সঙ্ঘাদিসেসকণ্ডো

১. উস্সযৱাদিকাসিক্খাপদৱণ্ণনা

সঙ্ঘাদিসেসেসু পঠমে উস্সযৱাদিকাতি মানুস্সযৱসেন কোধুস্সযৱসেন অড্ডকৰণত্থায ৱিনিচ্ছযমহামত্তানং সন্তিকে ৱিৱদমানা. গহপতিনা ৱাতিআদীহি ঠপেত্ৱা পঞ্চ সহধম্মিকে অৱসেসা গহট্ঠপব্বজিতা সঙ্গহিতা. অযং ভিক্খুনী পঠমাপত্তিকন্তি আদিম্হি পঠমং আপত্তি এতস্সাতি পঠমাপত্তিকো, ৱীতিক্কমক্খণেযেৱ আপজ্জিতব্বোতি অত্থো, তং পঠমাপত্তিকং. আপন্নাতি অড্ডপৰিযোসানে আপন্না. ভিক্খুনিং সঙ্ঘতো নিস্সাৰেতীতি নিস্সাৰণীযো, তং নিস্সাৰণীযং. সঙ্ঘাদিসেসন্তি এৱংনামকং.

সাৱত্থিযং থুল্লনন্দং আৰব্ভ উস্সযৱাদিকৱত্থুস্মিং পঞ্ঞত্তং, সাণত্তিকং, ‘‘অড্ডং কৰিস্সামী’’তি যংকিঞ্চি দুতিযিকং ৱা সক্খিং ৱা সহাযং ৱা পৰিযেসন্তিযা পৰিযেসনে দুক্কটং, যত্থ ঠিতায ‘‘অড্ডং কাতুং গচ্ছামী’’তি চিত্তং উপ্পজ্জতি, ততো পট্ঠায গচ্ছন্তিযা পদে পদে দুক্কটং, যত্থকত্থচি অন্তমসো ভিক্খুনুপস্সযং আগতেপি ৱোহাৰিকে দিস্ৱা অত্তনো কথং আৰোচেন্তিযা দুক্কটং. ইতৰেন অত্তনো কথায আৰোচিতায ভিক্খুনিযা থুল্লচ্চযং, পঠমং ইতৰেন পচ্ছা ভিক্খুনিযা আৰোচনেপি এসেৱ নযো. সচে পন ভিক্খুনী তং ৱদতি ‘‘মম চ তৱ চ কথং ত্ৱংযেৱ আৰোচেহী’’তি, সো অত্তনো ৱা কথং পঠমং আৰোচেতু, তস্সা ৱা, পঠমাৰোচনে ভিক্খুনিযা দুক্কটং, দুতিযে থুল্লচ্চযং, তেন এৱং ৱুত্তায ভিক্খুনিযা আৰোচনেপি এসেৱ নযো. সচে পন ভিক্খুনী অঞ্ঞেন কথাপেতি, তত্ৰাপি এসেৱ নযো. যথা ৱা তথা ৱা হি আৰোচিযমানে পঠমাৰোচনে ভিক্খুনিযা দুক্কটং, দুতিযে থুল্লচ্চযং. উভিন্নং পন কথং সুত্ৱা ৱোহাৰিকেহি ৱিনিচ্ছযে কতে অড্ডপৰিযোসানং নাম হোতি, তস্মিং অড্ডপৰিযোসানে ভিক্খুনিযা জযেপি পৰাজযেপি সঙ্ঘাদিসেসো.

যা পন পচ্চত্থিকমনুস্সেহি দূতং ৱা পহিণিত্ৱা, সযং ৱা আগন্ত্ৱা ‘‘এহি, অয্যে’’তি আকড্ঢিযমানা গচ্ছতি, যা ৱা উপস্সযে অঞ্ঞেহি কতং অনাচাৰং অনোদিস্স আচিক্খন্তী ৰক্খং যাচতি, যায চ কিঞ্চি অৱুত্তা ৱোহাৰিকা অঞ্ঞতো সুত্ৱা সযমেৱ অড্ডং পৰিযোসাপেন্তি, তস্সা, উম্মত্তিকাদীনঞ্চ অনাপত্তি. অঞ্ঞেহি অনাকড্ঢিতায অড্ডকৰণং, অড্ডপৰিযোসানন্তি ইমানেত্থ দ্ৱে অঙ্গানি. সমুট্ঠানাদীনি পঠমকথিনসদিসানি, ইদং পন কিৰিযমেৱাতি.

