১৪. ভূমিনিদ্দেসৱণ্ণনা

১৩৬. ইদানি ‘‘অনুজানামি, ভিক্খৱে, চতস্সো কপ্পিযভূমিযো উস্সাৱনন্তিকং গোনিসাদিকং গহপতিং সম্মুতি’’ন্তি (মহাৱ. ২৯৫) এৱং ৱুত্তা চতস্সো কপ্পিযভূমিযো দস্সেতুং ‘‘সম্মুতুস্সাৱনন্তা চা’’তিআদিমাহ. যাসূতি কপ্পিযভূমীসু (কঙ্খা. অট্ঠ. সন্নিধিকাৰকসিক্খাপদৱণ্ণনা).

১৩৭. ইদানি যত্থ কপ্পিযকুটি ইচ্ছিতব্বা, তং দস্সেতুং ‘‘ৱাসত্থাযা’’তিআদিমাহ. ৱাসত্থাযাতি ইমিনা কোট্ঠাগাৰভত্তসালাচেতিযঘৰসম্মুঞ্জনীমাড়কাদি যং যং অঞ্ঞম্পি ৱাসত্থায কৰীযতি, তত্থ তত্থ কপ্পিযকুটিকৰণকিচ্চং নত্থীতি দীপিতং হোতি. ভোজনসালা পন সেনাসনমেৱ, তস্মা তত্থ কাতব্বা এৱাতি ৱদন্তি. সঙ্ঘিকেৱেকসন্তকেতি এত্থ একসন্তকো উপসম্পন্নসন্তকোৱ ৱেদিতব্বো.

১৩৮. ইদানি কত্তব্বাকাৰং দস্সেতুং ‘‘গেহে’’তিআদিমাহ. তত্থ সঙ্ঘস্স ৱা একস্স ৱা গেহে ৱিহাৰে কৰিযমানে এৱং ঈৰযং ‘‘কপ্পিযকুটিং কৰোম, কপ্পিযকুটিং কৰোমা’’তি ৱা ‘‘কপ্পিযকুটি কপ্পিযকুটী’’তি ৱা ৱদন্তো পঠমিট্ঠকত্থম্ভাদিং ঠপেয্য, এৱং কতা উস্সাৱনন্তিকা নাম, এৱং উদাহৰিতৱচনন্তিকাতি অত্থো.

১৩৯. যেভুয্যেন ৱা অপৰিক্খিত্তো, সকলোপি ৱা অপৰিক্খিত্তো আৰামো ‘‘গোনিসাদী’’তি ৱুচ্চতীতি সম্বন্ধো. এত্থ পন সেনাসনেসু পৰিক্খিত্তেসুপি আৰামে অপৰিক্খিত্তে কপ্পিযকুটিকৰণকিচ্চং নত্থি. সম্মুতিং কৰোন্তেহি কতং পৰিযোসিতং ‘‘ইমং ৱিহাৰং অড্ঢযোগং পাসাদং হম্মিযং গুহং তিণকুটিকং মণ্ডপ’’ন্তি তেসং নামং গহেত্ৱা তস্সা কুটিযা হত্থপাসে ৱা ঠত্ৱা, তস্সা অন্তো ৱা পৱিসিত্ৱা ৱুত্তনযেনেৱ ঞত্তিদুতিযকম্মৱাচায সম্মন্নিতব্বং.

১৪০. ‘‘ভিক্খুং ঠপেত্ৱা অঞ্ঞেহী’’তি ৱচনতো সেসসহধম্মিকেহিপি দেৱমনুস্সেহিপি অঞ্ঞেহি কপ্পিযকুটিযা অত্থায দিন্নো ৱা তেসং সন্তকো ৱা গেহো ‘‘গহপতী’’তি মতো ঞাতোতি অত্থো, সঙ্ঘসন্তকঞ্চ ভিক্খুসন্তকঞ্চ ঠপেত্ৱা সব্বেসং গেহো গহপতীতি অধিপ্পাযো.

১৪১. সপ্পিআদীহি মিস্সিতন্তি সপ্পিআদীহি পঞ্চহি চ হলিদ্দিসিঙ্গিৱেৰাদিযাৱজীৱিকেন চাতি অত্থো. ৱজেয্য অন্তোৱুত্থত্তন্তি এত্থ যাৱকালিকযামকালিকসঙ্খাতং পুৰিমকালিকদ্ৱযং সঙ্ঘিকং ৱা ভিক্খুস্স ৱা ভিক্খুনিযা ৱা সন্তকং সযং কপ্পিযকুটিযা ৱুত্থম্পি ইতৰেহি অকপ্পিযকুটিযা ৱুত্থেহি মিস্সিতং অন্তোৱুত্থভাৱং আগচ্ছেয্যাতি অত্থো.

১৪২. তেহেৱাতি অকপ্পিযকুটিযং ৱুত্থসপ্পিতেলাদীহি. সামপাকতন্তি সামংপক্কভাৱং গচ্ছতীতি অত্থো.

১৪৩-৪. ইমা পন কপ্পিযকুটিযো যদা জহিতৱত্থুকা হোন্তি, তং দস্সেতুং ‘‘উস্সাৱনন্তিকা’’তিআদিমাহ. সচে থম্ভে ৱা ভিত্তিপাদে ৱা পৰিৱত্তেন্তি, যো যো ঠিতো, তত্থ তত্থ পতিট্ঠাতি, এতেনুপাযেন সব্বেসু পৰিৱত্তেসুপি ন ৱিজহিতৱত্থুকাৱ হোতীতি অত্থো. পৰিক্খিত্তে গোনিসাদি ৱিজহিতৱত্থুকা. সেসা ছদনৱিব্ভমাতি ছদনৱিনাসা জহিতৱত্থুকা হোন্তীতি অধিপ্পাযো. ভূমিৱিনিচ্ছযো.

ভূমিনিদ্দেসৱণ্ণনা নিট্ঠিতা.