পাচিত্তিযকণ্ডং

১. পঠমৱগ্গৱণ্ণনা

পঠমে হৰিতপত্তৱণ্ণো হৰিতকো. চাপলসুণং অমিঞ্জকো. অঙ্কুৰমত্তমেৱ হি তস্স হোতি. পলণ্ডুকাদযো সভাৱেনেৱ ৱট্টন্তি. সূপসম্পাকাদী ৱিনাপি অন্তমসো যাগুভত্তেপি পক্খিপিতুং ৱট্টতীতি লিখিতং, ‘‘ভিক্খুনিযাপি গিলানায পুৰেভত্তমেৱ লসুণং কপ্পতি, ন অগিলানাযা’’তি অভযগিৰীনং উগ্গহোতি.

দুতিযে আবাধপচ্চযা ভিক্খুনিসঙ্ঘং আপুচ্ছিত্ৱা সংহৰাপেতুং ৱট্টতি, ভিক্খুস্স এত্থ চ লসুণে চ দুক্কটং.

সত্তমে ‘‘সমুট্ঠানাদীনি অদ্ধানমগ্গসিক্খাপদসদিসানী’’তি পাঠো.

নৱমে কুট্টো নাম ঘৰকুট্টো. পাকাৰো নাম পৰিক্খেপপাকাৰো.

ছড্ডিতখেত্তেতি পুৰাণখেত্তে. সঙ্ঘসন্তকে ভিক্খুস্স ছড্ডেতুং ৱট্টতি সঙ্ঘপৰিযাপন্নত্তা. ভিক্খুনীনম্পি সঙ্ঘসন্তকে ভিক্খুসঙ্ঘসন্তকে ৱুত্তনযেনেৱ ৱট্টতি. এৱং সন্তেপি সাৰুপ্পৱসেন কাতব্বন্তি লিখিতং.

দসমে ‘‘সযং তানি ৱত্থূনি কৰোন্তিযা’’তিআদি ইধ সিক্খাপদে নত্থি. কস্মা? এড়কলোমসমুট্ঠানত্তা. যদি এৱং কস্মা ৱুত্তন্তি চে? সুত্তানুলোমমহাপদেসতো. যদি নচ্চাদীনি পস্সিতুং ৱা সুণিতুং ৱা ন লভতি, পগেৱ অত্তনা কাতুন্তি নযতো লব্ভমানত্তা ৱুত্তং. ইতৰথা মহাপদেসা নিৰত্থকা সিযুং. ‘‘এৱং অঞ্ঞত্থপি নযো নেতব্বো. সমুট্ঠানম্পি ইধ ৱুত্তমেৱ অগ্গহেত্ৱা ছসমুট্ঠানৱসেন গহেতব্ব’’ন্তি আচৰিযা. ইধ ৱুত্তং সমুট্ঠানং নাম মূলভূতস্স অন্তৰা ৱুত্তাপত্তিযা, তস্মা এড়কলোমসমুট্ঠানমেৱাতি অপৰে. আৰামে ঠত্ৱাতি ন কেৱলং ঠত্ৱা, ততো গন্ত্ৱা পন সব্বিৰিযাপথেহিপি লভতি. আৰামে ঠিতাতি পন আৰামপৰিযাপন্নাতি অত্থো. ইতৰথা নিসিন্নাপি ন লভেয্যাতি.

পঠমৱগ্গৱণ্ণনা নিট্ঠিতা.

২. দুতিযৱগ্গৱণ্ণনা

পঞ্চমে উপচাৰো দ্ৱাদসহত্থো. ‘‘সমুট্ঠানাদীনি কথিনসদিসানি, ইদং পন কিৰিযাকিৰিয’’ন্তি পাঠো.

সত্তমে ধুৱপঞ্ঞত্তেতি ভিক্খুনীনং অত্থায. কুলানীতি কুলঘৰানি.

দুতিযৱগ্গৱণ্ণনা নিট্ঠিতা.

৩. ততিযৱগ্গৱণ্ণনা

চতুত্থে সঙ্ঘাটিআদিৱসেন অধিট্ঠিতানং সঙ্ঘাটিচাৰং.

