পাৰাজিককণ্ডং

অভিলাপমত্তমেৱাতি এত্থ দহৰৱসেন ‘‘ভন্তে’’তি চ ৱুড্ঢৱসেন ‘‘আৱুসো’’তি চ তত্থ দুৱিধো অভিলাপো, ইধ পন ৱুড্ঢদহৰানং ‘‘অয্যা’’তি একমেৱ.

কাযসংসগ্গে ৱুত্তনযেনাতি এত্থ তব্বহুলনযেন কিৰিযসমুট্ঠানতা ৱুত্তা. ‘‘কাযসংসগ্গং সমাপজ্জেয্যা’’তি অৱত্ৱা পন ‘‘সাদিযেয্যা’’তি ৱুত্তত্তা অকিৰিযতোপি সমুট্ঠাতীতি ৱেদিতব্বং. যথা চেত্থ, এৱং হেট্ঠা ‘‘মনুস্সিত্থিযা তযো মগ্গে মেথুনং ধম্মং পটিসেৱন্তস্স আপত্তি পাৰাজিকস্সা’’তিআদিনা (পাৰা. ৫৬) নযেন কিৰিযসমুট্ঠানতং ৱত্ৱা তদনন্তৰং ‘‘ভিক্খুপচ্চত্থিকা মনুস্সিত্থিং ভিক্খুস্স সন্তিকং আনেত্ৱা ৱচ্চমগ্গেন অঙ্গজাতং অভিনিসীদেন্তি, সো চে পৱেসনং সাদিযতী’’তিআদিনা (পাৰা. ৫৮) নযেন অকিৰিযসমুট্ঠানস্সপি ৱুত্তত্তা পঠমপাৰাজিকাযপি তব্বহুলনযেনেৱ কিৰিযসমুট্ঠানতা ৱেদিতব্বা. ন হি পৱেসনসাদিযনাদিম্হি কিৰিযসমুট্ঠানতা দিস্সতি.

অঙ্গজাতচলনঞ্চেত্থ ন সাৰতো দট্ঠব্বং ‘‘সো চে পৱেসনং ন সাদিযতি, পৱিট্ঠং ন সাদিযতি, ঠিতং ন সাদিযতি, উদ্ধৰণং সাদিযতি, আপত্তি পাৰাজিকস্সা’’তি (পাৰা. ৫৮) এত্থ ঠিতনসাদিযনে পকতিযাপি পৰিপুণ্ণচলনত্তা. সাদিযনপচ্চযা পটিসেৱনচলনঞ্চেত্থ ন দিস্সতেৱাতি তব্বহুলনযেনেৱ কিৰিযসমুট্ঠানতা গহেতব্বা.

অপিচ ভিক্খুনিযাপি পঠমপাৰাজিকে তস্স সাদিযনস্স সৰূপেন ৱুত্তত্তা তদনুৰূপৱসেন ৱিভঙ্গনযমনোলোকেত্ৱা ‘‘কিৰিযসমুট্ঠান’’মিচ্চেৱ ৱুত্তং. যথা চেতেসু তব্বহুলনযেন কিৰিযসমুট্ঠানতা ৱুত্তা, তথা সুৰাদীনং অকুসলেনেৱ পাতব্বতা. ইতৰথা ‘‘যং অকুসলেনেৱ আপজ্জতি, অযং লোকৱজ্জা, সেসা পণ্ণত্তিৱজ্জা’’তি ৱুত্তে লোকৱজ্জপণ্ণত্তিৱজ্জানং নিযমলক্খণসিদ্ধি হোতি, তথা তং অৱত্ৱা ‘‘যস্সা সচিত্তকপক্খে চিত্তং অকুসলমেৱ হোতি, অযং লোকৱজ্জা, সেসা পণ্ণত্তিৱজ্জা’’তি (কঙ্খা. অট্ঠ. পঠমপাৰাজিকৱণ্ণনা) ৱুত্তে লোকৱজ্জৱচনং নিৰত্থকং সিযা ৱত্থুঅজাননপক্খেপি অকুসলেনেৱ পাতব্বত্তা. যস্মা তত্থ সুৰাপানৱীতিক্কমস্স অকুসলচিত্তুপ্পাদো নত্থি, তস্মা খন্ধকট্ঠকথাযং ‘‘মজ্জপানে পন ভিক্খুনো অজানিত্ৱাপি বীজতো পট্ঠায মজ্জং পিৱন্তস্স পাচিত্তিযং. সামণেৰো জানিত্ৱাৱ পিৱন্তো সীলভেদং আপজ্জতি, ন অজানিত্ৱা’’তি (মহাৱ. অট্ঠ. ১০৮) ৱুত্তং, ন ৱুত্তং ‘‘ৱত্থুঅজাননপক্খে পাণাতিপাতাদীনং সিদ্ধিকৰঅকুসলচিত্তুপ্পাদসদিসে চিত্তুপ্পাদে সতিপি সামণেৰো সীলভেদং নাপজ্জতী’’তি. অভিনিৱেসৱচনং পাণাতিপাতাদীহি সমানগতিকত্তা সামণেৰানং সুৰাপানস্স. ‘‘সুৰামেৰযিমে’’তি ৱত্থুং জানিত্ৱা পাতব্বতাদিৱসেন ৱীতিক্কমন্তস্স অকুসলস্স অসম্ভৱো নত্থি. তেন ৱুত্তং ‘‘যস্সা সচিত্তকপক্খে’’তিআদি.

কিঞ্চেত্থ – যুত্তিৱচনেন অৰহন্তানং অপ্পৱিসনতো সচিত্তকাচিত্তকপক্খেসু অকুসলনিযমোতি চে? ন, ধম্মতাৱসেন সেক্খানম্পি অপ্পৱিসনতো. অচিত্তকপক্খে অকুসলনিযমাভাৱদস্সনত্থং সুপন্তস্স মুখে পক্খিত্তজলবিন্দুমিৱ সুৰাবিন্দুআদযো উদাহৰিতব্বা. তব্বহুলনযেন হি অত্থে গহিতে পুব্বেনাপৰং অট্ঠকথায সমেতি সদ্ধিং পাড়িযা চাতি. আচৰিযাপি সুৰাপানে অকুসলনিযমাভাৱমেৱ ৱদন্তি. একচ্চে পন কিৰিযসমুট্ঠানতা পনস্স তব্বহুলনযমেৱ, ন পঠমপাৰাজিকে. কথং? কাযসংসগ্গসিক্খাপদং পঠমপাৰাজিকসমুট্ঠানং. এত্থ ভিক্খুস্স চ ভিক্খুনিযা চ কাযসংসগ্গভাৱে সতি ভিক্খুনী কাযঙ্গং অচোপযমানাপি চিত্তেনেৱ অধিৱাসেতি, আপজ্জতি, ন এৱং ভিক্খু. ভিক্খু পন চোপযমানোৱ আপজ্জতি, এৱমেৱ পঠমপাৰাজিকেপি চোপনে সতি এৱ আপজ্জতি, নাসতি. পৱেসনং সাদিযতীতি এত্থ পৱেসনসাদিযনং নাম সেৱনচিত্তুপ্পাদনং, মগ্গেন ৱা মগ্গপ্পটিপন্নম্পি ইচ্ছন্তি. তস্সাপি কাযচলনং একন্তং অত্থি এৱ. এৱং সন্তেপি ৱীমংসিত্ৱা গহেতব্বন্তি ৱদন্তীতি লিখিতং

পাৰাজিকৱণ্ণনা নিট্ঠিতা.