অনিযতকণ্ডো

১. পঠমানিযতসিক্খাপদৱণ্ণনা

অনিযতুদ্দেসে ইমে খো পনাতিআদি ৱুত্তনযমেৱ. মাতুগামেনাতি তদহুজাতাযপি জীৱমানকমনুস্সিত্থিযা. একো একাযাতি একো ভিক্খু মাতুগামসঙ্খাতায একায ইত্থিযা সদ্ধিং. ৰহোতি চক্খুস্স ৰহো. কিঞ্চাপি পাড়িযং (পাৰা. ৪৪৫) সোতস্স ৰহো আগতো, চক্খুস্সেৱ পন ৰহো ‘‘ৰহো’’তি ইধ অধিপ্পেতো. সচেপি হি পিহিতকৱাটস্স গব্ভস্স দ্ৱাৰে নিসিন্নো ৱিঞ্ঞূ পুৰিসো হোতি, নেৱ অনাপত্তিং কৰোতি. যত্থ পন সক্কা দট্ঠুং, তাদিসে অন্তোদ্ৱাদসহত্থেপি ওকাসে নিসিন্নো সচক্খুকো ৱিক্খিত্তচিত্তোপি নিদ্দাযন্তোপি অনাপত্তিং কৰোতি, সমীপে ঠিতোপি অন্ধো ন কৰোতি, চক্খুমাপি নিপজ্জিত্ৱা নিদ্দাযন্তোপি ন কৰোতি, ইত্থীনং পন সতম্পি ন কৰোতিযেৱ, তেন ৱুত্তং ‘‘ৰহোতি চক্খুস্স ৰহো’’তি. পটিচ্ছন্নে আসনেতি কুট্টাদীহি পটিচ্ছন্নোকাসে. অলংকম্মনিযেতি কম্মক্খমং কম্মযোগ্গন্তি কম্মনিযং, অলং পৰিযত্তং কম্মনিযভাৱাযাতি অলংকম্মনিযং, তস্মিং অলংকম্মনিযে. যত্থ অজ্ঝাচাৰং কৰোন্তা সক্কোন্তি তং কম্মং কাতুং, তাদিসেতি অত্থো. নিসজ্জং কপ্পেয্যাতি নিসজ্জং কৰেয্য, নিসীদেয্যাতি অত্থো. এত্থ চ সযনম্পি নিসজ্জায এৱ সঙ্গহিতং. সদ্ধেয্যৱচসাতি সদ্ধাতব্বৱচনা, অৰিযসাৱিকাতি অত্থো. নিসজ্জং ভিক্খু পটিজানমানোতি কিঞ্চাপি এৱৰূপা উপাসিকা দিস্ৱা ৱদতি, অথ খো ভিক্খু নিসজ্জং পটিজানমানোৱ তিণ্ণং ধম্মানং অঞ্ঞতৰেন কাৰেতব্বো, ন অপ্পটিজানমানোতি অত্থো. যেন ৱা সাতি নিসজ্জাদীসু আকাৰেসু যেন ৱা আকাৰেন সদ্ধিং মেথুনাদীনি আৰোপেত্ৱা সা উপাসিকা ৱদেয্য, পটিজানমানোৱ তেন সো ভিক্খু কাৰেতব্বো, এৱৰূপাযপি হি উপাসিকায ৱচনমত্তেন আকাৰেন ন কাৰেতব্বোতি অত্থো. কস্মা? যস্মা দিট্ঠং নাম তথাপি হোতি, অঞ্ঞথাপীতি. অযং ধম্মো অনিযতোতি তিণ্ণং আপত্তীনং যং আপত্তিং ৱা ৱত্থুং ৱা পটিজানাতি, তস্স ৱসেন কাৰেতব্বতায অনিযতো.

সাৱত্থিযং উদাযিত্থেৰং আৰব্ভ মাতুগামেন সদ্ধিং ৱুত্তপ্পকাৰে আসনে নিসজ্জকপ্পনৱত্থুস্মিং পঞ্ঞত্তং, অসাধাৰণপঞ্ঞত্তি, অনাণত্তিকং, মেথুনধম্মসন্নিস্সিতকিলেসসঙ্খাতেন ৰহস্সাদেন মাতুগামস্স সন্তিকং গন্তুকামতায অক্খিঅঞ্জনাদিতো পট্ঠায সব্বপযোগেসু দুক্কটং. গন্ত্ৱা তস্মিং ৱা নিসিন্নে ইত্থী নিসীদতু, তস্সা ৱা নিসিন্নায সো নিসীদতু, অপচ্ছা অপুৰিমংযেৱ উভো ৱা নিসীদন্তু, উভিন্নং নিসজ্জায পাচিত্তিযং. সচে পন কাযসংসগ্গং ৱা মেথুনং ৱা সমাপজ্জতি, তেসং ৱসেন কাৰেতব্বো. নিপজ্জনেপি এসেৱ নযো. ৱুত্তপ্পকাৰে পুৰিসে নিপজ্জিত্ৱা অনিদ্দাযন্তে অনন্ধে ৱিঞ্ঞুপুৰিসে উপচাৰগতে সতি, ঠিতস্স, অৰহোপেক্খস্স, অঞ্ঞৱিহিতস্স চ নিসজ্জনপচ্চযা অনাপত্তি. উম্মত্তকাদীনং পন তীহিপি আপত্তীহি অনাপত্তি. সিযা সীলৱিপত্তি, সিযা আচাৰৱিপত্তি. যং পন আপত্তিং পটিজানাতি, তস্সা ৱসেন অঙ্গভেদো ঞাতব্বো. সমুট্ঠানাদীনি পঠমপাৰাজিকসদিসানেৱাতি.

পঠমানিযতসিক্খাপদৱণ্ণনা নিট্ঠিতা.

২. দুতিযানিযতসিক্খাপদৱণ্ণনা

দুতিযে ইত্থীপি পুৰিসোপি যো কোচি ৱিঞ্ঞূ অনন্ধো অবধিৰো অন্তোদ্ৱাদসহত্থে ওকাসে ঠিতো ৱা নিসিন্নো ৱা ৱিক্খিত্তোপি নিদ্দাযন্তোপি অনাপত্তিং কৰোতি. বধিৰো পন চক্খুমাপি, অন্ধো ৱা অবধিৰোপি ন কৰোতি. পাৰাজিকাপত্তিঞ্চ পৰিহাপেত্ৱা দুট্ঠুল্লৱাচাপত্তি ৱুত্তাতি অযং ৱিসেসো. সেসং পুৰিমনযেনেৱ ৱেদিতব্বং. সমুট্ঠানাদীনি পনেত্থ অদিন্নাদানসদিসানেৱাতি.

দুতিযানিযতসিক্খাপদৱণ্ণনা নিট্ঠিতা.

উদ্দিট্ঠা খোতিআদি সব্বত্থ ৱুত্তনযেনেৱ ৱেদিতব্বং.

কঙ্খাৱিতৰণিযা পাতিমোক্খৱণ্ণনায

অনিযতৱণ্ণনা নিট্ঠিতা.