পঞ্চমে ‘‘ইদং পন কিৰিযাকিৰিয’’ন্তি পাঠো.

ছট্ঠে অঞ্ঞস্মিং পৰিক্খাৰে দুক্কটন্তি থালকাদীনং ৱা সপ্পিতেলাদীনং ৱা অঞ্ঞতৰস্মিং.

ততিযৱগ্গৱণ্ণনা নিট্ঠিতা.

৪. চতুত্থৱগ্গৱণ্ণনা

ছট্ঠে সংসট্ঠৱিহাৰসিক্খাপদে ‘‘সেসমেত্থ পঠমঅৰিট্ঠসিক্খাপদে ৱুত্তৱিনিচ্ছযসদিসমেৱা’’তি পাঠো.

চতুত্থৱগ্গৱণ্ণনা নিট্ঠিতা.

৫. পঞ্চমৱগ্গৱণ্ণনা

‘‘চিত্তাগাৰং নাম যত্থ কত্থচি মনুস্সানং কীড়িতুং ৰমিতুং কতং হোতী’’তিআদিনা (পাচি. ৯৭৯) পাড়িযং ৱুত্তত্তা চিত্তাগাৰাদীনি সব্বেসং অত্থায কতানি, ন ৰঞ্ঞো এৱ.

সত্তমে এতেন নিস্সজ্জিতুং কপ্পিযং ৱুত্তং. ‘‘নিস্সজ্জিত্ৱা পৰিভুঞ্জতী’’তি (পাচি. ১০০৭) পাড়ি চ অত্থি. ‘‘সমুট্ঠানাদীনি কথিনসদিসানি, ইদং পন কিৰিযাকিৰিয’’ন্তি পাঠো. অট্ঠমেপি এসোৱ পাঠো.

পঞ্চমৱগ্গৱণ্ণনা নিট্ঠিতা.

৬. ছট্ঠৱগ্গৱণ্ণনা

দসমে ‘‘সমুট্ঠানাদীনি কথিনসদিসানি, ইদং পন কিৰিযাকিৰিয’’ন্তি পাঠো.

ছট্ঠৱগ্গৱণ্ণনা নিট্ঠিতা.

৮. অট্ঠমৱগ্গৱণ্ণনা

পঠমদুতিযততিযেসু ‘‘গিহিগতা’’তি ৱা ‘‘কুমাৰিভূতা’’তি ৱা ন ৱত্তব্বা. ৱদন্তি চে, কম্মং কুপ্পতি.

একাদসমে ছন্দং অৱিস্সজ্জেত্ৱাতি ‘‘যথাসুখ’’ন্তি অৱত্ৱা. এত্থ পন অযং ৱিনিচ্ছযো – ‘‘পাৰিৱাসিকছন্দদানেনা’’তি ইদং উদ্ধৰিত্ৱা ‘‘ৱুট্ঠিতায পৰিসাযা’’তি (পাচি. ১১৬৮) পদভাজনং ৱুত্তং. এতস্স পন সমন্তপাসাদিকাযং ‘‘ৱুট্ঠিতায পৰিসাযাতি ছন্দং ৱিস্সজ্জেত্ৱা কাযেন ৱা ৱাচায ৱা ছন্দৱিস্সজ্জনমত্তেন ৱা ৱুট্ঠিতাযা’’তি (পাচি. অট্ঠ. ১১৬৭) ৱুত্তং. ইধ ছন্দস্স পন অৱিস্সট্ঠত্তা কম্মং কাতুং ৱট্টতীতি ৱুত্তং. তস্মা ছন্দং অৱিস্সজ্জেত্ৱাৱ দ্ৱাদসহত্থপাসে ৱিহৰিত্ৱা পুন সন্নিপাতকৰণঞ্চ ৱট্টতীতি লিখিতং.

অট্ঠমৱগ্গৱণ্ণনা নিট্ঠিতা.

৯. নৱমৱগ্গৱণ্ণনা

ততিযে ‘‘সেসং ৱুত্তনযেন ৱেদিতব্বং, ইদং পন অকুসলচিত্ত’’ন্তি পাঠো.

