পাৰাজিককণ্ডো

ভিক্খুনীনং হিতত্থায, পাতিমোক্খং পকাসযি;

যং নাথো, তস্স দানেসো, সম্পত্তো ৱণ্ণনাক্কমো.

সাধাৰণপাৰাজিকং

১…পে…৪. মেথুনধম্মসিক্খাপদৱণ্ণনা

তত্থ সুণাতু মেতিআদীনং ভিক্খুপাতিমোক্খৱণ্ণনাযং ৱুত্তনযেনেৱ অত্থো ৱেদিতব্বো. কেৱলঞ্হি, ভন্তে, অয্যেতিআদিৱসেন তস্মিঞ্চ ইধ চ অভিলাপমত্তমেৱ লিঙ্গভেদমত্তঞ্চ ৱিসেসো. যস্মা চ ভিক্খুনিযা সিক্খাপচ্চক্খানং নাম নত্থি, তস্মা ভিক্খুনীনং ‘‘সিক্খাসাজীৱসমাপন্না সিক্খং অপচ্চক্খায দুব্বল্যং অনাৱিকত্ৱা’’তি অৱত্ৱা যা পন ভিক্খুনী ছন্দসো মেথুনং ধম্মং পটিসেৱেয্যাতি ৱুত্তং. তত্থ ছন্দসোতি মেথুনৰাগপ্পটিসংযুত্তেন ছন্দেন চেৱ ৰুচিযা চ. ছন্দে পন অসতি বলক্কাৰেন পধংসিতায অনাপত্তি, তস্মা যা পৰিপুণ্ণূপসম্পদা ভিক্খুনী মনুস্সামনুস্সতিৰচ্ছানজাতীসু পুৰিসউভতোব্যঞ্জনকপণ্ডকানং যস্স কস্সচি সজীৱস্স ৱা নিজ্জীৱস্স ৱা সন্থতস্স ৱা অসন্থতস্স ৱা অক্খাযিতস্স ৱা যেভুয্যেন অক্খাযিতস্স ৱা অঙ্গজাতস্স অত্তনো ৱচ্চমগ্গপস্সাৱমগ্গমুখেসু তীসু যত্থকত্থচি সন্থতে ৱা অসন্থতে ৱা পকতিৱাতেন অসংফুট্ঠে অল্লোকাসে অন্তমসো তিলফলমত্তম্পি পদেসং ছন্দসো পৱেসেতি, পৰেন ৱা পৱেসিযমানা পৱেসনপৱিট্ঠট্ঠিতউদ্ধৰণেসু যংকিঞ্চি সাদিযতি, অযং পাৰাজিকা হোতি. সেসমেত্থ ইতো পৰেসু চ সাধাৰণসিক্খাপদেসু ৱুত্তনযানুসাৰেনেৱ ৱেদিতব্বং.

অসাধাৰণপাৰাজিকং

৫. উব্ভজাণুমণ্ডলিকাসিক্খাপদৱণ্ণনা

অসাধাৰণেসু পন চতুন্নং তাৱ পাৰাজিকানং পঠমে অৱস্সুতাতি কাযসংসগ্গৰাগেন তিন্তা, কিলিন্নাতি অত্থো. দুতিযপদেপি এসেৱ নযো. পুৰিসপুগ্গলস্সাতি কাযসংসগ্গং সমাপজ্জিতুং ৱিঞ্ঞুস্স মনুস্সজাতিকস্স পুৰিসসঙ্খাতস্স পুগ্গলস্স. অধক্খকন্তি অত্তনো অক্খকানং অধো. উব্ভজাণুমণ্ডলন্তি জাণুমণ্ডলানং উপৰি, এত্থ চ উব্ভকপ্পৰম্পি উব্ভজাণুমণ্ডলেনেৱ সঙ্গহিতং. আমসনন্তি আমজ্জনং ফুট্ঠোকাসং অনতিক্কমিত্ৱা তত্থেৱ সঙ্ঘট্টনং. পৰামসনন্তি ইতো চিতো চ সঞ্চৰণং. গহণন্তি গহিতমত্তং. ছুপনন্তি অসঙ্ঘট্টেত্ৱা ফুট্ঠমত্তং. পটিপীড়নন্তি অঙ্গে গহেত্ৱা নিপ্পীড়নং. সাদিযেয্যাতি যা ভিক্খুনী অত্তনো যথাপৰিচ্ছিন্নে কাযে পুৰিসস্স এতং আমসনাদিং সাদিযতি, সযং ৱা পন তেন কাযেন পুৰিসস্স যংকিঞ্চি কাযপ্পদেসং সাদযমানা ছুপতি, অযং উব্ভজাণুমণ্ডলিকা নাম পাৰাজিকাতি অযমেত্থ সঙ্খেপো.

