নিস্সগ্গিযকণ্ডো

১. পত্তসন্নিচযসিক্খাপদৱণ্ণনা

নিস্সগ্গিযেসু আদিৱগ্গস্স তাৱ পঠমে পত্তসন্নিচযং কৰেয্যাতি পত্তসন্নিধিং কৰেয্য, একাহং অনধিট্ঠহিত্ৱা ৱা অৱিকপ্পেত্ৱা ৱা অধিট্ঠানুপগং পত্তং ঠপেয্যাতি অত্থো.

সাৱত্থিযং ছব্বগ্গিযা ভিক্খুনিযো আৰব্ভ পত্তসন্নিচযৱত্থুস্মিং পঞ্ঞত্তং, সেসকথামগ্গো ভিক্খুপাতিমোক্খৱণ্ণনাযং ৱুত্তনযেনেৱ ৱেদিতব্বো, তত্ৰ হি দসাহাতিক্কমে আপত্তি, ইধ একাহাতিক্কমেতি এত্তকমেৱ তস্স চ ইমস্স চ নানাকৰণং, সেসং তাদিসমেৱাতি.

পত্তসন্নিচযসিক্খাপদৱণ্ণনা নিট্ঠিতা.

২. অকালচীৱৰসিক্খাপদৱণ্ণনা

দুতিযে অকালচীৱৰন্তি অত্থতে কথিনে কথিনমাসেহি, অনত্থতে চীৱৰমাসতো অঞ্ঞস্মিং কালে উপ্পন্নং, যং ৱা পন কালেপি আদিস্স দিন্নং. আদিস্স দিন্নং নাম ‘‘সম্পত্তা ভাজেন্তূ’’তি ৱত্ৱা ৱা, ‘‘ইদং গণস্স, ইদং তুম্হাকং দম্মী’’তি ৱত্ৱা ৱা, দাতুকামতায পাদমূলে ঠপেত্ৱা ৱা দিন্নং. ইচ্চেতং অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেন্তিযা পযোগে দুক্কটং, যং অত্তনা লদ্ধং, তং নিস্সগ্গিযং হোতি. নিস্সট্ঠং পটিলভিত্ৱাপি যথাদানেযেৱ উপনেতব্বং, অঞ্ঞস্মিম্পি এৱৰূপে সিক্খাপদে এসেৱ নযো.

সাৱত্থিযং থুল্লনন্দং আৰব্ভ অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজনৱত্থুস্মিং পঞ্ঞত্তং, অকালচীৱৰে ৱেমতিকায, কালচীৱৰে অকালচীৱৰসঞ্ঞায চেৱ ৱেমতিকায চ দুক্কটং. উভোসু কালচীৱৰসঞ্ঞায, উম্মত্তিকাদীনঞ্চ অনাপত্তি. অকালচীৱৰতা, তথাসঞ্ঞিতা, ‘‘কালচীৱৰ’’ন্তি অধিট্ঠায লেসেন ভাজাপনং, পটিলাভোতি ইমানেত্থ চত্তাৰি অঙ্গানি. সমুট্ঠানাদীনি অদিন্নাদানসদিসানীতি.

অকালচীৱৰসিক্খাপদৱণ্ণনা নিট্ঠিতা.

৩. চীৱৰপৰিৱত্তনসিক্খাপদৱণ্ণনা

ততিযে হন্দাতি গণ্হ. অচ্ছিন্দেয্যাতি সযং অচ্ছিন্দন্তিযা বন্ধিত্ৱা ঠপিতেসু বহূসুপি একাপত্তি, ইতৰেসু ৱত্থুগণনায আপত্তিযো. অচ্ছিন্দাপনে পন একায আণত্তিযা বহূসু অচ্ছিন্নেসুপি একাৱাপত্তি.

