সঙ্ঘাদিসেসকণ্ডং

১. উস্সযৱাদিকাসিক্খাপদৱণ্ণনা

ভিক্খুনীনং সঙ্ঘাদিসেসং পত্ৱা ৱুট্ঠানৱিধযো সন্দস্সনত্থং ‘‘অযং ভিক্খুনী…পে… আপন্না’’তি পুগ্গলনিযমং কত্ৱা পাৰাজিকতো অধিপ্পাযন্তি ‘‘নিস্সাৰণীযং সঙ্ঘাদিসেস’’ন্তি আপত্তিনামগ্গহণঞ্চ কতং. ‘‘সমুট্ঠানাদীনি পঠমকথিনসদিসানি, ইদং পন কিৰিযমেৱা’’তি পাঠো.

উস্সযৱাদিকাসিক্খাপদৱণ্ণনা নিট্ঠিতা.

২. চোৰিৱুট্ঠাপিকাসিক্খাপদৱণ্ণনা

কত্থচি অগন্ত্ৱা নিসিন্নট্ঠানে এৱ নিসীদিত্ৱা কৰোন্তিযা ৱাচাচিত্ততো, খণ্ডসীমাদিগতায কাযৱাচাচিত্ততো.

চোৰিৱুট্ঠাপিকাসিক্খাপদৱণ্ণনা নিট্ঠিতা.

৩. একগামন্তৰগমনসিক্খাপদৱণ্ণনা

‘‘আভোগং ৱিনা’’তি ৱুত্তত্তা আভোগে সতি অনাপত্তি, ইমস্মিং পন সিক্খাপদে সমন্তপাসাদিকাযং উপচাৰাতিক্কমে আপত্তি ৱুত্তা, ইধ ওক্কমে. দ্ৱীসুপি ৱুত্তং অত্থতো একমেৱ গামন্তৰগমনসঙ্ঘাদিসেসং উপচাৰস্স সন্ধায ৱুত্তত্তা. গণম্হা ওহীযনস্স ৱিৰোধো. ‘‘অৰঞ্ঞে’’তি ইদং অত্থৱসেন ৱুত্তং, গামন্তৰেপি হোতি এৱ.

সিক্খাপদা বুদ্ধৱৰেন ৱণ্ণিতাতি গাথায ৱসেন, অট্ঠকথাযম্পি গামন্তৰপৰিযাপন্নং নদিপাৰন্তি ৱুত্তং.

একগামন্তৰগমনসিক্খাপদৱণ্ণনা নিট্ঠিতা.

‘‘ছাদনপচ্চযা পন দুক্কটং আপজ্জতী’’তি ইদং –

‘‘আপজ্জতি গৰুকং সাৱসেসং;

ছাদেতি অনাদৰিযং পটিচ্চ;

ন ভিক্খুনী নো চ ফুসেয্য ৱজ্জং;

পঞ্হামেসা কুসলেহি চিন্তিতা’’তি. (পৰি. ৪৮১) –

ইমায ৱিৰুজ্ঝতি. তস্মা পমাদলেখা ৱিয দিস্সতীতি গৱেসিতব্বো এত্থ অত্থো. ভিক্খূনং মানত্তকথাযং ‘‘পৰিক্খিত্তস্স ৱিহাৰস্স পৰিক্খেপতো, অপৰিক্খিত্তস্স পৰিক্খেপাৰহট্ঠানতো দ্ৱে লেড্ডুপাতে অতিক্কমিত্ৱা’’তি (কঙ্খা. অট্ঠ. নিগমনৱণ্ণনা) ৱুত্তং, ইধ পন ‘‘গামূপচাৰতো চ ভিক্খূনং ৱিহাৰূপচাৰতো চ দ্ৱে লেড্ডুপাতে’’তিআদি ৱুত্তং. তত্ৰ ভিক্খূনং ৱুত্তপ্পকাৰপ্পদেসং অতিক্কমিত্ৱা গামেপি তং কম্মং কাতুং ৱট্টতি, ভিক্খুনীনং পন গামে ন ৱট্টতি. তস্মা এৱং ৱুত্তন্তি একে. অপৰে পন ভিক্খূনম্পি গামে ন ৱট্টতি. ভিক্খুৱিহাৰো নাম পুব্বে এৱ গামূপচাৰং অতিক্কমিত্ৱা ঠিতো, তস্মা গামং অৱত্ৱা ৱিহাৰূপচাৰমেৱ হেট্ঠা ৱুত্তং. ভিক্খুনীনং ৱিহাৰো গামে এৱ ৱট্টতি, ন বহি, তস্মা গামূপচাৰঞ্চ ৱিহাৰূপচাৰঞ্চ উভযমেৱেত্থ দস্সিতং. তস্মা উভযত্থাপি অত্থতো নানাত্তং নত্থীতি ৱদন্তি. যং যুজ্জতি, তং গহেতব্বং.

সঙ্ঘাদিসেসৱণ্ণনা নিট্ঠিতা.