৩১. ৱিকপ্পনানিদ্দেসৱণ্ণনা

২২১. সম্মুখাযাতি (পাচি. ৩৭৪; পাৰা. অট্ঠ. ২.৪৬৯; কঙ্খা. অট্ঠ. ৱিকপ্পনসিক্খাপদৱণ্ণনা) সম্মুখে ঠিতস্সাতি অত্থো. ব্যত্তস্সাতি ৱিকপ্পনৱিধানং পচ্চুদ্ধৰণাদিৱিধানঞ্চ জানন্তস্স. অব্যত্তো পন ‘‘ইমিনা ময্হং দিন্ন’’ন্তি গহেত্ৱাপি গচ্ছেয্যাতি অত্থো. একস্সাতি একস্স ভিক্খুস্স.

২২২. নিধেতুংৱাতি নিধেতুং এৱ, নিস্সগ্গিযং ন হোতীতি অত্থো. পৰিভুঞ্জিতুং ৱা ৱিস্সজ্জেতুং ৱা অধিট্ঠাতুং ৱা ন ৱট্টতীতি অত্থো.

২২৪-৫. অপৰা সম্মুখা ৱাতি সম্মুখা ৱিকপ্পনা এৱাতি অত্থো. ইমা দ্ৱে ৱিকপ্পনা অত্তনা এৱ ৱিকপ্পেত্ৱা পৰেন পচ্চুদ্ধৰাপিতত্তা সম্মুখা ৱিকপ্পনা এৱাতি ৱুত্তা.

২২৭. মিত্তোতি দড়্হমিত্তো. সন্দিট্ঠোতি দিট্ঠমত্তো নাতিদড়্হমিত্তো. ‘‘ইতৰেন চ পুব্বে ৱুত্তনযেন ‘তিস্সো ভিক্খূ’তি ৱা ‘তিস্সা ভিক্খুনী’তি ৱা ৱত্তব্বং. পুন তেন ‘অহং তিস্সস্স ভিক্খুনো, তিস্সায ভিক্খুনিযা ৱা দম্মী’তি ৱিকপ্পেত্ৱা তেনেৱ ‘তিস্সস্স ভিক্খুনো, তিস্সায ভিক্খুনিযা সন্তকং পৰিভুঞ্জ ৱা ৱিস্সজ্জেহি ৱা যথাপচ্চযং ৱা কৰোহী’তি পচ্চুদ্ধৰিতব্ব’’ন্তি এৱং পাঠো গহেতব্বো.

২২৮. দূৰসন্তিকত্তেকত্ত-বহুভাৱং ৱিজানিযাতি এত্থ দূৰত্তঞ্চ সন্তিকত্তঞ্চ একত্তঞ্চ বহুভাৱঞ্চ ৱিজানিত্ৱাতি অত্থো.

২২৯. ‘‘দসাহপৰমং অতিৰেকচীৱৰং ধাৰেতব্ব’’ন্তি (পাৰা. ৪৬২) ৱুত্তত্তা ‘‘দসাহং ৱা’’তি ৱুত্তং. ‘‘চীৱৰকালসমযো নাম অনত্থতে কথিনে ৱস্সানস্স পচ্ছিমো মাসো, অত্থতে কথিনে পঞ্চ মাসা’’তি (পাৰা. ৬৪৯) ৱুত্তত্তা ‘‘মাসমেকং ৱা পঞ্চ ৱা’’তি ৱুত্তং, মাসং ৱা একং পঞ্চ ৱা মাসেতি অত্থো. ‘‘ভিক্খুনো পনেৱ অকালচীৱৰং উপ্পজ্জেয্য, আকঙ্খমানেন ভিক্খুনা পটিগ্গহেতব্বং. পটিগ্গহেত্ৱা খিপ্পমেৱ কাৰেতব্বং. নো চস্স পাৰিপূৰি, মাসপৰমং তেন ভিক্খুনা তং চীৱৰং নিক্খিপিতব্বং ঊনস্স পাৰিপূৰিযা সতিযা পচ্চাসাযা’’তি (পাৰা. ৪৯৯) ৱুত্তত্তা ‘‘পচ্চাসা সতি মাসক’’ন্তি ৱুত্তং. নুপ্পাদযতীতি অনধিট্ঠিতং অৱিকপ্পিতং নিস্সগ্গিং ন জনযতীতি অত্থো. ৱিকপ্পনাৱিনিচ্ছযো.

ৱিকপ্পনানিদ্দেসৱণ্ণনা নিট্ঠিতা.