৩০. ৱত্তনিদ্দেসৱণ্ণনা

২১৩. ইদানি আগন্তুকৱত্তাদীনি দস্সেতুং ‘‘ৱত্ত’’ন্তি মাতিকাপদং উদ্ধটং. পৰিক্খিত্তস্স (চূড়ৱ. ৩৫৬ আদযো; চূড়ৱ. অট্ঠ. ৩৫৭ আদযো) ৱিহাৰস্স পৰিক্খেপং, অপৰিক্খিত্তস্স দ্ৱীহি লেড্ডুপাতেহি পৰিচ্ছিন্নট্ঠানং পত্ৱা উপাহনং ওমুঞ্চিত্ৱা নীচং কত্ৱা পপ্ফোটেত্ৱা উপাহনং দণ্ডকেন গহেত্ৱা ছত্তং অপনামেত্ৱা সীসং ৱিৱৰিত্ৱা সীসে চীৱৰং খন্ধে কৰিত্ৱা সাধুকং অতৰমানেন আৰামো পৱিসিতব্বোতি অত্থো.

২১৪. পুচ্ছেয্য সযনাসনন্তি ‘‘কতমং মে সেনাসনং পাপুণাতি, কিং অজ্ঝাৱুত্থং ৱা অনজ্ঝাৱুত্থং ৱা’’তি এৱং পুচ্ছিতব্বন্তি অত্থো.

২১৫-৬. মঞ্চপীঠাদিদাৰুভণ্ডঞ্চ (চূড়ৱ. ৩৬০; চূড়ৱ. অট্ঠ. ৩৬০) ৰজনভাজনাদিমত্তিকাভণ্ডঞ্চ. আপুচ্ছাতি ভিক্খুস্স ৱা সামণেৰস্স ৱা আৰামিকস্স ৱা ‘‘আৱুসো ইমং জগ্গাহী’’তি আৰোচেত্ৱাতি অত্থো. অঞ্ঞথাতি এৱং অকত্ৱাতি অত্থো.

২১৭-৮. ৱুড্ঢাগন্তুকস্সাতি এত্থ (চূড়ৱ. ৩৫৮ আদযো; চূড়ৱ. অট্ঠ. ৩৫৯ আদযো) দূৰতোৱ দিস্ৱা যদি ‘‘ৱুড্ঢো’’তি জানাতি, তস্মিং অনাগতে এৱ আসনপঞ্ঞাপনাদিৱত্তং কাতব্বন্তি অত্থো. পাদোদপ্পভুতিন্তি পাদোদকং পাদপীঠং পাদকথলিকং উপনিক্খিপিতব্বন্তি অত্থো. পানীযেন আপুচ্ছন্তেন সচে সকিং আনীতং পানীযং সব্বং পিৱতি, পুনপি আপুচ্ছিতব্বো এৱ. পঞ্ঞপেতি ‘‘এতং তুম্হাকং সেনাসনং পাপুণাতী’’তি এৱং আচিক্খিতব্বন্তি অত্থো.

২১৯-২০. ‘‘ভিক্খাচাৰগামো ইতো দূৰে’’তি ৱা ‘‘সন্তিকে’’তি ৱা ‘‘কালস্সেৱ পিণ্ডায চৰিতব্ব’’ন্তি ৱা ‘‘উপট্ঠাকে চৰিতব্ব’’ন্তি ৱা গোচৰো আচিক্খিতব্বো. অগোচৰোতি মিচ্ছাদিট্ঠিকানং ৱা গামো, পৰিচ্ছিন্নভিক্খকো ৱা গামো, যত্থ একস্স ৱা দ্ৱিন্নং ৱা ভিক্খা দীযতি, সো আচিক্খিতব্বোতি অত্থো. কতিকন্তি সঙ্ঘস্স কতিকট্ঠানং. ‘‘ইমং কালং পৱিসিতব্বং, ইমং কালং নিক্খমিতব্ব’’ন্তি এৱং পৱেসননিক্খমনকালং আচিক্খিতব্বং. কেসুচি ঠানেসু অমনুস্সা ৱা ৱাড়া ৱা হোন্তি, তস্মা এৱং আচিক্খিতব্বমেৱ. নিসিন্নোৱাতি ইদং আপত্তিঅভাৱমত্তদীপকং, উট্ঠহিত্ৱাপি সব্বং কাতুং ৱট্টতেৱ. ৱত্তৱিনিচ্ছযো.

ৱত্তনিদ্দেসৱণ্ণনা নিট্ঠিতা.