১৫. উপজ্ঝাচৰিযৱত্তনিদ্দেসৱণ্ণনা

১৪৫. উপজ্ঝাচৰিযেতি এত্থ (মহাৱ. ৬৪, ৬৭, ৭৪, ৭৮-৭৯; চূড়ৱ. ৩৭৫, ৩৭৭; ৩৭৯-৩৮২; মহাৱ. অট্ঠ. ৬৪, ৬৭, ৭৫, ৭৬, ৭৭) আচৰিযো নাম নিস্সযাচৰিযো পব্বজ্জাচৰিযো উপসম্পদাচৰিযো ধম্মাচৰিযোতি চতুব্বিধো. এতেসু হি নিস্সযন্তেৱাসিকেন যাৱ আচৰিযং নিস্সায ৱসতি, তাৱ সব্বমাচৰিযৱত্তং কাতব্বং. পব্বজ্জাউপসম্পদাধম্মন্তেৱাসিকেহি পন নিস্সযমুত্তকেহিপি আদিতো পট্ঠায যাৱ চীৱৰৰজনং, তাৱ ৱত্তং কাতব্বং. অনাপুচ্ছিত্ৱা পত্তদানাদিম্হি পন এতেসং অনাপত্তি. এতেসু চ পব্বজ্জন্তেৱাসিকো চ উপসম্পদন্তেৱাসিকো চ আচৰিযস্স যাৱজীৱং ভাৰো, নিস্সযন্তেৱাসিকো চ ধম্মন্তেৱাসিকো চ যাৱ সমীপে ৱসতি, তাৱদেৱ. সুট্ঠু পিযসীলো সুপেসলো, সিক্খাকামোতি অত্থো. দন্তকট্ঠং দেন্তেন একংসং উত্তৰাসঙ্গং কৰিত্ৱা মহন্তং মজ্ঝিমং খুদ্দকন্তি তীণি দন্তকট্ঠানি উপনেতব্বানি. তেসু যং তীণি দিৱসানি গণ্হাতি, তং সল্লক্খেত্ৱা চতুত্থদিৱসতো পট্ঠায তাদিসংযেৱ সম্মা উভোহি হত্থেহি দাতব্বং. সচে যং ৱা তং ৱা গণ্হাতি, যথালদ্ধং উপনেতব্বং. তোযন্তি সীতঞ্চ উণ্হঞ্চ উদকং উপনেত্ৱা যং তীণি দিৱসানি ৱড়ঞ্জেতি, চতুত্থদিৱসতো পট্ঠায তাদিসং উপনেতব্বং. সচে দ্ৱেপি ৱড়ঞ্জেতি, দুৱিধম্পি উপনেতব্বং. সচে যাগু হোতি, ভাজনং ধোৱিত্ৱা উপনেতব্বং.