উস্সযৱাদিকাসিক্খাপদৱণ্ণনা নিট্ঠিতা.

২. চোৰিৱুট্ঠাপিকাসিক্খাপদৱণ্ণনা

দুতিযে যায পঞ্চমাসগ্ঘনকতো পট্ঠায যংকিঞ্চি পৰসন্তকং অৱহৰিতং, অযং চোৰী নাম, তং চোৰিং. ৱজ্ঝং ৱিদিতন্তি তেন কম্মেন ‘‘ৱধাৰহা অয’’ন্তি এৱং ৱিদিতং. অনপলোকেত্ৱাতি অনাপুচ্ছা. গণন্তি মল্লগণভটিপুত্তগণাদিকং. পূগন্তি ধম্মগণং. সেণিন্তি গন্ধিকসেণিদুস্সিকসেণিআদিকং. যত্থ যত্থ হি ৰাজানো গণাদীনং গামনিগমে নিয্যাতেন্তি ‘‘তুম্হেৱ এত্থ অনুসাসথা’’তি, তত্থ তত্থ তেযেৱ ইস্সৰা হোন্তি, তস্মা তে সন্ধায ইদং ৱুত্তং. এত্থ চ ৰাজানং ৱা গণাদিকে ৱা অপলোকেত্ৱাপি ভিক্খুনিসঙ্ঘো অপলোকেতব্বোৱ. অঞ্ঞত্ৰ কপ্পাতি তিত্থিযেসু ৱা অঞ্ঞভিক্খুনীসু ৱা পব্বজিতপুব্বা কপ্পা নাম, তং ঠপেত্ৱা অঞ্ঞং উপসম্পাদেন্তিযা গণআচৰিনী পত্তচীৱৰপৰিযেসনেসু সীমাসম্মুতিযা ঞত্তিযা চ দুক্কটং, দ্ৱীহি কম্মৱাচাহি থুল্লচ্চযং, কম্মৱাচাপৰিযোসানে সঙ্ঘাদিসেসো.

সাৱত্থিযং থুল্লনন্দং আৰব্ভ চোৰিং ৱুট্ঠাপনৱত্থুস্মিং পঞ্ঞত্তং, চোৰিযা ৱেমতিকায দুক্কটং, তথা অচোৰিযা চোৰিসঞ্ঞায চেৱ ৱেমতিকায চ. অচোৰিসঞ্ঞায, অজানন্তিযা, অপলোকেত্ৱা ৱুট্ঠাপেন্তিযা, কপ্পং ৱুট্ঠাপেন্তিযা, উম্মত্তিকাদীনঞ্চ অনাপত্তি. চোৰিতা, চোৰিসঞ্ঞিতা, অঞ্ঞত্ৰ অনুঞ্ঞাতকাৰণা ৱুট্ঠাপনন্তি, ইমানেত্থ তীণি অঙ্গানি. চোৰিৱুট্ঠাপনসমুট্ঠানং, কিৰিযাকিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

চোৰিৱুট্ঠাপিকাসিক্খাপদৱণ্ণনা নিট্ঠিতা.

৩. একগামন্তৰগমনসিক্খাপদৱণ্ণনা

ততিযে গামন্তৰন্তিআদীসু সকগামতো তাৱ নিক্খমন্তিযা অনাপত্তি, নিক্খমিত্ৱা পন অঞ্ঞং গামং গচ্ছন্তিযা পদে পদে দুক্কটং, একেন পাদেন ইতৰস্স গামস্স পৰিক্খেপে ৱা উপচাৰে ৱা অতিক্কন্তে থুল্লচ্চযং, দুতিযেন অতিক্কন্তমত্তে সঙ্ঘাদিসেসো, ততো নিক্খমিত্ৱা পুন সকগামং পৱিসন্তিযাপি এসেৱ নযো. সচে পন খণ্ডপাকাৰেন ৱা ৱতিচ্ছিদ্দেন ৱা ভিক্খুনিৱিহাৰভূমিংযেৱ সক্কা হোতি পৱিসিতুং, এৱং পৱিসমানায কপ্পিযভূমিযা পৱিট্ঠা নাম হোতি, তস্মা ৱট্টতি. বহিগামে ঠত্ৱা যংকিঞ্চি সকগামং ৱা পৰগামং ৱা অকপ্পিযভূমিং পদসা পৱিসন্তিযা আপত্তীতি অযমেত্থ সঙ্খেপো.

