২৪. অঞ্জনীনিদ্দেসৱণ্ণনা

১৮২. ৱট্টা ৱা অট্ঠসোড়সংসা ৱা মট্ঠা পুপ্ফলতাদীহি অচিত্তকা অঞ্জনী ৱট্টতীতি অত্থো. তিস্সোপি ৱট্টন্তি, একায ৱা দ্ৱীসু ৱা কথা এৱ নত্থীতি অধিপ্পাযো. লেখাতি ৱট্টলেখা. বন্ধিতুন্তি পিধানকবন্ধনত্থং.

১৮৩. ৰূপন্তি সকুণৰূপাদি. যদি চ এদিসং অঞ্ঞেহি কতং লভতি, ঘংসিত্ৱা ৱা ছিন্দিত্ৱা ৱা যথা ৱা ন পঞ্ঞাযতি, তথা সুত্তেন ৱেঠেত্ৱা ৱড়ঞ্জেতব্বং.

১৮৪. থৱিকাতি অঞ্জনিথৱিকা. অঞ্জনিসলাকাপি লব্ভতীতি সম্বন্ধো.

১৮৫-৬. অট্ঠীতি (মহাৱ. ২৬৬; মহাৱ. অট্ঠ. ২৬৪) মনুস্সট্ঠিং ঠপেত্ৱা অৱসেসট্ঠি. ৱিসাণদন্তেসু অকপ্পিযং নাম নত্থি. আমলককক্কাদীহি কতা ফলমযা. তম্মযাতি ইধ ৱুত্তেহেৱ নিব্বত্তা. অঞ্জনীৱিনিচ্ছযো.

অঞ্জনীনিদ্দেসৱণ্ণনা নিট্ঠিতা.