৮. অট্ঠমৱগ্গৱণ্ণনা

পঠমদুতিযততিযেসু ‘‘গিহিগতা’’তি ৱা ‘‘কুমাৰিভূতা’’তি ৱা ন ৱত্তব্বা. ৱদন্তি চে, কম্মং কুপ্পতি.

একাদসমে ছন্দং অৱিস্সজ্জেত্ৱাতি ‘‘যথাসুখ’’ন্তি অৱত্ৱা. এত্থ পন অযং ৱিনিচ্ছযো – ‘‘পাৰিৱাসিকছন্দদানেনা’’তি ইদং উদ্ধৰিত্ৱা ‘‘ৱুট্ঠিতায পৰিসাযা’’তি (পাচি. ১১৬৮) পদভাজনং ৱুত্তং. এতস্স পন সমন্তপাসাদিকাযং ‘‘ৱুট্ঠিতায পৰিসাযাতি ছন্দং ৱিস্সজ্জেত্ৱা কাযেন ৱা ৱাচায ৱা ছন্দৱিস্সজ্জনমত্তেন ৱা ৱুট্ঠিতাযা’’তি (পাচি. অট্ঠ. ১১৬৭) ৱুত্তং. ইধ ছন্দস্স পন অৱিস্সট্ঠত্তা কম্মং কাতুং ৱট্টতীতি ৱুত্তং. তস্মা ছন্দং অৱিস্সজ্জেত্ৱাৱ দ্ৱাদসহত্থপাসে ৱিহৰিত্ৱা পুন সন্নিপাতকৰণঞ্চ ৱট্টতীতি লিখিতং.

অট্ঠমৱগ্গৱণ্ণনা নিট্ঠিতা.