নদিপাৰগমনে ৱুত্তলক্খণায নদিযা দুতিযিকং ৱিনা পৰতীৰং গচ্ছন্তিযা ৱা অন্তৰানদিযং দুতিযিকায সদ্ধিং ভণ্ডিত্ৱা পুন ওৰিমতীৰমেৱ পচ্চুত্তৰন্তিযা ৱা পঠমপাদং উদ্ধৰিত্ৱা তীৰে ঠপিতক্খণে থুল্লচ্চযং, দুতিযপাদুদ্ধাৰে সঙ্ঘাদিসেসো. ইদ্ধিসেতুযাননাৱাহি পন পৰতীৰং ওতৰিতুং, নহানাদিকাৰণেন চ ওতিণ্ণায ওৰিমতীৰং পদসাপি পচ্চুত্তৰিতুং ৱট্টতি.

ৰত্তিৱিপ্পৱাসে ‘‘পুৰেঅৰুণেযেৱ দুতিযিকায হত্থপাসং ওক্কমিস্সামী’’তি আভোগং ৱিনা একগব্ভেপি দুতিযিকায হত্থপাসাতিক্কমে ঠত্ৱা অৰুণং উট্ঠাপেন্তিযা আপত্তি.

একা ৱা গণম্হাতি এত্থ পন একা ভিক্খুনীপি গণোযেৱ. ওহীযেয্যাতি অৱহীযেয্য, দস্সনূপচাৰং ৱা সৱনূপচাৰং ৱা ৱিজহেয্যাতি অত্থো. তস্মা ইন্দখীলাতিক্কমতো পট্ঠায বহিগামে ৰুক্খথম্ভসাণিপাকাৰাদিঅন্তৰিতভাৱেনাপি দুতিযিকায দস্সনূপচাৰে ৱিজহিতে সচেপি সৱনূপচাৰো অত্থি, আপত্তিযেৱ. অজ্ঝোকাসে পন দূৰেপি দস্সনূপচাৰো হোতি, তত্থ মগ্গমূড়্হসদ্দেন ৱিয ধম্মস্সৱনাৰোচনসদ্দেন ৱিয চ ‘অয্যে’তি সদ্দাযন্তিযা সদ্দস্সৱনাতিক্কমে আপত্তিযেৱ. সচে পন মগ্গং গচ্ছন্তী ওহীযিত্ৱা ‘‘ইদানি পাপুণিস্সামী’’তি সউস্সাহা অনুবন্ধতি, ৱট্টতি.

সাৱত্থিযং অঞ্ঞতৰং ভিক্খুনিং আৰব্ভ গামন্তৰগমনৱত্থুস্মিং পঞ্ঞত্তং, ‘‘একা ৱা নদিপাৰ’’ন্তিআদিকা এত্থ তিৱিধা অনুপঞ্ঞত্তি, পুৰে অৰুণে সকগামতো নিক্খমিত্ৱা অৰুণুগ্গমনকালে গামন্তৰপৰিযাপন্নং নদিপাৰং ওক্কমনন্তিযা পন চতস্সোপি আপত্তিযো একক্খণেযেৱ হোন্তি. ৱুত্তম্পি চেতং –

‘‘সিক্খাপদা বুদ্ধৱৰেন ৱণ্ণিতা;

সঙ্ঘাদিসেসা চতুৰো ভৱেয্যুং;

আপজ্জেয্য একপযোগেন সব্বা;

পঞ্হা মেসা কুসলেহি চিন্তিতা’’তি. (পৰি. ৪৭৯);

এতেনুপাযেন তিণ্ণং, দ্ৱিন্নঞ্চ একতোভাৱো ৱেদিতব্বো. দুতিযিকায পন পক্কন্তায ৱা ৱিব্ভন্তায ৱা কালঙ্কতায ৱা পক্খসঙ্কন্তায ৱা আপদাসু ৱা গামন্তৰগমনাদীনি কৰোন্তিযা উম্মত্তিকাদীনঞ্চ অনাপত্তি. অন্তৰাযেন একতোভাৱো, গামন্তৰগমনাদীসু অঞ্ঞতৰতাপজ্জনং, আপদায অভাৱোতি ইমানেত্থ তীণি অঙ্গানি. সমুট্ঠানাদীনি পঠমপাৰাজিকসদিসানি, ইদং পন পণ্ণত্তিৱজ্জং, তিচিত্তং, তিৱেদনন্তি.