চতুত্থে ৱুত্তনযেনাতি ততিযে ৱুত্তনযেন.

একাদসমে ‘‘সমুট্ঠানাদীনি কথিনসদিসানি, ইদং পন কিৰিযাকিৰিয’’ন্তি পাঠো.

দ্ৱাদসমে ‘‘সমুট্ঠানাদীনি পদসোধম্মসদিসানি, ইদং পন কিৰিযাকিৰিয’’ন্তি পাঠো.

তেৰসমে ‘‘সংকচ্চিকং নাম অধক্খকং উব্ভনাভি, তস্সা পটিচ্ছাদনত্থাযা’’তি (পাচি. ১২২৬) পাড়িযং ৱুত্তত্তা ইধাপি ‘‘অধক্খকউব্ভনাভিসঙ্খাতস্স সৰীৰস্স পটিচ্ছাদনত্থ’’ন্তি পাঠো. অপৰিক্খেপে আপত্তিপৰিচ্ছেদং সমন্তপাসাদিকৱসেন অগ্গহেত্ৱা ইধ ৱুত্তনযেন গহেতব্বন্তি লিখিতং.

নৱমৱগ্গৱণ্ণনা নিট্ঠিতা.

সুদ্ধপাচিত্তিযৱণ্ণনা নিট্ঠিতা.

সমুট্ঠানৱিনিচ্ছযৱণ্ণনা

সমুট্ঠানানং ৱিনিচ্ছযে পন গিৰগ্গসমজ্জাদীনি ‘‘অচিত্তকানি লোকৱজ্জানী’’তি ৱুত্তত্তা ‘‘নচ্চ’’ন্তি ৱা ‘‘গন্ধ’’ন্তি ৱা অজানিত্ৱাপি দস্সনেন, ৱিলিম্পনেন ৱা আপজ্জনতো ৱত্থুঅজাননচিত্তেন অচিত্তকানি. ‘‘নচ্চ’’ন্তি ৱা ‘‘গন্ধ’’ন্তি ৱা জানিত্ৱা পস্সন্তিযা, ৱিলিম্পন্তিযা ৱা অকুসলত্তা এৱ লোকৱজ্জানি. চোৰিৱুট্ঠাপনাদীনি ‘‘চোৰী’’তিআদিনা ৱত্থুং জানিত্ৱা কৰণেযেৱ আপজ্জনত্তা সচিত্তকানি. উপসম্পদাদীনং একন্তাকুসলচিত্তেনেৱ অকত্তব্বত্তা পণ্ণত্তিৱজ্জানি. ‘‘ইধ সচিত্তকাচিত্তকতা পণ্ণত্তিজাননাজাননতায অগ্গহেত্ৱা ৱত্থুজাননাজাননতায গহেতব্ব’’ন্তি লিখিতং. অধিপ্পেতত্তা সঙ্খেপতো দস্সনাভাৱা –

অচিত্তকত্তং দ্ৱিধা মতং, ৱত্থুপণ্ণত্তিঅঞ্ঞাণা;

ৱুত্তং ঞাণং দ্ৱিধা ইধ, সকনামেন অঞ্ঞাতং.

পৰনামঞ্চ জাননং, ৱত্থুস্সেকং বলক্কাৰে;

একধা সমচাৰিকে, তস্মিং তপ্পটিবন্ধোতি.

পৰনামেন জাননং, দ্ৱিধা মুত্তাদিকে একং;

একং লোমাদিকে মতন্তি, অযং ভেদো ৱেদিতব্বো.

সেসমেত্থ উত্তানং, অনুত্তানত্থে ৱুত্তৱিনিচ্ছযত্তা ন উদ্ধটন্তি;

সমুট্ঠানৱিনিচ্ছযৱণ্ণনা নিট্ঠিতা.

ভিক্খুনীপাতিমোক্খৱণ্ণনা নিট্ঠিতা.

কঙ্খাৱিতৰণীপুৰাণটীকা নিট্ঠিতা.

নমো তস্স ভগৱতো অৰহতো সম্মাসম্বুদ্ধস্স