২৭. অসংৱাসিকনিদ্দেসৱণ্ণনা

১৯৮. উক্খিত্তোতি আপত্তিযা অদস্সনে, অপ্পটিকম্মে, পাপিকায দিট্ঠিযা অপ্পটিনিস্সগ্গে ৱা উক্খিত্তকোতি তিৱিধোপি ইধ উক্খিত্তো গহিতো. অনুপসম্পন্নোতি ইমিনা সিক্খমানসামণেৰসামণেৰীসিক্খাপচ্চক্খাতকা গহিতাতি ৱেদিতব্বা. ছিন্নমূলকো নাম অন্তিমৱত্থুং অজ্ঝাপন্নকো. নানাসংৱাসোতি লদ্ধিনানাসংৱাসকো. ‘‘নানাসীমায ঠিতচতুত্থো কম্মং কৰেয্য, ইদ্ধিযা ৱেহাসে ঠিতচতুত্থো কম্মং কৰেয্য, অকম্মং ন চ কৰণীয’’ন্তি হি ৱুত্তত্তা ইমেপি ‘‘অসংৱাসিকা’’তি ৱুত্তা. এতেসু পন উক্খিত্তকেহি সদ্ধিং উপোসথাদীনি কৰোন্তো পাচিত্তিযং আপজ্জতি. নিস্সীমট্ঠৱেহাসট্ঠেহি কৰোন্তস্স কম্মং কুপ্পতি, দুক্কটঞ্চ হোতি, ইতৰেহি দুক্কটং. অসংৱাসিকৱিনিচ্ছযো.

অসংৱাসিকনিদ্দেসৱণ্ণনা নিট্ঠিতা.