একগামন্তৰগমনসিক্খাপদৱণ্ণনা নিট্ঠিতা.

৪. উক্খিত্তকওসাৰণসিক্খাপদৱণ্ণনা

চতুত্থে উক্খিত্তন্তি আপত্তিযা অদস্সনাদীসু উক্খিত্তং. অনঞ্ঞায গণস্স ছন্দন্তি তস্সেৱ কাৰকসঙ্ঘস্স ছন্দং অজানিত্ৱা. ওসাৰেয্যাতি ওসাৰণকম্মং কৰেয্য. তস্সা এৱং কৰোন্তিযা, গণপৰিযেসনে সীমাসম্মুতিযা ঞত্তিযা চ দুক্কটং, দ্ৱীহি কম্মৱাচাহি থুল্লচ্চযং, কম্মৱাচাপৰিযোসানে সঙ্ঘাদিসেসো.

সাৱত্থিযং থুল্লনন্দং আৰব্ভ এৱং ওসাৰণৱত্থুস্মিং পঞ্ঞত্তং, তিকসঙ্ঘাদিসেসং, অধম্মকম্মে তিকদুক্কটং, কাৰকসঙ্ঘং ৱা আপুচ্ছিত্ৱা, গণস্স ৱা ছন্দং জানিত্ৱা, ৱত্তে ৱা ৱত্তন্তিং, অসন্তে কাৰকসঙ্ঘে ওসাৰেন্তিযা, উম্মত্তিকাদীনঞ্চ অনাপত্তি. ধম্মকম্মেন উক্খিত্ততা, অঞ্ঞত্ৰ অনুঞ্ঞাতকাৰণা ওসাৰণন্তি ইমানেত্থ দ্ৱে অঙ্গানি. সমুট্ঠানাদীনি সঙ্ঘভেদসিক্খাপদে ৱুত্তনযানেৱ, ইদং পন কিৰিযাকিৰিযন্তি.

উক্খিত্তকওসাৰণসিক্খাপদৱণ্ণনা নিট্ঠিতা.

৫. ভোজনপ্পটিগ্গহণপঠমসিক্খাপদৱণ্ণনা

পঞ্চমে অৱস্সুতাতি ছন্দৰাগেন তিন্তা. অৱস্সুতস্সাতি তাদিসস্সেৱ. খাদেয্য ৱা ভুঞ্জেয্য ৱাতি এত্থ পটিগ্গহণে থুল্লচ্চযং, অজ্ঝোহাৰে অজ্ঝোহাৰে সঙ্ঘাদিসেসো.

সাৱত্থিযং সুন্দৰীনন্দং আৰব্ভ অৱস্সুতায অৱস্সুতস্স হত্থতো আমিসপ্পটিগ্গহণৱত্থুস্মিং পঞ্ঞত্তং, একতোঅৱস্সুতে পটিগ্গহণে দুক্কটং, অজ্ঝোহাৰে অজ্ঝোহাৰে থুল্লচ্চযং, যক্খপেতপণ্ডকতিৰচ্ছানগতমনুস্সৱিগ্গহানং হত্থতো উভতোঅৱস্সুতেপি সতি এসেৱ নযো. তত্থ পন একতোঅৱস্সুতে সতি দুক্কটং, সব্বত্থ উদকদন্তপোনগ্গহণেপি পৰিভোগেপি দুক্কটমেৱ. উভোসু অনৱস্সুতেসু, ‘‘অনৱস্সুতো’’তি ৱা ঞত্ৱা গণ্হন্তিযা, উম্মত্তিকাদীনঞ্চ অনাপত্তি. উদকদন্তপোনতো অঞ্ঞং অজ্ঝোহৰণীযং, উভতোঅৱস্সুততা, সহত্থা গহণং, অজ্ঝোহৰণন্তি ইমানেত্থ চত্তাৰি অঙ্গানি. সমুট্ঠানাদীনি পঠমপাৰাজিকসদিসানীতি.

