৩. পঠমসিক্খমানসিক্খাপদৱণ্ণনা

ততিযে দ্ৱে ৱস্সানীতি পৱাৰণাৱসেন দ্ৱে সংৱচ্ছৰানি. ছসু ধম্মেসূতি পাণাতিপাতাৱেৰমণিআদীসু ৱিকালভোজনাৱেৰমণিপৰিযোসানেসু ছসু সিক্খাপদেসু. অসিক্খিতসিক্খন্তি পদভাজনে (পাচি. ১০৭৭) ৱুত্তনযেনেৱ অদিন্নসিক্খং ৱা কুপিতসিক্খং ৱা. সিক্খমানং ৱুট্ঠাপেয্যাতি তেসু ছসু ধম্মেসু সিক্খনতো, তে ৱা সিক্খাসঙ্খাতে ধম্মে মাননতো এৱংলদ্ধনামং অনুপসম্পন্নং উপসম্পাদেয্য. পাচিত্তিযন্তি পঠমসিক্খাপদে ৱুত্তনযেনেৱ কম্মৱাচাপৰিযোসানে পাচিত্তিযং.

সাৱত্থিযং সম্বহুলা ভিক্খুনিযো আৰব্ভ এৱৰূপং সিক্খমানং ৱুট্ঠাপনৱত্থুস্মিং পঞ্ঞত্তং, ধম্মকম্মে তিকপাচিত্তিযং, অধম্মকম্মে তিকদুক্কটং. দ্ৱে ৱস্সানি ছসু ধম্মেসু সিক্খিতসিক্খং সিক্খমানং ৱুট্ঠাপেন্তিযা, উম্মত্তিকাদীনঞ্চ অনাপত্তি. ৱুত্তনযেন অসিক্খিতসিক্খতা, ধম্মকম্মতা, কম্মৱাচাপৰিযোসানন্তি ইমানেত্থ তীণি অঙ্গানি. সমুট্ঠানাদীনি পঠমে ৱুত্তনযানেৱাতি.

পঠমসিক্খমানসিক্খাপদৱণ্ণনা নিট্ঠিতা.