৯. অঞ্ঞভাগিযসিক্খাপদৱণ্ণনা

অঞ্ঞভাগো ৱা অস্স অত্থীতি যথা সুৱণ্ণস্সেদং সোৱণ্ণমিত্যত্ৰ সুৱণ্ণৱা অনেন সুৱণ্ণো ইত্যুচ্চতে. তং পটিমায সৰীৰং, সিলাপুত্তকস্স সৰীৰন্তি চ নিদস্সনং. ছগলকস্স ‘‘দব্বো’’তি দিন্নং নামং ‘‘দেসো’’তি ৱুচ্চতি. কস্মা? থেৰং অনুদ্ধংসেতুং থেৰস্সাপি অপদিসিতব্বত্তা. অঞ্ঞম্পি ৱত্থুং ন থেৰংযেৱ. লিস্সতি সিলিস্সতি ৱোহাৰমত্তেনেৱন অত্থতো. ঈসকং অল্লীযতীতি লেসোতি অধিপ্পাযো. লিসসেলছকোলঅল্লীভাৱে. তেন ৱুত্তং ‘‘ঈসকং অল্লীযতীতি লেসো’’তি. যস্মা দেসলেসা অত্থতো নিন্নানাকৰণং, তস্মা ‘‘কিঞ্চিদেসং লেসমত্তং উপাদাযা’’তি পদং উদ্ধৰিত্ৱা ‘‘দস লেসা জাতিলেসো’’তিআদি (পাৰা. ৩৯৪) পদভাজনে ৱুত্তং.

অট্ঠুপ্পত্তিৱসেনেৱ আৱিভূতন্তি এত্থ কিঞ্চ ভিয্যো অনিযমত্তা. ন হি মেত্তিযভূমজকানং ৱিয অঞ্ঞেসং সব্বেসম্পি ‘‘ছগলকমেৱেত্থ অঞ্ঞভাগিযং অধিকৰণং হোতি, অঞ্ঞং গোমহিংসাদিকম্পি হোতি, ন চ মেত্তিযভূমজকা ৱিয সব্বেপি নামলেসমত্তমেৱ উপাদিযন্তি, অঞ্ঞম্পি জাতিলেসাদিং উপাদিযন্তি, তস্মা অনিযমত্তা ন ৱিভত্তং. কিঞ্চ ভিয্যো তথাৱুত্তে ছগলকস্সেৱ অঞ্ঞভাগিযতা সম্ভৱতি, ন অঞ্ঞস্স, যেন সোৱ দস্সিতো. লেসো চ নাম লেসোৱ, ন জাতিআদি, যেন সোৱ দস্সিতোতি এৱং মিচ্ছাগাহপ্পসঙ্গতোতি ৱেদিতব্বং. ইধ চ…পে… সঞ্ঞিনোপীতি ইমস্মিং সিক্খাপদে চ অমূলকসিক্খাপদে চাতি অত্থো.

অঞ্ঞভাগিযসিক্খং যো, নেৱ সিক্খতি যুত্তিতো;

গচ্ছে ৱিনযৱিঞ্ঞূহি, অঞ্ঞভাগিযতংৱ সো. (ৱজিৰ. টী. পাৰাজিক ৪০৮);

অঞ্ঞভাগিযসিক্খাপদৱণ্ণনা নিট্ঠিতা.