সাৱত্থিযং থুল্লনন্দং আৰব্ভ চীৱৰং পৰিৱত্তেত্ৱা অচ্ছিন্দনৱত্থুস্মিং পঞ্ঞত্তং, সাণত্তিকং, তিকপাচিত্তিযং, অঞ্ঞস্মিং পৰিক্খাৰে তিকদুক্কটং, অনুপসম্পন্নায চীৱৰেপি তিকদুক্কটমেৱ. যা পন তায ৱা দিয্যমানং, তস্সা ৱা ৱিস্সাসং গণ্হাতি, তস্সা, উম্মত্তিকাদীনঞ্চ অনাপত্তি. উপসম্পন্নতা, পৰিৱত্তিতচীৱৰস্স ৱিকপ্পনুপগতা, সকসঞ্ঞায অচ্ছিন্দনং ৱা অচ্ছিন্দাপনং ৱাতি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানি, ইদং পন দুক্খৱেদনন্তি.

চীৱৰপৰিৱত্তনসিক্খাপদৱণ্ণনা নিট্ঠিতা.

৪. অঞ্ঞৱিঞ্ঞাপনসিক্খাপদৱণ্ণনা

চতুত্থে ৱিঞ্ঞাপেত্ৱাতি জানাপেত্ৱা, ‘‘ইদং নাম আহৰা’’তি যাচিত্ৱা ৱা. অঞ্ঞং ৱিঞ্ঞাপেয্যাতি যং পুব্বে ‘‘কিন্তে, অয্যে, অফাসু, কিং আহৰিযতূ’’তি ৱুত্তায ৱিঞ্ঞাপিতং, তং পটিক্খিপিত্ৱা তঞ্চেৱ অঞ্ঞঞ্চ গহেতুকামা ততো অঞ্ঞং ৱিঞ্ঞাপেয্য, তস্সা ৱিঞ্ঞত্তিযা দুক্কটং, পটিলাভেন নিস্সগ্গিযং হোতি.

সাৱত্থিযং থুল্লনন্দং আৰব্ভ অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপনৱত্থুস্মিং পঞ্ঞত্তং, তিকপাচিত্তিযং, অনঞ্ঞে দ্ৱিকদুক্কটং. অনঞ্ঞে অনঞ্ঞসঞ্ঞায পন, তস্মিং অপ্পহোন্তে পুন তঞ্ঞেৱ, অঞ্ঞেনপি অত্থে সতি তেন সদ্ধিং অঞ্ঞঞ্চ, যঞ্চ ৱিঞ্ঞত্তং, ততো চে অঞ্ঞং সমগ্ঘতৰং হোতি, ইমং আনিসংসং দস্সেত্ৱা সুদ্ধং অঞ্ঞমেৱ চ ৱিঞ্ঞাপেন্তিযা, উম্মত্তিকাদীনঞ্চ অনাপত্তি. লেসেন গহেতুকামতা, অঞ্ঞস্স ৱিঞ্ঞাপনং, পটিলাভোতি ইমানেত্থ তীণি অঙ্গানি. সমুট্ঠানাদীনি সঞ্চৰিত্তসদিসানীতি.

অঞ্ঞৱিঞ্ঞাপনসিক্খাপদৱণ্ণনা নিট্ঠিতা.

৫. অঞ্ঞচেতাপনসিক্খাপদৱণ্ণনা

পঞ্চমে অঞ্ঞং চেতাপেত্ৱাতি অত্তনো কপ্পিযভণ্ডেন ‘‘ইদং নাম আহৰা’’তি অঞ্ঞং পৰিৱত্তাপেত্ৱা. অঞ্ঞং চেতাপেয্যাতি ‘‘এৱং মে ইদং দত্ৱা অঞ্ঞম্পি আহৰিস্সতী’’তি মঞ্ঞমানা ‘‘ন মে ইমিনা অত্থো, ইদং নাম মে আহৰা’’তি ততো অঞ্ঞং চেতাপেয্য. তস্সা চেতাপনপ্পযোগে দুক্কটং, পটিলাভেন তেন ৱা অঞ্ঞেন ৱা মূলেন আহটং নিস্সগ্গিযং হোতি, সেসং চতুত্থসদিসমেৱাতি.

