২৫. অকপ্পিযসযননিদ্দেসৱণ্ণনা

১৮৭-৯. ‘‘উচ্চকো আসন্দিকো উপ্পন্নো হোতি, অনুজানামি ভিক্খৱে উচ্চকম্পি আসন্দিক’’ন্তি (চূড়ৱ. ২৯৭) ৱচনতো মঞ্চস্স উপড্ঢভাগপ্পমাণেন একতোভাগেন দীঘম্পি সুগতঙ্গুলেন অতিৰেকট্ঠঙ্গুলপাদকং ইধ আসন্দীতি অধিপ্পেতং, চতুৰংসাসন্দিকো পন পমাণাতিক্কন্তকোপি ৱট্টতি. তূলীতি পকতিতূলিকা. পল্লঙ্কোনাম আহৰিমেহি ৱাড়েহি কতোতি ৱুত্তো. তত্থেৱ ‘‘সীহৰূপাদিং দস্সেত্ৱা কতো পন ৱট্টতী’’তি ৱদন্তি. পটিকন্তি সেতত্থৰণং. গোনচিত্তকন্তি এত্থ চতুৰঙ্গুলাধিকলোমো কোজৱো ‘‘গোনকো’’তি ৱুচ্চতি. ‘‘অনুজানামি, ভিক্খৱে, কোজৱ’’ন্তি (মহাৱ. ৩৩৭) চীৱৰক্খন্ধকে ৱুত্তত্তা চতুৰঙ্গুললোমকং পকতিকোজৱং ৱট্টতি. ৰতনচিত্তং চিত্তকং ন ৱট্টতি. পটলীতি ঘনপুপ্ফৰত্তঅত্থৰণং. ৱিকতীতি সীহব্যগ্ঘাদিৰূপৱিচিত্তো উণ্ণামযত্থৰণকো. উদ্দলোমীতি একতোউগ্গতপুপ্ফং. একন্তলোমিকাতি উভতোউগ্গতপুপ্ফং.

কুত্তন্তি সোড়সন্নং নাটকিত্থীনং ঠত্ৱা নচ্চনযোগ্গং উণ্ণামযত্থৰণং. কোসেয্যন্তি ৰতনপৰিসিব্বিতং কোসেয্যসুত্তমযং পচ্চত্থৰণং. কট্টিস্সন্তি ৰতনপৰিসিব্বিতং কোসেয্যকট্টিস্সমযং পচ্চত্থৰণং. কোসেয্যঞ্চ কট্টিস্সঞ্চ ৰতনপৰিসিব্বিতানেৱ ন ৱট্টন্তি, সুদ্ধানি ৱট্টন্তি. হত্থিঅস্সৰথত্থৰা তেসং উপৰি অত্থৰণকঅত্থৰণাৱ. অজিনপ্পৱেণীতি অজিনচম্মেহি মঞ্চপ্পমাণেন সিব্বিত্ৱা কতা পৱেণী, তেন চ কদলীমিগচম্মং সেতৱত্থস্স উপৰি পত্থৰিত্ৱা সিব্বিত্ৱা কতং পৱৰপ্পচ্চত্থৰণং কদলীমিগপ্পৱৰপ্পচ্চত্থৰণং, তেন চ অত্থতং অজিনপ্পৱেণীকদলীমিগপ্পৱৰপ্পচ্চত্থৰণত্থতং.

সেতৱিতানম্পি হেট্ঠা অকপ্পিযপ্পচ্চত্থৰণে সতি ন ৱট্টতি, কপ্পিযপ্পচ্চত্থৰণে সতি ৱট্টতি, ৰত্তৱিতানস্স হেট্ঠা কপ্পিযপ্পচ্চত্থৰণে সতিপি ন ৱট্টতি এৱ. সীসূপধানং পাদূপধানন্তি মঞ্চস্স উভতোলোহিতকং উপধানং ন ৱট্টতি. যং পন একমেৱ উপধানং হোতি, উভোসু অন্তেসু ৰত্তং ৱা পদুমৱণ্ণং ৱা চিত্তং ৱা, সচে পমাণযুত্তং, ৱট্টতি, মহাউপধানং পন পটিক্খিত্তং.

১৯০. আসন্দাদিত্তযাতি আসন্দী তূলী পল্লঙ্কোতি ইদং তযং নামং. ‘‘অনুজানামি, ভিক্খৱে, ঠপেত্ৱা তীণি আসন্দিং পল্লঙ্কং তূলিকং সেসকং গিহিৱিকটং অভিনিসীদিতুং, ন ত্ৱেৱ অভিনিপজ্জিতু’’ন্তি (চূড়ৱ. ৩১৪) হি ৱুত্তং. সেসে গিহিসন্তকে নিসীদিতুং লব্ভতীতি অত্থো. যদি ধম্মাসনে সঙ্ঘিকম্পি গোনকাদিং ভিক্খূহি অনাণত্তা আৰামিকাদযো সযমেৱ পঞ্ঞপেন্তি চেৱ নীহৰন্তি চ, এতং গিহিৱিকটনীহাৰং নাম, ইমিনা গিহিৱিকটনীহাৰেন ৱট্টতি. ভত্তগ্গং নাম ৱিহাৰে এৱ দানট্ঠানং.

