১৬. ৱচ্চপ্পস্সাৱট্ঠানিকনিদ্দেসৱণ্ণনা

১৫৬. যথাৱুড্ঢং ন কৰেয্য ৱচ্চন্তি সম্বন্ধো. যথানুপুব্বিযা লব্ভতীতি সম্বন্ধো. ইমেসু পন তীসু ঠানেসু যো যো পঠমং আগচ্ছতি ৱুড্ঢো ৱা নৱো ৱা, সো সো আগতপটিপাটিযা কাতুঞ্চ নহাযিতুঞ্চ লব্ভতীতি অধিপ্পাযো.

১৫৭. উব্ভজিত্ৱাতি (চূড়ৱ. ৩৭৩, ৩৭৪) নিৱাসনং দূৰতোৱ উক্খিপিত্ৱা নো পৱিসেয্য. সহসা চ নো পৱিসেয্যাতি সম্বন্ধো. ‘‘বহি ঠিতেন উক্কাসিতব্ব’’ন্তি চ ‘‘সাধুকং অতৰমানেন ৱচ্চকুটি পৱিসিতব্বা’’তি চ ৱুত্তত্তা উক্কাসিত্ৱাৱ অতৰমানো পৱিসেয্যাতি অত্থো. ‘‘ন উব্ভজিত্ৱা পৱিসিতব্বা, ৱচ্চপাদুকায ঠিতেন উব্ভজিতব্ব’’ন্তি (চূড়ৱ. ৩৭৪) ৱচনতো ‘‘উব্ভজেয্য পাদুকাস্ৱেৱ সণ্ঠিতো’’তি ৱুত্তং.

১৫৮. ন কৰেয্য উভযং ন কৰেয্যুভযং.

১৫৯. কূপেতি (চূড়ৱ. ৩৭৪) ৱচ্চকূপে. কট্ঠন্তি অৱলেখনকট্ঠং. পস্সাৱদোণিযা খেড়ং ন কাতব্বন্তি অত্থো. নাৱলেখেয্য ফৰুসেনাতি ফালিতকট্ঠেন ৱা খৰেন ৱা গণ্ঠিকেন ৱা কণ্টকেন ৱা সুসিৰেন ৱা পূতিনা ৱা নাৱলেখিতব্বন্তি অত্থো. উহতঞ্চাপীতি গূথমক্খিতম্পি ধোৱযে অত্তনা ৱা পৰেন ৱা কতন্তি অধিপ্পাযো.

১৬০. উব্ভজিত্ৱা ন নিক্খমেতি এত্থ ‘‘ৱচ্চপাদুকায ঠিতেন পটিচ্ছাদেতব্ব’’ন্তি (চূড়ৱ. ৩৭৪) হি ৱুত্তং, পুন ‘‘আচমনপাদুকাযং ঠিতেন উব্ভজিতব্ব’’ন্তি (চূড়ৱ. ৩৭৪) চ ৱুত্তং. ‘‘চপু চপূ’’তি সদ্দং কত্ৱা নাচমেয্যাতি অত্থো. ৱচ্চপ্পস্সাৱট্ঠানিকৱিনিচ্ছযো.

ৱচ্চপ্পস্সাৱট্ঠানিকনিদ্দেসৱণ্ণনা নিট্ঠিতা.