২৮. কম্মনিদ্দেসৱণ্ণনা

১৯৯. অধম্মকম্মন্তি এত্থ কথং অধম্মকম্মং হোতীতি চে? ৱুত্তঞ্হেতং ভগৱতা ‘‘কতমঞ্চ, ভিক্খৱে, অধম্মকম্মং? ঞত্তিদুতিযে চে, ভিক্খৱে, কম্মে একায ঞত্তিযা কম্মং কৰোতি, ন চ কম্মৱাচং অনুস্সাৱেতি, অধম্মকম্মং. দ্ৱীহি ঞত্তীহি কম্মং কৰোতি, ন চ কম্মৱাচং অনুস্সাৱেতি, অধম্মকম্মং. একায কম্মৱাচায কম্মং কৰোতি, ন চ ঞত্তিং ঠপেতি, অধম্মকম্মং. দ্ৱীহি কম্মৱাচাহি কম্মং কৰোতি, ন চ ঞত্তিং ঠপেতি, অধম্মকম্ম’’ন্তি (মহাৱ. ৩৮৭). ইমিনা নযেন সেসকম্মেসুপি ৱুত্তপ্পকাৰেন অকত্ৱা অঞ্ঞথা কৰণং অধম্মকম্মন্তি ৱেদিতব্বং.

ৱগ্গেনাতি ৱগ্গেন সঙ্ঘেন. কথঞ্চ ৱগ্গং হোতীতি চে? যাৱতিকা চ ভিক্খূ কম্মপ্পত্তা, তে অনাগতা হোন্তি, ছন্দাৰহানং ছন্দো অনাহটো হোতি, সম্মুখীভূতা পটিক্কোসন্তি, ৱগ্গকম্মন্তি ইমেসু যেন কেনচি একেনপি অঙ্গেন ৱগ্গং হোতি.

সমগ্গেনাতি সমগ্গেন সঙ্ঘেন. কথং সমগ্গং হোতীতি চে? যাৱতিকা চ ভিক্খূ কম্মপ্পত্তা, তে আগতা হোন্তি, ছন্দাৰহানং ছন্দো আহটো হোতি, সম্মুখীভূতা নপ্পটিক্কোসন্তি, সমগ্গকম্মন্তি এৱং.

চতুত্থন্তি সমগ্গেন ধম্মিকং. এত্তাৱতা ‘‘চত্তাৰিমানি, ভিক্খৱে, কম্মানি, অধম্মেন ৱগ্গকম্মং, অধম্মেন সমগ্গকম্মং, ধম্মেন ৱগ্গকম্মং, ধম্মেন সমগ্গকম্ম’’ন্তি (মহাৱ. ৩৮৪) এৱং ৱুত্তানি চত্তাৰি কম্মানি পৰিগ্গহিতানি হোন্তীতি ৱেদিতব্বানি.

২০০-২০২. দসৱগ্গিকো (মহাৱ. ৩৮৮; কঙ্খা. অট্ঠ. নিদানৱণ্ণনা) ৱীসতিৱগ্গিকো চ দসৱীসতিৱগ্গিকো. অব্ভানোপসম্পদাপ্পৱাৰণা ঠপেত্ৱা সব্বকম্মেসু কম্মপ্পত্তোতি সম্বন্ধো. এৱং সেসেসুপি. ইতৰোতি ৱীসতিৱগ্গো চ অতিৰেকৱীসতিৱগ্গো চ.

২০৩. ইদানি কম্মপ্পত্তে চ ছন্দাৰহে চ দস্সেতুং ‘‘চতুৱগ্গেনা’’তিআদি ৱুত্তং. তত্থ (পৰি. ৪৮৮, ৪৯৭; পৰি. ৪৮৭-৪৮৮) পকতত্তা নাম যে পাৰাজিকউক্খিত্তলদ্ধিনানাসংৱাসকা ন হোন্তি. পৰেতি একসীমট্ঠা পকতত্তা ভিক্খূ. যদি পকতত্তা ভিক্খূপি অঞ্ঞতৰং গামসীমং ৱা নদীসমুদ্দজাতস্সৰখণ্ডসীমাসু ৱা অঞ্ঞতৰং পৱিসিত্ৱা ঠিতা হোন্তি, নেৱ কম্মপ্পত্তা, ন ছন্দাৰহা. ন হি তেসং ছন্দো ৱা পাৰিসুদ্ধি ৱা আগচ্ছতি অঞ্ঞসীমাযং ঠিতত্তা. সেসেপীতি পঞ্চৱগ্গাদিকৰণীযেপীতি অত্থো.

