১০. পাযাসিৰাজঞ্ঞসুত্তৱণ্ণনা

৪০৬. ভগৱতা এৱং গহিতনামত্তাতি যোজনা. যস্মা ৰাজপুত্তা লোকে ‘‘কুমাৰো’’তি ৱোহৰীযন্তি. অযঞ্চ ৰঞ্ঞো কিত্তিমপুত্তো, তস্মা আহ ‘‘ৰঞ্ঞো…পে… সঞ্জানিংসূ’’তি.

অস্সাতি থেৰস্স. পুঞ্ঞানি কৰোন্তো কপ্পসতসহস্সং দেৱেসু চেৱ মনুস্সেসু চ উপ্পজ্জিত্ৱা ৱিসেসং নিব্বত্তেতুং নাসক্খি ইন্দ্ৰিযানং অপৰিপক্কত্তা. ততিযদিৱসেতি পব্বতং আৰুড়্হদিৱসতো ততিযে দিৱসে.

তেসং সাৱকবোধিযা নিযততায, পুঞ্ঞসম্ভাৰস্স চ সাতিসযত্তা ৱিনিপাতং অগন্ত্ৱা একং বুদ্ধন্তৰং…পে… অনুভৱন্তানং. দেৱতাযাতি পুব্বে সহধম্মচাৰিনিযা সুদ্ধাৱাসদেৱতায.

‘‘কুলদাৰিকায কুচ্ছিম্হি উপ্পন্নো’’তি ৱত্ৱা তং এৱস্স উপ্পন্নভাৱং মূলতো পট্ঠায দস্সেতুং ‘‘সা চা’’তিআদি ৱুত্তং. তত্থ সাতি কুলদাৰিকা. চ-সদ্দো ব্যতিৰেকত্থো, তেন ৱুচ্চমানং ৱিসেসং জোতেতি. কুলঘৰন্তি পতিকুলগেহং. গব্ভনিমিত্তন্তি গব্ভস্স সণ্ঠিতভাৱনিমিত্তং. সতিপি ৱিসাখায চ সাৱত্থিৱাসিকুলপৰিযাপন্নত্তে তস্সা তত্থ পধানভাৱদস্সনত্থং ‘‘ৱিসাখঞ্চা’’তি ৱুত্তং যথা ‘‘ব্ৰাহ্মণা আগতা ৱাসিট্ঠোপি আগতো’’তি. দেৱতাতি ইধপি সা এৱ সুদ্ধাৱাসদেৱতা. পঞ্হেতি ‘‘ভিক্খু ভিক্খু অযং ৱম্মিকো’’তিআদিনা (ম. নি. ১.২৪৯) আগতে পন্নৰসপঞ্হে.

সেতব্যাতি ইত্থিলিঙ্গৱসেন তস্স নগৰস্স নামং.উত্তৰেনাতি এন-সদ্দযোগেন ‘‘সেতব্য’’ন্তি উপযোগৱচনং পাড়িযং ৱুত্তং. অত্থৱচনেন পন উত্তৰসদ্দং অপেক্খিত্ৱা সেতব্যতোতি নিস্সক্কপ্পযোগো কতো. অনভিসিত্তকৰাজাতি খত্তিযজাতিকো অভিসেকং অপ্পত্তো.

পাযাসিৰাজঞ্ঞৱত্থুৱণ্ণনা

৪০৭. দিট্ঠিযেৱ দিট্ঠিগতন্তি গত-সদ্দেন পদৱড্ঢনমাহ, দিট্ঠিযা ৱা গতমত্তং দিট্ঠিগতং, অযাথাৱগ্গাহিতায গন্তব্বাভাৱতো দিট্ঠিযা গহণমত্তং, কেৱলো মিচ্ছাভিনিৱেসোতি অত্থো, তং পন দিট্ঠিগতং তস্স অযোনিসোমনসিকাৰাদিৱসেন উপ্পজ্জিত্ৱা পটিপক্খসম্মুখীভাৱাভাৱতো, অনুৰূপাহাৰলাভতো চ সমুদাচাৰপ্পত্তং জাতন্তি পাড়িযং ‘‘উপ্পন্নং হোতী’’তি ৱুত্তং. তং তং কাৰণং অপদিসিত্ৱাতি ততো ইধাগচ্ছনকস্স, ইতো তত্থ গচ্ছনকস্স চ অপদিসনতো ‘‘তত্থ তত্থেৱ সত্তানং উচ্ছিজ্জনতো’’তি এৱমাদি তং তং কাৰণং পটিৰূপকং অপদিসিত্ৱা.