ভোজনপ্পটিগ্গহণপঠমসিক্খাপদৱণ্ণনা নিট্ঠিতা.

৬. ভোজনপ্পটিগ্গহণদুতিযসিক্খাপদৱণ্ণনা

ছট্ঠে যতো ত্ৱন্তি যস্মা ত্ৱং. ইঙ্ঘাতি উয্যোজনত্থে নিপাতো. অযম্পীতি যা এৱং উয্যোজেতি, সা এৱং উয্যোজনেন চ তেন ৱচনেন ইতৰিস্সা পটিগ্গহণেন চ দুক্কটানি, অজ্ঝোহাৰগণনায থুল্লচ্চযানি চ আপজ্জিত্ৱা ভোজনপৰিযোসানে সঙ্ঘাদিসেসং আপজ্জতি.

সাৱত্থিযং অঞ্ঞতৰং ভিক্খুনিং আৰব্ভ এৱং উয্যোজনৱত্থুস্মিং পঞ্ঞত্তং, সাণত্তিকমেৱ, পুৰিসস্স ৱা যক্খাদীনং ৱা হত্থতো উদকদন্তপোনপ্পটিগ্গহণুয্যোজনে চ তেসং পৰিভোগে চ দুক্কটং, এস নযো যক্খাদীনং হত্থতো অৱসেসগ্গহণত্থং উয্যোজনে, তেসং গহণে, অজ্ঝোহাৰে চ. ভোজনপৰিযোসানে পন থুল্লচ্চযং. ‘‘অনৱস্সুতো’’তি ঞত্ৱা ৱা, ‘‘কুপিতা ন পটিগ্গণ্হতী’’তি ৱা, ‘‘কুলানুদ্দযতায ন পটিগ্গণ্হতী’’তি ৱা উয্যোজেন্তিযা, উম্মত্তিকাদীনঞ্চ অনাপত্তি. মনুস্সপুৰিসতা, অঞ্ঞত্ৰ অনুঞ্ঞাতকাৰণা, ‘‘খাদনীযং ভোজনীযং গহেত্ৱা ভুঞ্জা’’তি উয্যোজনা, তেন ৱচনেন গহেত্ৱা ইতৰিস্সা ভোজনপৰিযোসানন্তি ইমানেত্থ তীণি অঙ্গানি. সমুট্ঠানাদীনি অদিন্নাদানসদিসানীতি.

ভোজনপ্পটিগ্গহণদুতিযসিক্খাপদৱণ্ণনা নিট্ঠিতা.

৭-৮-৯. সঞ্চৰিত্তাদিসিক্খাপদৱণ্ণনা

সত্তমঅট্ঠমনৱমসিক্খাপদানং সঞ্চৰিত্তাদিত্তযে ৱুত্তনযেনেৱ ৱিনিচ্ছযো ৱেদিতব্বো.

সঞ্চৰিত্তাদিসিক্খাপদৱণ্ণনা নিট্ঠিতা.

১০. সিক্খংপচ্চাচিক্খণসিক্খাপদৱণ্ণনা

দসমে কিংনুমাৱ সমণিযোতি কিংনু ইমা এৱ সমণিযো. তাসাহন্তি তাসং অহং. যাৱততিযকপদত্থো ভিক্খুপাতিমোক্খৱণ্ণনাযং (কঙ্খা. অট্ঠ. নিগমনৱণ্ণনা), অৱসেসৱিনিচ্ছযো চ তত্থেৱ সঙ্ঘভেদসিক্খাপদৱণ্ণনাযং ৱুত্তনযেনেৱ ৱেদিতব্বো, ইদং পন সাৱত্থিযং চণ্ডকাড়িভিক্খুনিং (পাচি. ৭০৯) আৰব্ভ ‘‘বুদ্ধং পচ্চাচিক্খামী’’তিআদিৱচনৱত্থুস্মিং পঞ্ঞত্তং, এৱং ৱচনমেৱ চেত্থ চতূসু অঙ্গেসু পঠমং অঙ্গন্তি অযং ৱিসেসো, সেসং তাদিসমেৱাতি.

সিক্খংপচ্চাচিক্খণসিক্খাপদৱণ্ণনা নিট্ঠিতা.