২০৪. অসংৱাসগণপূৰং ৱা কত্ৱা কতং কম্মং কুপ্পঞ্চ হোতি, কাৰকানঞ্চ দুক্কটন্তি অত্থো. ‘‘যস্স সঙ্ঘো কম্মং কৰোতি, তংচতুত্থো কম্মং কৰেয্য, অকম্মং ন চ কৰণীয’’ন্তি (মহাৱ. ৩৮৯) ৱুত্তত্তা ‘‘কম্মাৰহগণপূৰং ৱা’’তি ৱুত্তং. ইদানি পৰিৱাসাদিকম্মানংযেৱ পৰিসতো ৱিপত্তিং দস্সেতুং ‘‘গৰুকট্ঠগণপূৰং ৱা’’তি ৱুত্তং. তম্পি অনিক্খিত্তৱত্তং সন্ধায ৱুত্তং. নিক্খিত্তৱত্তো পন সব্বত্থ গণপূৰকো হোতি এৱ.

২০৫. ৱাৰেয্যাতি পটিক্খিপেয্য. ‘‘অনুজানামি, ভিক্খৱে, অধম্মকম্মে কযিৰমানে পটিক্কোসিতু’’ন্তি (মহাৱ. ১৫৪) হি ৱুত্তং. অন্তৰাযে সতীতি অত্থো. ‘‘অধম্মকম্মং ইদং, ন মেতং খমতী’’তি এৱং দ্ৱে তযো অঞ্ঞমঞ্ঞং দিট্ঠিং আৱি কৰেয্যুন্তি অত্থো. যদি একো হোতি, ‘‘ন মেতং খমতী’’তি এৱং অধিট্ঠানং কৰেয্যাতি অত্থো. এত্তাৱতা এতে নিৰাপত্তিকা হোন্তি, অন্তৰাযা চ মুচ্চন্তি, কম্মং পন অধম্মত্তা কুপ্পমেৱ. ৱাৰেন্তেৱ ততোধিকাতি এত্থ ‘‘অনুজানামি, ভিক্খৱে, চতূহি পঞ্চহি পটিক্কোসিতুং, দ্ৱীহি তীহি দিট্ঠিং আৱি কাতুং, একেন অধিট্ঠাতুং, ‘‘ন মেতং খমতী’’তি (মহাৱ. ১৫৪) ৱুত্তত্তা চত্তাৰো ৱা পঞ্চ ৱা ৱাৰেন্তি এৱাতি অত্থো.

২০৬. ইদানি যেহি পটিক্খিত্তং হোতি, তে দস্সেতুং ‘‘কম্মাৰহা’’তিআদি ৱুত্তং. তত্থ খিত্তচিত্ত-গ্গহণেন উম্মত্তকোপি গহিতোৱ. এতেসন্তি যে ৱুত্তপ্পকাৰা, তেসং পটিক্খেপো ন ৰুহতীতি অত্থো.

২০৭. ইদানি যস্স পটিক্খেপো ৰুহতি, তং দস্সেতুং ‘‘পকতত্তেকসীমট্ঠ-সমসংৱাসভিক্খুনো’’তি ৱুত্তং. তস্সত্থো (মহাৱ. ৩৯৪) – এৱৰূপস্স ভিক্খুনো পটিক্কোসনা অন্তমসো আনন্তৰস্সাপি আৰোচেন্তস্স ৰুহতীতি. ‘‘ভিক্খুস্স, ভিক্খৱে, পকতত্তস্স সমানসংৱাসিকস্স সমানসীমাযং ঠিতস্স অন্তমসো আনন্তৰিকস্সপি ভিক্খুনো ৱিঞ্ঞাপেন্তস্স সঙ্ঘমজ্ঝে পটিক্কোসনা ৰুহতী’’তি (মহাৱ. ৩৯৪) ৱুত্তং.

২০৮. সম্মুখা যদি পটিক্কোসেয্যাতি অত্থো. তিৰোক্খাতি পৰম্মুখা. কাযসামগ্গিং ৱা ছন্দং ৱা নো দদেয্য, দুক্কটন্তি অত্থো. কম্মৱিনিচ্ছযো.

কম্মনিদ্দেসৱণ্ণনা নিট্ঠিতা.