পাটিদেসনীযকণ্ডো

১. পঠমপাটিদেসনীযসিক্খাপদৱণ্ণনা

পাটিদেসনীযেসু পঠমে অন্তৰঘৰং পৱিট্ঠাযাতি ৱচনতো সচে তস্সা অন্তৰাৰামাদীসু ঠত্ৱাপি দদমানায হত্থতো সযং ৰথিযাব্যূহসিঙ্ঘাটকঘৰানং অঞ্ঞতৰস্মিং ঠিতোপি গণ্হাতি, দোসো নত্থি. তস্সা পন ৰথিযাদীসু ঠত্ৱা দদমানায, ৰথিযাদীসু ৱা, অন্তৰাৰামাদীসু ৱা ঠত্ৱাপি যংকিঞ্চি আমিসং অজ্ঝোহৰণত্থায গণ্হতো পটিগ্গহণে দুক্কটং, অজ্ঝোহাৰে অজ্ঝোহাৰে পাটিদেসনীযং. তস্স দেসেতব্বাকাৰো গাৰয্হং আৱুসোতিআদিনা নযেন সিক্খাপদে দস্সিতোযেৱ.

সাৱত্থিযং অঞ্ঞতৰং ভিক্খুং আৰব্ভ অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো আমিসং পটিগ্গহণৱত্থুস্মিং পঞ্ঞত্তং, অসাধাৰণপঞ্ঞত্তি, অনাণত্তিকং, যথা চেতং, তথা সেসানিপি, তিকপাটিদেসনীযং, যামকালিকাদীসু পটিগ্গহণেপি অজ্ঝোহৰণেপি দুক্কটং, একতোউপসম্পন্নায যাৱকালিকেপি তথেৱ, ঞাতিকায অঞ্ঞাতিকসঞ্ঞিৱেমতিকানম্পি এসেৱ নযো. ঞাতিকসঞ্ঞিনো পন, ঞাতিকায ৱা দাপেন্তিযা, উপনিক্খিপিত্ৱা ৱা দদমানায, যা চ অন্তৰাৰামভিক্খুনুপস্সযতিত্থিযসেয্যপটিক্কমনেসু ঠত্ৱা গামতো বহি নীহৰিত্ৱা, যামকালিকাদীনি ৱা ‘‘সতি পচ্চযে পৰিভুঞ্জা’’তি দেতি, তস্স, সিক্খমানসামণেৰীনঞ্চ হত্থতো গহেত্ৱা পৰিভুঞ্জন্তস্স, উম্মত্তকাদীনঞ্চ অনাপত্তি. পৰিপুণ্ণূপসম্পন্নতা, অঞ্ঞাতিকতা, অন্তৰঘৰে ঠিতায হত্থতো সহত্থা পটিগ্গহণং, যাৱকালিকতা, অজ্ঝোহৰণন্তি ইমানেত্থ পঞ্চ অঙ্গানি. সমুট্ঠানাদীনি এড়কলোমসদিসানীতি.

পঠমপাটিদেসনীযসিক্খাপদৱণ্ণনা নিট্ঠিতা.

২. দুতিযপাটিদেসনীযসিক্খাপদৱণ্ণনা

দুতিযে ইধ সূপন্তিআদি ৱোসাসনাকাৰদস্সনং. অপসক্ক তাৱ ভগিনীতিআদি অপসাদেতব্বাকাৰদস্সনং. তত্ৰাযং ৱিনিচ্ছযো – একেনাপি ভিক্খুনা অনপসাদিতে অজ্ঝোহৰণত্থায আমিসং গণ্হন্তানং পটিগ্গহণে দুক্কটং, অজ্ঝোহাৰে অজ্ঝোহাৰে পাটিদেসনীযন্তি.