১৪৬. পত্তে ৱত্তং চৰেতি ‘‘যাগুং পীতস্স উদকং দত্ৱা ভাজনং পটিগ্গহেত্ৱা নীচং কত্ৱা সাধুকং অপৰিঘংসন্তেন ধোৱিত্ৱা পটিসামেতব্ব’’ন্তি (মহাৱ. ৬৬, ৭৮; চূড়ৱ. ৩৭৬, ৩৮০) ৱুত্তং পত্তে ৱত্তং চৰেতি অত্থো. গামপ্পৱেসে ৱত্তং চৰেতি এৱং সব্বত্থ. ‘‘সচে উপজ্ঝাযো ৱা আচৰিযো ৱা গামং পৱিসিতুকামো হোতি, নিৱাসনং দাতব্বং, পটিনিৱাসনং পটিগ্গহেতব্বং, কাযবন্ধনং দাতব্বং, সগুণং কত্ৱা সঙ্ঘাটিযো দাতব্বা, ধোৱিত্ৱা পত্তো সোদকো দাতব্বো’’তি (মহাৱ. ৬৬, ৭৮; চূড়ৱ. ৩৭৬, ৩৮০) ইদং গামপ্পৱেসনে ৱত্তং নাম. ‘‘সচে উপজ্ঝাযো ৱা আচৰিযো ৱা পচ্ছাসমণং আকঙ্খতি, তিমণ্ডলং পটিচ্ছাদেন্তেন পৰিমণ্ডলং নিৱাসেত্ৱা কাযবন্ধনং বন্ধিত্ৱা সগুণং কত্ৱা সঙ্ঘাটিযো পাৰুপিত্ৱা গণ্ঠিকং পটিমুঞ্চিত্ৱা ধোৱিত্ৱা পত্তং গহেত্ৱা উপজ্ঝাযস্স ৱা আচৰিযস্স ৱা পচ্ছাসমণেন হোতব্ব’’ন্তিআদিনা (মহাৱ. ৬৬, ৭৮; চূড়ৱ. ৩৭৬, ৩৮০) নযেন ৱুত্তং গমনে ৱত্তং নাম. ‘‘নিৱত্তন্তেন পঠমতৰং আগন্ত্ৱা আসনং পঞ্ঞাপেতব্ব’’ন্তিআদিনা (মহাৱ. ৬৬, ৭৮; চূড়ৱ. ৩৭৬, ৩৮০) নযেন ৱুত্তং আগমে ৱত্তং নাম. ‘‘উপজ্ঝাযম্হি ৱুট্ঠিতে আসনং উদ্ধৰিতব্বং, পাদোদকং পাদপীঠং পাদকথলিকং পটিসামেতব্ব’’ন্তি (মহাৱ. ৬৬, ৭৮; চূড়ৱ. ৩৭৬, ৩৮০) এৱং ৱুত্তং আসনাদীসু ৱত্তং নাম. উপাহনায ৱত্তং নাম ‘‘উপাহনা পুঞ্ছিতব্বা, উপাহনা পুঞ্ছন্তেন পঠমং সুক্খেন চোড়কেন পুঞ্ছিতব্বা, পচ্ছা অল্লেনা’’তিআদিনা (চূড়ৱ. ৩৫৭, ৩৫৯) ৱুত্তং. চীৱৰে ৱত্তং নাম ‘‘সচে চীৱৰং সিন্নং হোতি, মুহুত্তং উণ্হে ওতাপেতব্বং, ন চ উণ্হে চীৱৰং নিদহিতব্ব’’ন্তিআদিনা (মহাৱ. ৬৬, ৭৮; চূড়ৱ. ৩৭৬, ৩৮০) ৱুত্তং.

১৪৭. পৰিভোজনীযপানীয-ৱচ্চপ্পস্সাৱঠানিসূতি এত্থ সচে পানীযং ন হোতি, পানীযং উপট্ঠাপেতব্বং. সচে পৰিভোজনীযং ন হোতি, পৰিভোজনীযং উপট্ঠাপেতব্বং. সচে ৱচ্চকুটি উক্লাপা হোতি, ৱচ্চকুটি সম্মজ্জিতব্বা. তথা পস্সাৱট্ঠানে এৱং ৱত্তং চৰিতব্বন্তি অত্থো. ‘‘ৱিহাৰং সোধেন্তেন পঠমং পত্তচীৱৰং নীহৰিত্ৱা একমন্তং নিক্খিপিতব্ব’’ন্তিআদিনা নযেন ৱুত্তং ৱিহাৰসোধনে ৱত্তং নাম. ‘‘ভূমত্থৰণং ওতাপেত্ৱা সোধেত্ৱা পপ্ফোটেত্ৱা অতিহৰিত্ৱা যথাপঞ্ঞত্তং পঞ্ঞাপেতব্ব’’ন্তিআদিনা (মহাৱ. ৬৬, ৭৮; চূড়ৱ. ৩৭৬, ৩৮০) ৱুত্তং পুন পঞ্ঞাপনে ৱত্তং নাম.

১৪৮. ইদানি ৱিহাৰং সোধেন্তেন এৱং সোধেতব্বন্তি তং দস্সেতুং ‘‘ন পপ্ফোটেয্যা’’তিআদিমাহ. তস্সত্থো – ৱিহাৰং সোধেন্তো ভিক্খু ভূমত্থৰণাদিসযনাসনং পটিৱাতে ৱা পঙ্গণে ৱা পানীযসামন্তা ৱা ন পপ্ফোটেয্যাতি. পঙ্গণেতি বহূনং সন্নিপাতে ঠানে.

