২. অকালচীৱৰসিক্খাপদৱণ্ণনা

দুতিযে অকালচীৱৰন্তি অত্থতে কথিনে কথিনমাসেহি, অনত্থতে চীৱৰমাসতো অঞ্ঞস্মিং কালে উপ্পন্নং, যং ৱা পন কালেপি আদিস্স দিন্নং. আদিস্স দিন্নং নাম ‘‘সম্পত্তা ভাজেন্তূ’’তি ৱত্ৱা ৱা, ‘‘ইদং গণস্স, ইদং তুম্হাকং দম্মী’’তি ৱত্ৱা ৱা, দাতুকামতায পাদমূলে ঠপেত্ৱা ৱা দিন্নং. ইচ্চেতং অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেন্তিযা পযোগে দুক্কটং, যং অত্তনা লদ্ধং, তং নিস্সগ্গিযং হোতি. নিস্সট্ঠং পটিলভিত্ৱাপি যথাদানেযেৱ উপনেতব্বং, অঞ্ঞস্মিম্পি এৱৰূপে সিক্খাপদে এসেৱ নযো.

সাৱত্থিযং থুল্লনন্দং আৰব্ভ অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজনৱত্থুস্মিং পঞ্ঞত্তং, অকালচীৱৰে ৱেমতিকায, কালচীৱৰে অকালচীৱৰসঞ্ঞায চেৱ ৱেমতিকায চ দুক্কটং. উভোসু কালচীৱৰসঞ্ঞায, উম্মত্তিকাদীনঞ্চ অনাপত্তি. অকালচীৱৰতা, তথাসঞ্ঞিতা, ‘‘কালচীৱৰ’’ন্তি অধিট্ঠায লেসেন ভাজাপনং, পটিলাভোতি ইমানেত্থ চত্তাৰি অঙ্গানি. সমুট্ঠানাদীনি অদিন্নাদানসদিসানীতি.

অকালচীৱৰসিক্খাপদৱণ্ণনা নিট্ঠিতা.