১৯১. চতুন্নং পাদানং, তীসু পস্সেসু অপস্সযানঞ্চ ৱসেন সত্তঙ্গো. একপস্সেন যুত্তো পঞ্চঙ্গো. ইমে পন সত্তঙ্গপঞ্চঙ্গা ‘‘অনুজানামি, ভিক্খৱে, উচ্চকম্পি সত্তঙ্গ’’ন্তি (চূড়ৱ. ২৯৪) ৱুত্তত্তা পমাণাতিক্কন্তাপি ৱট্টন্তি. তেন ৱুত্তং ‘‘উচ্চপাদকা’’তি. তূলোনদ্ধা মঞ্চপীঠা ঘৰেযেৱ নিসীদিতুং কপ্পন্তীতি সম্বন্ধো.

১৯২. চীৱৰচ্ছৱিযোতি ছন্নং চীৱৰানং, ছন্নং অনুলোমচীৱৰানঞ্চ অঞ্ঞতৰচীৱৰচ্ছৱিযোতি অত্থো. সব্বত্থাতি মঞ্চেপি পীঠেপি ভত্তগ্গেপি অন্তৰঘৰেপীতি অত্থো. ইমাসং পন ভিসীনং পমাণপৰিচ্ছেদোপি নত্থি, মঞ্চপীঠাদীনং ৱসেন অনুৰূপং সল্লক্খেত্ৱা পমাণং কাতব্বং.

১৯৩. ‘‘তূলিকা উপ্পন্না হোতি. অনুজানামি, ভিক্খৱে, ৱিজটেত্ৱা বিম্বোহনং কাতুং, তীণি তূলানি ৰুক্খতূলং লতাতূলং পোটকিতূল’’ন্তি (চূড়ৱ. ২৯৭) ৱুত্তত্তা তূলত্তযঞ্চ (চূড়ৱ. অট্ঠ. ২৯৭; কঙ্খা. অট্ঠ. তূলোনন্দসিক্খাপদৱণ্ণনা) বিম্বোহনে ৱট্টতি. ইমেহি তীহি তূলেহি সব্বেসং ৰুক্খলতাতিণানং তূলং অনুঞ্ঞাতন্তি ৱেদিতব্বং. ভিসিযং পন কিঞ্চি তূলং ন ৱট্টতিযেৱ. ভিসিগব্ভোতি ভিসিযা ৱুত্তং চোড়াদিপঞ্চকং বিম্বোহনে অনুঞ্ঞাতন্তি সম্বন্ধো. মিগপক্খিনন্তি সীহাদীনং সব্বচতুপ্পদানং হংসমোৰাদীনং সব্বপক্খীনং লোমানি কপ্পন্তি. মসূৰকে অনুঞ্ঞাতন্তি সম্বন্ধো.

১৯৪. ইদানি ভিসিযং কপ্পিযাকপ্পিযং দস্সেতুং ‘‘মনুস্সলোম’’ন্তিআদিমাহ. উণ্ণাযন্তি (চূড়ৱ. ২৯৭; চূড়ৱ. অট্ঠ. ২৯৭) উণ্ণাভিসিযং মনুস্সলোমং ন লব্ভতীতি অত্থো. উণ্ণাভিসিযম্পি মনুস্সলোমং ঠপেত্ৱা যেসং কেসঞ্চি পক্খিচতুপ্পদানং লোমং ৱট্টতীতি অত্থো. পণ্ণেতি পণ্ণভিসিযঞ্চ পুপ্ফঞ্চ সুদ্ধং তমালপত্তঞ্চ ন লব্ভং, অৱসেসং যং কিঞ্চি পণ্ণং লব্ভতীতি অত্থো. তমালপত্তকম্পি অঞ্ঞেহি মিস্সং ৱট্টতীতি. চোড়ৱাকতিণেসু অকপ্পিযং নাম নত্থি. আসনঞ্চেৱ অপ্পটিৱেক্খিতং ন লব্ভন্তি আসনসামঞ্ঞতো পসঙ্গেন ৱুত্তং. অকপ্পিযসযনৱিনিচ্ছযো.

অকপ্পিযসযননিদ্দেসৱণ্ণনা নিট্ঠিতা.