১৪৯. ন্হানেতি ‘‘সচে উপজ্ঝাযো নহাযিতুকামো হোতি, নহানং পটিযাদেতব্বং. সচে সীতেন অত্থো হোতি, সীতং পটিযাদেতব্ব’’ন্তিআদিনা (মহাৱ. ৬৬; চূড়ৱ. ৩৭৬) ৱুত্তং নহানে ৱত্তং নাম, ‘‘উপজ্ঝাযস্স গত্ততো উদকং সম্মজ্জিতব্বং, নিৱাসনং দাতব্ব’’ন্তিআদিনা (মহাৱ. ৬৬; চূড়ৱ. ৩৭৬) ৱুত্তং নহাতস্স কাতব্বং নাম. ৰঙ্গপাকেতি ‘‘সচে উপজ্ঝাযস্স আচৰিযস্স ৰজনং পচিতব্বং হোতি, সদ্ধিৱিহাৰিকেন অন্তেৱাসিকেন পচিতব্ব’’ন্তি (মহাৱ. ৬৬, ৭৮; চূড়ৱ. ৩৭৬, ৩৮০) ৱুত্তং. ধোৱনেতি ‘‘সচে উপজ্ঝাযস্স আচৰিযস্স চীৱৰং ধোৱিতব্বং হোতি, সদ্ধিৱিহাৰিকেন অন্তেৱাসিকেন ধোৱিতব্বং, উস্সুক্কং ৱা কাতব্ব’’ন্তি (মহাৱ. ৬৬, ৭৮; চূড়ৱ. ৩৭৬, ৩৮০) ৱুত্তং. সিব্বনেতি ‘‘সচে উপজ্ঝাযেন আচৰিযেন চীৱৰং কাতব্বং হোতি, সদ্ধিৱিহাৰিকেন অন্তেৱাসিকেন কাতব্ব’’ন্তি (মহাৱ. ৬৬, ৭৮; চূড়ৱ. ৩৭৬, ৩৮০) ৱুত্তং. চীৱৰে থেৱে ঠিতে ৰজন্তো ন ৱজে ন পক্কমেয্যাতি অত্থো. ‘‘চীৱৰং ৰজন্তেন সাধুকং সম্পৰিৱত্তকং সম্পৰিৱত্তকং ৰজিতব্বং, ন চ অচ্ছিন্নে থেৱে পক্কমিতব্ব’’ন্তি (মহাৱ. ৬৬, ৭৮; চূড়ৱ. ৩৭৬, ৩৮০) হি ৱুত্তং.

১৫০. একচ্চস্সাতি আচৰিযুপজ্ঝাযানং ৱিসভাগস্স অনত্থকামস্স ৱেৰিপুগ্গলস্স. অনাপুচ্ছাতি আচৰিযুপজ্ঝাযানং অনাৰোচেত্ৱা. কিঞ্চনন্তি যং কিঞ্চি.

১৫১-২. তস্সাতি একচ্চস্স. নিন্নেতুন্তি নীহৰিতুং. কিচ্চযং পৰিকম্মং ৱাতি ৱেয্যাৱচ্চং ৱা পিট্ঠিপৰিকম্মাদিপৰিকম্মং ৱা অত্তনা তস্স কাতুং ৱা তেন অত্তনো কাৰাপেতুং ৱাতি এৱমত্থো ৱেদিতব্বো.

১৫৩. সচে আচৰিযুপজ্ঝাযা অঞ্ঞত্থ গতা হোন্তি, পৰিৱেণং গন্ত্ৱা অপস্সন্তেহি গামং পৱিসিতুং ৱট্টতি. গামং পৱিসন্তো সচে পস্সতি, আপুচ্ছিতব্বমেৱাতি ৱদন্তি. ‘‘উপজ্ঝাযং অনাপুচ্ছা ন দিসা পক্কমিতব্বা’’তি (মহাৱ. ৬৬, চূড়ৱ. ৩৭৬) হি ৱুত্তং. অত্তনো কিচ্চযং নাম অন্তোৱিহাৰেপি অত্তনো পত্তপচনচীৱৰকম্মকেসচ্ছেদনাদি.

১৫৪. সঙ্ঘাযত্তকম্মানি নাম পৰিৱাসমানত্তঅব্ভানতজ্জনীযনিযস্সপব্বাজনীযপটিসাৰণীযউক্খেপনাদযো.

১৫৫. ৱুট্ঠানং নেসমাগমেতি ‘‘সচে উপজ্ঝাযো ৱা আচৰিযো ৱা গিলানো হোতি, যাৱজীৱং উপট্ঠাতব্বো, ৱুট্ঠানমস্স আগমেতব্ব’’ন্তি (মহাৱ. ৬৬; চূড়ৱ. ৩৭৬) হি ৱুত্তং. উপজ্ঝাচৰিযৱত্তৱিনিচ্ছযো.

উপজ্ঝাচৰিযৱত্তনিদ্দেসৱণ্ণনা নিট্ঠিতা.