‘‘নিদানং পুগ্গলং ৱত্থু’’ন্তিআদিকে (কঙ্খা. অট্ঠ. পঠমপাৰাজিকৱণ্ণনা) তেন ৱিত্থাৰৱিনিচ্ছযে যস্মা সব্বানেৱ অসাধাৰণপঞ্ঞত্তিযো হোন্তি, তস্মা ইতো পট্ঠায সন্তিং অনুপঞ্ঞত্তিং ৱত্ৱা সাধাৰণপঞ্ঞত্তীতি ৱা অসাধাৰণপঞ্ঞত্তীতি ৱা ন ৱক্খাম, আণত্তিযং যত্থ আণত্তি নত্থি, তত্থ কিঞ্চি অৱত্ৱা যত্থ অত্থি, তত্থেৱ ৱক্খাম, ৱিপত্তিৱিচাৰণা ৱুত্তাযেৱ.

অৱসেসং পন সব্বত্থ ৱত্তব্বং, তযিদং ৱুচ্চতি, ইদং তাৱ সিক্খাপদং সাৱত্থিযং সুন্দৰীনন্দং আৰব্ভ কাযসংসগ্গং সমাপজ্জনৱত্থুস্মিং পঞ্ঞত্তং, একতোঅৱস্সুতে যথাপৰিচ্ছিন্নেন কাযেন পুৰিসস্স কাযং, উভতোঅৱস্সুতেপি কাযেন কাযপ্পটিবদ্ধং, যথাপৰিচ্ছিন্নকাযপ্পটিবদ্ধেন ৱা অৱসেসকাযেন ৱা তস্স কাযং আমসন্তিযা থুল্লচ্চযং, যক্খপেতপণ্ডকতিৰচ্ছানগতমনুস্সৱিগ্গহানং উভতোঅৱস্সুতে যথাপৰিচ্ছিন্নেন কাযেন কাযং আমসন্তিযাপি থুল্লচ্চযং, সচে পন পুৰিসস্স কাযসংসগ্গৰাগো নত্থি, পাৰাজিকক্খেত্তেপি থুল্লচ্চযমেৱ. অৱসেসে পন কাযপ্পটিবদ্ধেন কাযপ্পটিবদ্ধাদিভেদে, মেথুনৰাগগেহসিতপেমেসু চ সব্বত্থ দুক্কটং. অসঞ্চিচ্চ, অস্সতিযা, অজানন্তিযা, অসাদিযন্তিযা, উম্মত্তিকাদীনঞ্চ অনাপত্তি. অঙ্গানি সমুট্ঠানাদীনি চ ভিক্খুপাতিমোক্খে কাযসংসগ্গে ৱুত্তনযেনেৱ ৱেদিতব্বানীতি.

উব্ভজাণুমণ্ডলিকাসিক্খাপদৱণ্ণনা নিট্ঠিতা.

৬. ৱজ্জপ্পটিচ্ছাদিকাসিক্খাপদৱণ্ণনা

দুতিযে গণস্সাতি অঞ্ঞাসং ভিক্খুনীনং. ঠিতাতি সলিঙ্গে ঠিতা. চুতাতি কালঙ্কতা. নাসিতাতি লিঙ্গনাসনায সযং ৱা নট্ঠা, অঞ্ঞেহি ৱা নাসিতা. অৱস্সটাতি তিত্থাযতনং সঙ্কন্তা. পুব্বেৱাহং অয্যে অঞ্ঞাসিন্তি ইদং তস্সা ৱচনকালদস্সনং, সলিঙ্গে ঠিতায পন পাৰাজিকভাৱং ঞত্ৱা ‘‘ন দানি নং কস্সচি আৰোচেস্সামী’’তি ধুৰে নিক্খিত্তমত্তেযেৱ অযং ৱজ্জপ্পটিচ্ছাদিকা নাম পাৰাজিকা হোতীতি.

সাৱত্থিযং থুল্লনন্দং আৰব্ভ নেৱঅত্তনাপটিচোদনা নগণস্স আৰোচনৱত্থুস্মিং পঞ্ঞত্তং, সেসমেত্থ সপ্পাণকৱগ্গম্হি দুট্ঠুল্লাপত্তিপ্পটিচ্ছাদনসিক্খাপদে ৱুত্তনযেনেৱ ৱেদিতব্বং. তত্ৰ হি পাচিত্তিযং, ইধ পাৰাজিকন্তি অযমেৱ ৱিসেসো, সেসং তাদিসমেৱাতি.