৪০৮. আপন্নানধিপ্পেতত্থৱিসযে অযং পুৰা-সদ্দপযোগোতি আহ ‘‘পুৰা…পে… সঞ্ঞাপেতীতি যাৱ ন সঞ্ঞাপেতী’’তি.

চন্দিমসূৰিযউপমাৱণ্ণনা

৪১১. যথা চন্দিমসূৰিযা উড়াৰৱিপুলোভাসতায অঞ্ঞেন ওভাসেন অনভিভৱনীযা, এৱমযম্পি পঞ্ঞাওভাসেনাতি দস্সেন্তো ‘‘চন্দিম…পে… অঞ্ঞেনা’’তিআদিমাহ. আদীহীতি আদি-সদ্দেন ‘‘কিত্তকে ঠানে এতে পৱত্তেন্তি, কিত্তকঞ্চ ঠানং নেসং আভা ফৰতী’’তি এৱমাদিম্পি চোদনং সঙ্গণ্হাতি. পলিৱেঠেস্সতীতি আবন্ধিস্সতি, অনুযুঞ্জিস্সতীতি অত্থো. নিব্বেঠেতুং তং ৱিস্সজ্জেতুং. তস্মাতি যস্মা যথাৱুত্তং চোদনং নিব্বেঠেতুং ন সক্কোতি, তস্মা. অত্তনো অনিচ্ছিতং সঙ্ঘাতনং পক্খং পটিজানন্তো ‘‘পৰস্মিং লোকে, ন ইমস্মি’’ন্তিআদিমাহ.

কথং পনাযং নত্থিকদিট্ঠি ‘‘দেৱো’’তি পটিজানাতীতি তত্থ কাৰণং দস্সেতুং ‘‘ভগৱা পনা’’তিআদি ৱুত্তং. ‘‘দেৱাপি দেৱত্তভাৱেনেৱ উচ্ছিজ্জন্তি, মনুস্সাপি মনুস্সত্তভাৱেনেৱ উচ্ছিজ্জন্তী’’তি এৱং ৱা অস্স দিট্ঠি, এৱঞ্চ কত্ৱা ‘‘দেৱা তে, ন মনুস্সা’’তি ৱচনঞ্চ ন ৱিৰুজ্ঝতি. এৱং চন্দেতি চন্দৱিমানে, ন চ চন্দে ৱা কথিযন্তে.

৪১২. আবাধো এতেসং অত্থীতি আবাধিকা. দুক্খং সঞ্জাতং এতেসন্তি দুক্খিতা. সদ্ধায অযিতব্বা সদ্ধাযিকা, সদ্ধায পৱত্তিট্ঠানভূতা. তেনাহ ‘‘অহং তুম্হে’’তিআদি. পচ্চযো পত্তিযাযনং এতেসু অত্থীতি পচ্চযিকা.

চোৰউপমাৱণ্ণনা

৪১৩. উদ্দিসিত্ৱাতি উপেচ্চ দস্সেত্ৱা. কম্মকাৰণিকসত্তেসূতি নেৰযিকানং সঙ্ঘাতনকসত্তেসু. কম্মমেৱাতি তেহি তেহি নেৰযিকেহি কতকম্মমেৱ. কম্মকাৰণং কৰোতীতি আযূহনানুৰূপং তং তং কাৰণং কৰোতি, তথা দুক্খং উপ্পাদেতীতি অত্থো. নিৰযপালাতি এত্থ ইতি-সদ্দো আদিঅত্থো, তেন তত্থ সব্বং নিৰযকণ্ডপাড়িং (ম. নি. ৩.২৫৯) সঙ্গণ্হাতি. এৱং সুত্ততো (ম. নি. ৩.২৫৯) নিৰযপালানং অত্থিভাৱং দস্সেত্ৱা ইদানি যুত্তিতোপি দস্সেতুং ‘‘মনুস্সলোকে’’তিআদি ৱুত্তং. তত্থ নেৰযিকে নিৰযে পালেন্তি ততো নিগ্গন্তুং অপ্পদানৱসেন ৰক্খন্তীতি নিৰযপালা. যং পনেত্থ ৱত্তব্বং, তং পপঞ্চসূদনীটীকাযং গহেতব্বং.

