৱে লেড্ডুপাতে অতিক্কমতি, পটিপ্পস্সম্ভতি. পক্খসঙ্কন্তে ৱা ৱিব্ভন্তে ৱা কালকতে ৱা তঙ্খণেযেৱ পটিপ্পস্সম্ভতি. আণত্তি নাম নিস্সযপ্পণামনা. দস্সনসৱনৱসেন দুৱিধং সমোধানং.

২৩৩. অলজ্জিন্তি এত্থ –

‘‘সঞ্চিচ্চ আপত্তিং আপজ্জতি;

আপত্তিং পৰিগূহতি;

অগতিগমনঞ্চ গচ্ছতি;

এদিসো ৱুচ্চতি অলজ্জিপুগ্গলো’’তি. (পৰি. ৩৫৯) –

এৱং ৱুত্তং. ‘‘ন ভিক্খৱে অলজ্জিনং নিস্সায ৱত্থব্বং. যো ৱসেয্য, আপত্তি দুক্কটস্সা’’তি (মহাৱ. ১২০) হি ৱুত্তং.

২৩৪. ‘‘অনুজানামি, ভিক্খৱে, অদ্ধানমগ্গপ্পটিপন্নেন ভিক্খুনা নিস্সযং অলভমানেন অনিস্সিতেন ৱত্থু’’ন্তি (মহাৱ. ১২১) ৱুত্তত্তা ‘‘অদ্ধিকস্সা’’তি ৱুত্তং. গিলানুপট্ঠাকস্স চ যাচিতস্সাতি সম্বন্ধো. ‘‘অনুজানামি, ভিক্খৱে, গিলানুপট্ঠাকেন ভিক্খুনা নিস্সযং অলভমানেন যাচিযমানেন অনিস্সিতেন ৱত্থু’’ন্তি (মহাৱ. ১২১) হি ৱুত্তং. সল্লক্খেন্তেন ফাসুকন্তি ফাসুৱিহাৰং সল্লক্খেন্তেন. ইদং পন পৰিহাৰং (মহাৱ. অট্ঠ. ১২১) সোতাপন্নাদিঅৰিযসাৱকো ৱা থামগতসমথৱিপস্সনালাভী ৱা বালপুথুজ্জনো ৱা ন লভতি. যস্স খো পন সমথৱিপস্সনা তৰুণা হোতি, ন থামগতা, অযং লভতি. অসন্তে নিস্সযদাযকে ‘‘যদা পটিৰূপো নিস্সযদাযকো আগচ্ছিস্সতি, তদা তস্স নিস্সায ৱসিস্সামী’’তি আভোগং কত্ৱা যাৱ আসাড়্হীপুণ্ণমা, তাৱ ৱসিতুং লভতি. সচে পন আসাড়্হীমাসে নিস্সযদাযকং ন লভতি, যত্থ অত্থি, তত্থ গন্তব্বং. অন্তোৱস্সে পন অনিস্সিতেন ৱত্থুং ন ৱট্টতি. সভাগে দাযকে অসন্তে ৱসিতুং লব্ভতীতি সব্বপদেসু যোজনা কাতব্বা. নিস্সযৱিনিচ্ছযো.

নিস্সযনিদ্দেসৱণ্ণনা নিট্ঠিতা.