অঞ্ঞচেতাপনসিক্খাপদৱণ্ণনা নিট্ঠিতা.

৬. পঠমসঙ্ঘিকচেতাপনসিক্খাপদৱণ্ণনা

ছট্ঠে অঞ্ঞদত্থিকেনাতি অঞ্ঞস্সত্থায দিন্নেন. অঞ্ঞুদ্দিসিকেনাতি অঞ্ঞং উদ্দিসিত্ৱা দিন্নেন. সঙ্ঘিকেনাতি সঙ্ঘস্স পৰিচ্চত্তেন. পৰিক্খাৰেনাতি কপ্পিযভণ্ডেন. অঞ্ঞং চেতাপেয্যাতি ‘‘ইদং নাম পৰিভুঞ্জেয্যাথা’’তি যং উদ্দিসিত্ৱা নিযমেত্ৱা যো পৰিক্খাৰো দিন্নো, ততো অঞ্ঞং পৰিৱত্তাপেয্য, তস্সা পযোগে দুক্কটং, পটিলাভেন নিস্সগ্গিযং.

সাৱত্থিযং সম্বহুলা ভিক্খুনিযো আৰব্ভ তাদিসেন পৰিক্খাৰেন অঞ্ঞং চেতাপনৱত্থুস্মিং পঞ্ঞত্তং, তিকপাচিত্তিযং, অনঞ্ঞদত্থিকে দ্ৱিকদুক্কটং. তস্মিং পন অনঞ্ঞদত্থিকসঞ্ঞায, সেসকং উপনেন্তিযা, ‘‘তুম্হেহি এতদত্থায দিন্নো, অম্হাকঞ্চ ইমিনা নাম অত্থো’’তি সামিকে অপলোকেত্ৱা উপনেন্তিযা, যদা ভিক্খুনিযো ৱিহাৰম্পি ছড্ডেত্ৱা পক্কমন্তি, এৱৰূপাসু আপদাসু উপনেন্তীনং, উম্মত্তিকাদীনঞ্চ অনাপত্তি. সেসং চতুত্থসদিসমেৱাতি.

পঠমসঙ্ঘিকচেতাপনসিক্খাপদৱণ্ণনা নিট্ঠিতা.

৭. দুতিযসঙ্ঘিকচেতাপনসিক্খাপদৱণ্ণনা

সত্তমে সঞ্ঞাচিকেনাতি সযং যাচিতকেনাপি. এতদেৱেত্থ নানাকৰণং, সেসং ছট্ঠসদিসমেৱাতি.

দুতিযসঙ্ঘিকচেতাপনসিক্খাপদৱণ্ণনা নিট্ঠিতা.

৮. পঠমগণিকচেতাপনসিক্খাপদৱণ্ণনা

অট্ঠমে মহাজনিকেনাতি গণস্স পৰিচ্চত্তেন, ইদমেত্থ ছট্ঠতো নানাকৰণং.

পঠমগণিকচেতাপনসিক্খাপদৱণ্ণনা নিট্ঠিতা.

৯. দুতিযগণিকচেতাপনসিক্খাপদৱণ্ণনা

নৱমে সঞ্ঞাচিকেনাতি ইদং অট্ঠমতো অতিৰিত্তং, সেসং দ্ৱীসুপি ছট্ঠসিক্খাপদসদিসমেৱাতি.

দুতিযগণিকচেতাপনসিক্খাপদৱণ্ণনা নিট্ঠিতা.

১০. পুগ্গলিকচেতাপনসিক্খাপদৱণ্ণনা

দসমে পুগ্গলিকেনাতি একভিক্খুনিযা পৰিচ্চত্তেন. সঞ্ঞাচিকেনাতি সযং যাচিতকেন চ. অঞ্ঞং চেতাপেয্যাতি যং উদ্দিসিত্ৱা দিন্নং, ততো অঞ্ঞং চেতাপেন্তিযা পযোগে দুক্কটং, পটিলাভেন নিস্সগ্গিযং হোতি.

