১. সপ্পিৱিঞ্ঞাপনসিক্খাপদৱণ্ণনা

পাটিদেসনীযেসু পঠমে সপ্পিন্তি পুব্বে ৱুত্তৱিনিচ্ছযং পাড়িআগতং (পাচি. ১২৩০) গোসপ্পিআদিমেৱ. ৱিঞ্ঞাপেত্ৱা ভুঞ্জেয্যাতি এত্থ ‘‘ৱিঞ্ঞত্তিযা পটিলদ্ধং ভুঞ্জিস্সামী’’তি গহণে দুক্কটং, গহিতস্স অজ্ঝোহাৰে অজ্ঝোহাৰে পাটিদেসনীযং.

সাৱত্থিযং ছব্বগ্গিযা ভিক্খুনিযো আৰব্ভ সপ্পিং ৱিঞ্ঞাপেত্ৱা ভুঞ্জনৱত্থুস্মিং পঞ্ঞত্তং, ‘‘অগিলানা’’তি অযমেত্থ অনুপঞ্ঞত্তি, তিকপাটিদেসনীযং, গিলানায দ্ৱিকদুক্কটং. যা পন গিলানা গিলানসঞ্ঞা, গিলানকালে ৱা ৱিঞ্ঞাপেত্ৱা পচ্ছা অগিলানা হুত্ৱা ভুঞ্জতি, গিলানায ৱা সেসকং, ঞাতকপ্পৱাৰিতট্ঠানতো ৱা ৱিঞ্ঞত্তং, অঞ্ঞস্স ৱা অত্থায, অত্তনো ৱা ধনেন গহিতং ভুঞ্জতি, তস্সা, উম্মত্তিকাদীনঞ্চ অনাপত্তি. ৱুত্তলক্খণসপ্পিতা, অনুঞ্ঞাতকাৰণাভাৱো, ৱিঞ্ঞত্তি, অজ্ঝোহাৰোতি ইমানেত্থ চত্তাৰি অঙ্গানি. সমুট্ঠানাদীনি অদ্ধানসদিসানীতি.

সপ্পিৱিঞ্ঞাপনসিক্খাপদৱণ্ণনা নিট্ঠিতা.