১১. অধিকৰণকুপিতসিক্খাপদৱণ্ণনা

একাদসমে কিস্মিঞ্চিদেৱ অধিকৰণেতি চতুন্নং অঞ্ঞতৰস্মিং. পচ্চাকতাতি পৰাজিতা. ইদম্পি সাৱত্থিযং চণ্ডকাড়িং আৰব্ভ ‘‘ছন্দগামিনিযো চ ভিক্খুনিযো’’তিআদিৱচনৱত্থুস্মিং পঞ্ঞত্তং, সেসং দসমে ৱুত্তনযেনেৱ ৱেদিতব্বন্তি.

অধিকৰণকুপিতসিক্খাপদৱণ্ণনা নিট্ঠিতা.

১২. পাপসমাচাৰপঠমসিক্খাপদৱণ্ণনা

দ্ৱাদসমে সংসট্ঠাতি পব্বজিতানং অননুলোমেন গিহীনং কোট্টনপচনসাসনহৰণাদিনা কাযিকৱাচসিকেন মিস্সীভূতা. পাপো কাযিকৱাচসিকো আচাৰো এতাসন্তি পাপাচাৰা. পাপো কিত্তিসদ্দো এতাসন্তি পাপসদ্দা. পাপো আজীৱসঙ্খাতো সিলোকো এতাসন্তি পাপসিলোকা. ভিক্খুনিসঙ্ঘস্স ৱিহেসিকাতি অঞ্ঞমঞ্ঞিস্সা কম্মে কৰিযমানে পটিক্কোসনেন ৱিহেসিকা. ৱজ্জপ্পটিচ্ছাদিকাতি খুদ্দানুখুদ্দকস্স ৱজ্জস্স পটিচ্ছাদিকা.

সাৱত্থিযং সম্বহুলা ভিক্খুনিযো আৰব্ভ সংসট্ঠৱিহাৰৱত্থুস্মিং পঞ্ঞত্তং, সেসমেত্থাপি দসমে ৱুত্তনযেনেৱ ৱেদিতব্বং, সমনুভাসনকম্মকালে পন দ্ৱেতিস্সো একতো সমনুভাসিতব্বাতি.

পাপসমাচাৰপঠমসিক্খাপদৱণ্ণনা নিট্ঠিতা.

১৩. পাপসমাচাৰদুতিযসিক্খাপদৱণ্ণনা

তেৰসমে এৱং ৱদেয্যাতি তা সমনুভট্ঠা ভিক্খুনিযো এৱং ৱদেয্য. এৱাচাৰাতি এৱংআচাৰা, যাদিসো তুম্হাকং আচাৰো, তাদিসো আচাৰোতি অত্থো, এস নযো সব্বত্থ. উঞ্ঞাযাতি অৱঞ্ঞায নীচং কত্ৱা জাননায. পৰিভৱেনাতি ‘‘কিং ইমা কৰিস্সন্তী’’তি এৱং পৰিভৱিত্ৱা জাননেন. অক্খন্তিযাতি অসহনতায, কোধেনাতি অত্থো. ৱেভস্সিযাতি বলৱন্তস্স ভাৱেন, অত্তনো বলপ্পকাসনেন সমুত্ৰাসেনাতি অত্থো. দুব্বল্যাতি তুম্হাকং দুব্বলভাৱেন, সব্বত্থ উঞ্ঞায চ পৰিভৱেন চাতি এৱং সমুচ্চযত্থো দট্ঠব্বো. ৱিৱিচ্চথাতি নানা হোথ, অননুলোমিকং কাযিকৱাচসিকসংসগ্গং পজহথাতি অত্থো.

সাৱত্থিযং থুল্লনন্দং আৰব্ভ ‘‘সংসট্ঠাৱ, অয্যে, তুম্হে ৱিহৰথ, মা তুম্হে নানা ৱিহৰিত্থা’’তি উয্যোজনৱত্থুস্মিং পঞ্ঞত্তং, সেসমেত্থাপি দসমে ৱুত্তনযেনেৱ ৱেদিতব্বন্তি.

পাপসমাচাৰদুতিযসিক্খাপদৱণ্ণনা নিট্ঠিতা.