ৰাজগহে ছব্বগ্গিযে আৰব্ভ ভিক্খুনিযা ৱোসাসন্তিযা ননিৱাৰণৱত্থুস্মিং পঞ্ঞত্তং, তিকপাটিদেসনীযং, একতোউপসম্পন্নায ৱোসাসন্তিযা ননিৱাৰেন্তস্স দুক্কটং, তথা অনুপসম্পন্নায উপসম্পন্নসঞ্ঞিনো ৱেমতিকস্স চ. অনুপসম্পন্নসঞ্ঞিনো, পন যো চ অত্তনো ৱা ভত্তং দাপেন্তিযা, অঞ্ঞেসং ৱা ভত্তং দেন্তিযা, যং ৱা ন দিন্নং, তং দাপেন্তিযা, যত্থ ৱা ন দিন্নং, তত্থ, সব্বেসং ৱা সমকং দাপেন্তিযা, সিক্খমানায ৱা সামণেৰিযা ৱা ৱোসাসন্তিযা পটিগ্গহেত্ৱা ভুঞ্জতি, তস্স, পঞ্চ ভোজনানি ঠপেত্ৱা সব্বত্থ, উম্মত্তকাদীনঞ্চ অনাপত্তি. পৰিপুণ্ণূপসম্পন্নতা, পঞ্চভোজনতা, অন্তৰঘৰে অনুঞ্ঞাতপকাৰতো অঞ্ঞথা ৱোসাসনা, অনিৱাৰণা, অজ্ঝোহৰণন্তি ইমানেত্থ পঞ্চ অঙ্গানি. সমুট্ঠানাদীনি কথিনসদিসানীতি.

দুতিযপাটিদেসনীযসিক্খাপদৱণ্ণনা নিট্ঠিতা.

৩. ততিযপাটিদেসনীযসিক্খাপদৱণ্ণনা

ততিযে সেক্খসম্মতানীতি লদ্ধসেক্খসম্মুতিকানি. পুব্বে অনিমন্তিতোতি ঘৰূপচাৰোক্কমনতো পঠমতৰং উপচাৰং অনোক্কমন্তেযেৱ পুব্বে অনিমন্তিতো. অগিলানো নাম যো সক্কোতি পিণ্ডায চৰিতুং. পাটিদেসনীযন্তি ঘৰূপচাৰং ওক্কমিত্ৱা আমিসং গণ্হন্তস্স পটিগ্গহণে তাৱ দুক্কটং, তং গহেত্ৱা যত্থকত্থচি ভুঞ্জন্তস্স অজ্ঝোহাৰে অজ্ঝোহাৰে পাটিদেসনীযন্তি.

সাৱত্থিযং সম্বহুলে ভিক্খূ আৰব্ভ ন মত্তং জানিত্ৱা পটিগ্গহণৱত্থুস্মিং পঞ্ঞত্তং, ‘‘পুব্বে অনিমন্তিতো, অগিলানো’’তি ইমা পনেত্থ দ্ৱে অনুপঞ্ঞত্তিযো, তিকপাটিদেসনীযং, যামকালিকাদীসু পটিগ্গহণেপি অজ্ঝোহাৰেপি দুক্কটং, তথা অসেক্খসম্মতে সেক্খসম্মতসঞ্ঞিনো ৱেমতিকস্স চ. অসেক্খসম্মতসঞ্ঞিনো, পন যো চ পুব্বে নিমন্তিতো ৱা গিলানো ৱা অঞ্ঞস্স ৱা তেসং ঘৰে পঞ্ঞত্তং ভিক্খং গণ্হাতি, যস্স চ ঘৰতো নীহৰিত্ৱা, আসনসালাদীসু ৱা ভিক্খুং অদিস্ৱা পঠমংযেৱ নীহৰিত্ৱা, দ্ৱাৰমূলে ৱা ঠপিতং দেন্তি, তস্স তং ভুঞ্জন্তস্স, নিচ্চভত্তকে, সলাকভত্তে, পক্খিকে, উপোসথিকে, পাটিপদিকে, যামকালিকাদিং ‘‘সতি পচ্চযে পৰিভুঞ্জা’’তি দিন্নং পৰিভুঞ্জন্তস্স, উম্মত্তকাদীনঞ্চ অনাপত্তি. সেক্খসম্মততা, পুব্বে অনিমন্তিততা, অগিলানতা, ঘৰূপচাৰোক্কমনং, ঠপেত্ৱা নিচ্চভত্তকাদীনি অঞ্ঞং আমিসং গহেত্ৱা ভুঞ্জনন্তি ইমানেত্থ পঞ্চ অঙ্গানি. সমুট্ঠানাদীনি এড়কলোমসদিসানীতি.