ৱজ্জপ্পটিচ্ছাদিকাসিক্খাপদৱণ্ণনা নিট্ঠিতা.

৭. উক্খিত্তানুৱত্তিকাসিক্খাপদৱণ্ণনা

ততিযে উক্খিত্তন্তি আপত্তিযা অদস্সনাদীসু উক্খিত্তং. ধম্মেনাতি ভূতেন ৱত্থুনা. ৱিনযেনাতি চোদেত্ৱা সাৰেত্ৱা. সত্থুসাসনেনাতি ইধাপি চোদেত্ৱা সাৰেত্ৱা কৰণমেৱ সত্থুসাসনং নাম. অনাদৰন্তি যেন সঙ্ঘেন উক্খেপনিযকম্মং কতং, তস্মিং ৱা, তত্থ পৰিযাপন্নগণে ৱা একপুগ্গলে ৱা তস্মিং ৱা কম্মে আদৰৱিৰহিতং, সম্মাৱত্তনায অৱত্তমানন্তি অত্থো. অপ্পটিকাৰন্তি পটিকাৰৰহিতং, অনোসাৰিতন্তি অত্থো. অকতসহাযন্তি এককম্মাদিকে সংৱাসে সহ অযনভাৱেন সমানসংৱাসকা ভিক্খূ সহাযা নাম, যস্স পন সো সংৱাসো তেহি সদ্ধিং নত্থি ন তেন তে সহাযা কতা হোন্তি, ইতি সো অকতসহাযো নাম, তং অকতসহাযং, সমানসংৱাসকভাৱং অনুপগতন্তি অত্থো. তমনুৱত্তেয্যাতি তং উক্খিত্তকং উক্খিত্তকভাৱেযেৱ ঠিতং ভিক্খুং যা ভিক্খুনী যংদিট্ঠিকো সো হোতি, তায দিট্ঠিযা গহণভাৱেন অনুৱত্তেয্য. সা ভিক্খুনী ভিক্খুনীহি সঙ্ঘভেদসিক্খাপদাদীসু ৱুত্তনযেন ৱিসুং সঙ্ঘমজ্ঝে চ ৱুচ্চমানা তং ৱত্থুং অপ্পটিনিস্সজ্জন্তী সমনুভাসনকম্মপৰিযোসানে উক্খিত্তানুৱত্তিকা নাম পাৰাজিকা হোতীতি.

সাৱত্থিযং থুল্লনন্দং আৰব্ভ উক্খিত্তানুৱত্তনৱত্থুস্মিং পঞ্ঞত্তং, ঞত্তিযা দুক্কটং, দ্ৱীহি কম্মৱাচাহি দ্ৱে থুল্লচ্চযা, ‘‘যস্সা নক্খমতি, সা ভাসেয্যা’’তি এৱং য্য-কাৰপ্পত্তায ততিযকম্মৱাচায পাৰাজিকং, অধম্মকম্মে তিকদুক্কটং, সেসং সঙ্ঘভেদসিক্খাপদাদীসু ৱুত্তনযেনেৱ ৱেদিতব্বং.

উক্খিত্তানুৱত্তিকাসিক্খাপদৱণ্ণনা নিট্ঠিতা.

৮. অট্ঠৱত্থুকাসিক্খাপদৱণ্ণনা

চতুত্থে অৱস্সুতাতি লোকস্সাদমিত্তসন্থৱৱসেন কাযসংসগ্গৰাগেন তিন্তা. অযমেৱ হি অত্থো সীহড়মাতিকাট্ঠকথাযং ৱুত্তো, সমন্তপাসাদিকাযং (পাচি. অট্ঠ. ৬৭৫) পনস্স ৱিচাৰণা কতা, দুতিযপদেপি এসেৱ নযো. পুৰিসপুগ্গলস্স হত্থগ্গহণং ৱাতিআদীসু পন যং পুৰিসপুগ্গলেন হত্থে গহণং কতং, তং ‘‘পুৰিসপুগ্গলস্স হত্থগ্গহণ’’ন্তি ৱুত্তং, এসেৱ নযো সঙ্ঘাটিকণ্ণগ্গহণেপি. হত্থগ্গহণন্তি এত্থ চ যস্স কস্সচি অপাৰাজিকক্খেত্তভূতস্স অঙ্গস্স গহণং হত্থগ্গহণং, যস্স কস্সচি নিৱত্থস্স ৱা পাৰুতস্স ৱা গহণং সঙ্ঘাটিকণ্ণগ্গহণং. সন্তিট্ঠেয্য ৱাতিআদীসু কাযসংসগ্গসঙ্খাতস্স অসদ্ধম্মস্স পটিসেৱনত্থায পুৰিসস্স হত্থপাসে সন্তিট্ঠেয্য ৱা, তত্থ ঠিতা সল্লপেয্য ৱা, পুৰিসেন ৱা ‘‘ইত্থন্নামং ঠানং আগচ্ছা’’তি ৱুত্তা তং সঙ্কেতং গচ্ছেয্য, তস্স ৱা পুৰিসস্স অব্ভাগমনং সাদিযেয্য, যেন কেনচি ৱা পটিচ্ছন্নং ওকাসং পৱিসেয্য, পুৰিসস্স হত্থপাসে ঠত্ৱা কাযং উপসংহৰেয্যাতি এৱমত্থো দট্ঠব্বো. অযম্পি পাৰাজিকাতি যথা পুৰিমাযো, এৱং অযম্পি ভিক্খুনী এতস্স কাযসংসগ্গসঙ্খাতস্স অসদ্ধম্মস্স পটিসেৱনত্থায এতানি অট্ঠ ৱত্থূনি পটিপাটিযা ৱা উপ্পটিপাটিযা ৱা পূৰেত্ৱা অট্ঠৱত্থুকা নাম পাৰাজিকা হোতীতি.