১৪. সঙ্ঘভেদকাদিসিক্খাপদৱণ্ণনা

সঙ্ঘভেদাদীসু চতূসু ৱুত্তনযেনেৱ ৱিনিচ্ছযো ৱেদিতব্বো. কেৱলঞ্হি ভিক্খুনী সঙ্ঘং ন ভিন্দতি, ভেদায পন পৰক্কমতি চেৱ অনুৱত্ততি চ. উদ্দিট্ঠা খো অয্যাযো সত্তৰস সঙ্ঘাদিসেসা ধম্মাতি ভিক্খূ আৰব্ভ পঞ্ঞত্তা সাধাৰণা সত্ত, অসাধাৰণা দসাতি এৱং সত্তৰস. উভতোসঙ্ঘে পক্খমানত্তং চৰিতব্বন্তি ভিক্খুনিযা হি আপত্তিং ছাদেন্তিযাপি পৰিৱাসো নাম নত্থি, ছাদনপচ্চযাপি ন দুক্কটং আপজ্জতি, তস্মা ছাদেত্ৱাপি অছাদেত্ৱাপি একং পক্খমানত্তমেৱ চৰিতব্বং. তং ভিক্খুনীহি অত্তনো সীমং সোধেত্ৱা ৱিহাৰসীমায ৱা, সোধেতুং অসক্কোন্তীহি খণ্ডসীমায ৱা সব্বন্তিমেন পৰিচ্ছেদেন চতুৱগ্গং গণং সন্নিপাতাপেত্ৱা দাতব্বং. সচে একা আপত্তি হোতি, একিস্সা ৱসেন, সচে দ্ৱে ৱা তিস্সো ৱা সম্বহুলা ৱা একৱত্থুকা ৱা নানাৱত্থুকা ৱা, তাসং তাসং ৱসেন ভিক্খুপাতিমোক্খৱণ্ণনাযং ৱুত্তৱত্থুগোত্তনামআপত্তিভেদেসু যং যং ইচ্ছতি, তং তং আদায যোজনা কাতব্বা.

তত্ৰিদং পঠমাপত্তিৱসেন মুখমত্তনিদস্সনং – তায আপন্নায ভিক্খুনিযা ভিক্খুনিসঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্সৱচনীযো ‘‘অহং, অয্যে, একং আপত্তিং আপজ্জিং উস্সযৱাদং, সাহং, অয্যে, সঙ্ঘং একিস্সা আপত্তিযা উস্সযৱাদায পক্খমানত্তং যাচামী’’তি, এৱং তিক্খত্তুং যাচাপেত্ৱা ব্যত্তায ভিক্খুনিযা পটিবলায সঙ্ঘো ঞাপেতব্বো –

‘‘সুণাতু মে, অয্যে, সঙ্ঘো, অযং ইত্থন্নামা ভিক্খুনী একং আপত্তিং আপজ্জিং উস্সযৱাদং, সা সঙ্ঘং একিস্সা আপত্তিযা উস্সযৱাদায পক্খমানত্তং যাচতি, যদি সঙ্ঘস্স পত্তকল্লং, সঙ্ঘো ইত্থন্নামায ভিক্খুনিযা একিস্সা আপত্তিযা উস্সযৱাদায পক্খমানত্তং দদেয্য, এসা ঞত্তি.

‘‘সুণাতু মে, অয্যে, সঙ্ঘো, অযং ইত্থন্নামা ভিক্খুনী…পে… দুতিযম্পি…পে… ততিযম্পি এতমত্থং ৱদামি, সুণাতু মে, অয্যে, সঙ্ঘো…পে… সা ভাসেয্য. দিন্নং সঙ্ঘেন ইত্থন্নামায ভিক্খুনিযা একিস্সা আপত্তিযা উস্সযৱাদায পক্খমানত্তং. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