সাৱত্থিযং থুল্লনন্দং আৰব্ভ তাদিসেন পৰিক্খাৰেন অঞ্ঞং চেতাপনৱত্থুস্মিং পঞ্ঞত্তং, সেসং ছট্ঠসদিসমেৱাতি.

পুগ্গলিকচেতাপনসিক্খাপদৱণ্ণনা নিট্ঠিতা.

পত্তৱগ্গো পঠমো.

১১. গৰুপাৱুৰণসিক্খাপদৱণ্ণনা

দুতিযস্স পঠমে গৰুপাৱুৰণন্তি সীতকালে পাৱুৰণং. চতুক্কংসপৰমন্তি কংসো নাম চতুক্কহাপণিকো হোতি, তস্মা সোড়সকহাপণগ্ঘনকং. চেতাপেতব্বন্তি ঠপেত্ৱা সহধম্মিকে চ ঞাতকপ্পৱাৰিতে চ অঞ্ঞেন কিস্মিঞ্চিদেৱ গুণে পৰিতুট্ঠেন ‘‘ৱদেথায্যে, যেনত্থো’’তি ৱুত্তায ৱিঞ্ঞাপেতব্বং. ততো চে উত্তৰীতি ততুত্তৰি ৱিঞ্ঞাপেন্তিযা দুক্কটং, পটিলদ্ধং নিস্সগ্গিযং হোতি.

সাৱত্থিযং থুল্লনন্দং আৰব্ভ ৰাজানং কম্বলং ৱিঞ্ঞাপনৱত্থুস্মিং পঞ্ঞত্তং, তিকপাচিত্তিযং, ঊনকচতুক্কংসে দ্ৱিকদুক্কটং. তস্মিং পন ঊনকসঞ্ঞায, চতুক্কংসপৰমং চেতাপেন্তিযা, ঞাতকপ্পৱাৰিতে ৱা, অঞ্ঞস্স ৱা অত্থায, অত্তনো ৱা ধনেন, মহগ্ঘং চেতাপেন্তং অপ্পগ্ঘং চেতাপেন্তিযা, উম্মত্তিকাদীনঞ্চ অনাপত্তি. গৰুপাৱুৰণতা, অতিৰেকচতুক্কংসতা, অননুঞ্ঞাতট্ঠানে ৱিঞ্ঞত্তি, পটিলাভোতি ইমানেত্থ চত্তাৰি অঙ্গানি. সমুট্ঠানাদীনি সঞ্চৰিত্তসদিসানীতি.

গৰুপাৱুৰণসিক্খাপদৱণ্ণনা নিট্ঠিতা.

১২. লহুপাৱুৰণসিক্খাপদৱণ্ণনা

দুতিযে লহুপাৱুৰণন্তি উণ্হকালে পাৱুৰণং. অড্ঢতেয্যকংসপৰমন্তি দসকহাপণগ্ঘনকং, সেসং পঠমসদিসমেৱাতি.

লহুপাৱুৰণসিক্খাপদৱণ্ণনা নিট্ঠিতা.

ইতো পৰানি ইমস্মিং ৱগ্গে অট্ঠ, ততিযৱগ্গে দসাতি ইমানি অট্ঠাৰস সিক্খাপদানি ভিক্খুপাতিমোক্খৱণ্ণনাযং ৱুত্তনযেনেৱ ৱেদিতব্বানীতি.

জাতৰূপৱগ্গো ততিযো.

উদ্দিট্ঠা খো অয্যাযো তিংস নিস্সগ্গিযা পাচিত্তিযা ধম্মাতি ভিক্খূ আৰব্ভ পঞ্ঞত্তা সাধাৰণা অট্ঠাৰস, অসাধাৰণা দ্ৱাদসাতি এৱং তিংস. সেসং সব্বত্থ উত্তানমেৱাতি.

কঙ্খাৱিতৰণিযা পাতিমোক্খৱণ্ণনায ভিক্খুনিপাতিমোক্খে

নিস্সগ্গিযপাচিত্তিযৱণ্ণনা নিট্ঠিতা.