সাৱত্থিযং ছব্বগ্গিযা ভিক্খুনিযো আৰব্ভ অট্ঠমং ৱত্থুং পৰিপূৰণৱত্থুস্মিং পঞ্ঞত্তং, সঙ্কেতগমনে পদে পদে দুক্কটং, পুৰিসস্স হত্থপাসং ওক্কন্তমত্তে থুল্লচ্চযং, পুৰিসস্স অব্ভাগমনসাদযমানেপি দুক্কটং. হত্থপাসোক্কমনে থুল্লচ্চযং, সেসেসু একেকস্মিং থুল্লচ্চযমেৱ, অট্ঠমে পৰিপুণ্ণে পাৰাজিকং. একেকস্মিং পন ৱত্থুস্মিং সতক্খত্তুম্পি ৱীতিক্কন্তে তা আপত্তিযো দেসেত্ৱা মুচ্চতি, অপিচেত্থ গণনূপিকা আপত্তি ৱেদিতব্বা, ‘‘ইদানি নাপজ্জিস্সামী’’তি হি ধুৰনিক্খেপং কত্ৱা দেসিতা গণনূপিকা, দেসিতগণনং উপেতি, পাৰাজিকস্স অঙ্গং ন হোতি. তস্মা যা একং আপন্না ধুৰনিক্খেপং কত্ৱা দেসেত্ৱা পুন কিলেসৱসেন আপজ্জতি, পুনপি দেসেতি, এৱং অট্ঠমং পৰিপূৰেন্তীপি পাৰাজিকা ন হোতি. যা পন আপজ্জিত্ৱা ‘‘পুনপি অঞ্ঞং ৱত্থুং আপজ্জিস্সামী’’তি সউস্সাহাৱ দেসেতি, তস্সা সা আপত্তি অগণনূপিকা, দেসিতাপি অদেসিতা হোতি, পাৰাজিকস্স অঙ্গং হোতি. অসঞ্চিচ্চ, অস্সতিযা, অজানন্তিযা অসাদিযন্তিযা, উম্মত্তিকাদীনঞ্চ অনাপত্তি. কাযসংসগ্গৰাগো, সউস্সাহতা, অট্ঠমস্স ৱত্থুস্স পূৰণন্তি ইমানেত্থ তীণি অঙ্গানি. সমনুভাসনসমুট্ঠানং, কিৰিযাকিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দ্ৱিৱেদনন্তি.

অট্ঠৱত্থুকাসিক্খাপদৱণ্ণনা নিট্ঠিতা.

উদ্দিট্ঠা খো অয্যাযো অট্ঠ পাৰাজিকা ধম্মাতি ভিক্খূ আৰব্ভ পঞ্ঞত্তা সাধাৰণা চত্তাৰো, ইমে চত্তাৰোতি এৱং পাতিমোক্খুদ্দেসমগ্গেন অট্ঠ পাৰাজিকা ধম্মা উদ্দিট্ঠাতি এৱমেত্থ অত্থো ৱেদিতব্বো, সেসং ভিক্খুপাতিমোক্খৱণ্ণনাযং ৱুত্তনযমেৱাতি.

কঙ্খাৱিতৰণিযা পাতিমোক্খৱণ্ণনায

ভিক্খুনিপাতিমোক্খে

পাৰাজিকৱণ্ণনা নিট্ঠিতা.