কম্মৱাচাপৰিযোসানে ‘‘ৱত্তং সমাদিযামি, মানত্তং সমাদিযামী’’তি সমাদিযিত্ৱা সঙ্ঘস্স আৰোচেত্ৱা নিক্খিত্তৱত্তেন তাৱ ৱসিতুকামায তত্থেৱ সঙ্ঘমজ্ঝে ৱা পক্কন্তাসু ভিক্খুনীসু একভিক্খুনিযা ৱা দুতিযিকায ৱা সন্তিকে ‘‘ৱত্তং নিক্খিপামি, মানত্তং নিক্খিপামী’’তি নিক্খিপিতব্বং. অঞ্ঞিস্সা পন আগন্তুকায সন্তিকে আৰোচেত্ৱা নিক্খিপিতব্বং, নিক্খিত্তকালতো পট্ঠায পকতত্তট্ঠানে তিট্ঠতি, ততো পুৰেঅৰুণেযেৱ চতূহি ভিক্খুনীহি তং ভিক্খুনিং গহেত্ৱা গামূপচাৰতো চ ভিক্খূনং ৱিহাৰূপচাৰতো চ দ্ৱে লেড্ডুপাতে অতিক্কমিত্ৱা মহামগ্গা ওক্কম্ম গুম্বৱতিআদীহি পটিচ্ছন্নে ওকাসে নিসীদিতব্বং. চতূহি ভিক্খূহিপি তত্থ গন্তব্বং, গন্ত্ৱা ভিক্খুনীনং অৱিদূৰে ৱিসুং নিসীদিতব্বং. অথ তায ভিক্খুনিযা ৱুত্তনযেনেৱ ৱত্তং সমাদিযিত্ৱা ভিক্খুনিসঙ্ঘস্স তাৱ এৱং আৰোচেতব্বং –

‘‘অহং, অয্যে, একং আপত্তিং আপজ্জিং উস্সযৱাদং, সাহং সঙ্ঘং একিস্সা আপত্তিযা উস্সযৱাদায পক্খমানত্তং যাচিং, তস্সা মে সঙ্ঘো একিস্সা আপত্তিযা উস্সযৱাদায পক্খমানত্তং অদাসি, সাহং মানত্তং চৰামি, ৱেদযামহং, অয্যে, ‘ৱেদযতী’তি মং সঙ্ঘো ধাৰেতূ’’তি.

ততো ভিক্খুসঙ্ঘস্স সন্তিকং গন্ত্ৱা এৱং আৰোচেতব্বং ‘‘অহং, অয্যা, একং আপত্তিং আপজ্জিং…পে… ৱেদযামহং, অয্যা, ‘ৱেদযতী’তি মং সঙ্ঘো ধাৰেতূ’’তি. আৰোচেত্ৱা ভিক্খুনিসঙ্ঘস্সেৱ সন্তিকে নিসীদিতব্বং, ততো পট্ঠায ভিক্খূসু ৱা, দুতিযিকং ঠপেত্ৱা ভিক্খুনীসু ৱা পক্কন্তাসুপি উভতোসঙ্ঘে মানত্তং চিণ্ণমেৱ হোতি. যাৱ অৰুণং ন উট্ঠহতি, তাৱ যং পঠমং পস্সতি ভিক্খুং ৱা ভিক্খুনিং ৱা, তস্সা আৰোচেতব্বং. উট্ঠিতে অৰুণে ৱত্তং নিক্খিপিত্ৱা উপস্সযং গন্তব্বং, এৱং পঞ্চদস অৰুণা গহেতব্বা.

অনিক্খিত্তৱত্তায পন আগন্তুকেসু অসতি চতুন্নং ভিক্খূনঞ্চ ভিক্খুনীনঞ্চ দেৱসিকং আৰোচেত্ৱা, আগন্তুকেসু সতি সব্বেসম্পি আগন্তুকানং আৰোচেন্তিযা পঞ্চদস দিৱসানি পাৰিৱাসিকক্খন্ধকে (চূড়ৱ. ৭৫ আদযো) ৱুত্তনযেনেৱ সম্মা ৱত্তিতব্বন্তি অযমেত্থ সঙ্খেপো, ৱিত্থাৰো পন সমন্তপাসাদিকাযং (চূড়ৱ. অট্ঠ. ৭৫ আদযো) ৱুত্তো, চিণ্ণমানত্তায ভিক্খুনিযাতি যদা এৱং চিণ্ণমানত্তা ভিক্খুনী হোতি, অথস্সা যত্থ সিযা ৱীসতিগণো ভিক্খুনিসঙ্ঘোতি ৱুত্তনযেনেৱ অব্ভানকম্মং কাতব্বং, সেসং উত্তানমেৱাতি.

কঙ্খাৱিতৰণিযা পাতিমোক্খৱণ্ণনায

ভিক্খুনিপাতিমোক্খে

সঙ্ঘাদিসেসৱণ্ণনা নিট্ঠিতা.