ততিযপাটিদেসনীযসিক্খাপদৱণ্ণনা নিট্ঠিতা.

৪. চতুত্থপাটিদেসনীযসিক্খাপদৱণ্ণনা

চতুত্থে যানি খো পন তানি আৰঞ্ঞকানীতিআদি চীৱৰৱিপ্পৱাসসিক্খাপদে ৱুত্তনযেনেৱ ৱেদিতব্বং. পুব্বে অপ্পটিসংৱিদিতন্তি এত্থ যং ইত্থিযা ৱা পুৰিসেন ৱা গহট্ঠেন ৱা পব্বজিতেন ৱা আৰামং ৱা আৰামূপচাৰং ৱা পৱিসিত্ৱা ‘‘ইত্থন্নামস্স, ভন্তে, কুলস্স খাদনীযং ৱা ভোজনীযং ৱা আহৰিযিস্সতী’’তি (পাচি. ৫৭৩) আৰোচিতং, তং পচ্ছা যথাআৰোচিতমেৱ ৱা আহৰিযতু, তস্স পৰিৱাৰং কত্ৱা অঞ্ঞং ৱা তেন সদ্ধিং বহুকম্পি, ‘‘ইত্থন্নামং কুলং পটিসংৱিদিতং কত্ৱা খাদনীযং ৱা ভোজনীযং ৱা গহেত্ৱা গচ্ছতী’’তি সুত্ৱা অঞ্ঞানি ৱা কুলানি তেহি সদ্ধিং আহৰন্তু, তং সব্বং পটিসংৱিদিতং নাম. যং পন এৱং অনাৰোচিতং অনাহটঞ্চ, তং অপ্পটিসংৱিদিতং নাম. অগিলানো নাম যো সক্কোতি পিণ্ডায গন্তুং. পাটিদেসনীযন্তি এৱৰূপং অন্তমসো আৰামমজ্ঝেন গচ্ছন্তেহি অদ্ধিকেহি দিন্নম্পি আৰামে ৱা আৰামূপচাৰে ৱা পটিগ্গহেত্ৱা অজ্ঝোহৰন্তস্স পটিগ্গহণে দুক্কটং, অজ্ঝোহাৰে অজ্ঝোহাৰে পাটিদেসনীযন্তি.

সক্কেসু সম্বহুলে ভিক্খূ আৰব্ভ আৰামে চোৰে পটিৱসন্তে অনাৰোচনৱত্থুস্মিং পঞ্ঞত্তং, ‘‘অগিলানো’’তি অযমেত্থ একা অনুপঞ্ঞত্তি, তিকপাটিদেসনীযং, যামকালিকাদীসু আহাৰত্থায পটিগ্গহণেপি অজ্ঝোহাৰেপি দুক্কটমেৱ, তথা পটিসংৱিদিতে অপ্পটিসংৱিদিতসঞ্ঞিনো ৱেমতিকস্স চ, পটিসংৱিদিতসঞ্ঞিনো, পন গিলানস্স, যো চ পটিসংৱিদিতং কত্ৱা আহটং ৱা গিলানাৱসেসকং ৱা বহাৰামে ৱা পটিগ্গহিতং, তত্থজাতকমেৱ ৱা মূলফলাদিং, যামকালিকাদীসু ৱা যংকিঞ্চি ‘‘সতি পচ্চযে পৰিভুঞ্জা’’তি লদ্ধং পৰিভুঞ্জন্তস্স, উম্মত্তকাদীনঞ্চ অনাপত্তি. যথাৱুত্তআৰঞ্ঞকসেনাসনতা, যাৱকালিকস্স অতত্থজাতকতা, অগিলানতা, অগিলানাৱসেসকতা, অপ্পটিসংৱিদিততা, অজ্ঝাৰামে পটিগ্গহণং, অজ্ঝোহৰণন্তি ইমানেত্থ সত্ত অঙ্গানি. সমুট্ঠানাদীনি কথিনসদিসানেৱ, ইদং পন কিৰিযাকিৰিযন্তি.

চতুত্থপাটিদেসনীযসিক্খাপদৱণ্ণনা নিট্ঠিতা.

কঙ্খাৱিতৰণিযা পাতিমোক্খৱণ্ণনায

পাটিদেসনীযৱণ্ণনা নিট্ঠিতা.