২৬. সমানাসনিকনিদ্দেসৱণ্ণনা

১৯৫. তিণ্ণং ৱস্সানং অন্তৰং তিৱস্সন্তৰং. ‘‘অনুজানামি, ভিক্খৱে, তিৱস্সন্তৰেন সহ নিসীদিতু’’ন্তি (চূড়ৱ. ৩২০) হি ৱুত্তং. যো দ্ৱীহি ৱস্সেহি (চূড়ৱ. অট্ঠ. ৩২০) ৱুড্ঢো ৱা নৱো ৱা, সো তিৱস্সন্তৰো নাম.

১৯৬. মুনীতি বুদ্ধমুনি. সব্বেহেৱাতি অনুপসম্পন্নেহিপি.

১৯৭. অন্তন্তি পচ্ছিমং. ‘‘অনুজানামি, ভিক্খৱে, যং তিণ্ণং পহোতি, এত্তকং পচ্ছিমং দীঘাসন’’ন্তি (চূড়ৱ. ৩২০) ৱুত্তত্তা যং তিণ্ণং পহোতি, এতং সংহাৰিমং ৱা হোতু অসংহাৰিমং ৱা, তথাৰূপেসু ফলকখণ্ডেসুপি নিসীদিতুং ৱট্টতি. দ্ৱিন্নন্তি দ্ৱিন্নং সমানাসনিকানং. ‘‘অনুজানামি, ভিক্খৱে, দুৱগ্গস্স মঞ্চং দুৱগ্গস্স পীঠ’’ন্তি (চুড়ৱ. ৩২০) ৱুত্তত্তা দ্ৱে সমানাসনিকা সহ নিসীদিতুং লভন্তি. অঞ্ঞেহি অসমানাসনিকেহি, অনুপসম্পন্নাদীহি ৱা দ্ৱে হুত্ৱাপি নিসীদিতুং ন লভন্তি. সমানাসনিকৱিনিচ্ছযো.

সমানাসনিকনিদ্দেসৱণ্ণনা নিট্ঠিতা.