গূথকূপপুৰিসউপমাৱণ্ণনা

৪১৫. নিম্মজ্জথাতি নিৰৱসেসতো মজ্জথ সোধেথ. তং পন তস্স তস্স গূথস্স তথা সোধনং অপনযনং হোতীতি আহ ‘‘অপনেথা’’তি.

অসুচীতি অসুদ্ধো, সো পন যস্মা মনৱড্ঢনকো মনোহৰো ন হোতি, তস্মা আহ ‘‘অমনাপো’’তি. অসুচিসঙ্খাতং অসুচিভাগতং অত্তনো সভাৱতং গতো পত্তোতি অসুচিসঙ্খাতোতি আহ ‘‘অসুচিকোট্ঠাসভূতো’’তি. দুগ্গন্ধোতি দুট্ঠগন্ধো অনিট্ঠগন্ধো, সো পন ন যো কোচি, অথ খো পূতিগন্ধোতি আহ ‘‘কুণপগন্ধো’’তি. জিগুচ্ছিতব্বযুত্তোতি হীড়িতব্বযুত্তো. পটিকূলো ঘানিন্দ্ৰিযস্স পটিকূলৰূপো. উব্বাধতীতি উপৰূপৰি বাধতি. মনুস্সানং গন্ধো…পে… বাধতি অতিৱিয অসুচিসভাৱত্তা, অসুচিম্হিযেৱ জাতসংৱদ্ধনভাৱতো, দেৱানঞ্চ ঘানপসাদস্স তিক্খৱিসদভাৱতো.

৪১৬. দূৰে নিব্বত্তা পৰনিম্মিতৱসৱত্তিআদযো.

৪১৯. সুন্দৰধম্মেতি সোভনগুণে. সুগতিসুখন্তি সুগতি চেৱ তপ্পৰিযাপন্নং সুখঞ্চ.

গব্ভিনীউপমাৱণ্ণনা

৪২০. পুঞ্ঞকম্মতো এতি উপ্পজ্জতীতি অযো, সুখং. তপ্পটিপক্খতো অনযো, দুক্খং. অপক্কন্তি ন সিদ্ধং ন নিট্ঠানপ্পত্তং. ন পৰিপাচেন্তি ন নিট্ঠানং পাপেন্তি. ন উপচ্ছিন্দন্তি অত্তৱিনিপাতস্স সাৱজ্জভাৱতো. আগমেন্তীতি উদিক্খন্তি. নিব্বিসন্তি যস্স পন তং কম্মফলং নিব্বিসন্তো নিযুঞ্জন্তো, নিব্বিসন্তি ৱা নিব্বেসং ৱেতনং পটিকঙ্খন্তো ভতপুৰিসো যথা.

৪২১. উব্ভিন্দিত্ৱাতি উপসগ্গেন পদৱড্ঢনমত্তন্তি আহ ‘‘ভিন্দিত্ৱা’’তি.

সুপিনকউপমাৱণ্ণনা

৪২২. ‘‘নিক্খমন্তং ৱা পৱিসন্তং ৱা জীৱ’’ন্তি ইদং তস্স অজ্ঝাসযৱসেন ৱুত্তং. সো হি ‘‘সত্তানং সুপিনদস্সনকালে অত্তভাৱতো জীৱো বহি নিক্খমিত্ৱা তংতংআৰামৰামণেয্যকদস্সনাদিৱসেন ইতো চিতো চ পৰিব্ভমিত্ৱা পুনদেৱ অত্তভাৱং অনুপৱিসতী’’তি এৱং পৱত্তমিচ্ছাগাহৱিপল্লত্তচিত্তো. অথস্স থেৰো খুদ্দকায আণিযা ৱিপুলং আণিং নীহৰন্তো ৱিয জীৱসমঞ্ঞামুখেন উচ্ছেদদিট্ঠিং নীহৰিতুকামো ‘‘অপি নু তা তুয্হং জীৱং পস্সন্তি পৱিসন্তং ৱা নিক্খমন্তং ৱা’’তি আহ. যত্থ পন তথাৰূপা জীৱসমঞ্ঞা, তং দস্সেন্তো ‘‘চিত্তাচাৰং জীৱন্তি গহেত্ৱা আহা’’তি ৱুত্তং.

৪২৩. ৱেঠেত্ৱাতি ৱেখদানসঙ্খেপেন ৱেঠেত্ৱা. চৱনকালেতি চৱনস্স চুতিযা পত্তকালে, ন চৱমানকালে. ৰূপক্খন্ধমত্তমেৱাতি কতিপযৰূপধম্মসঙ্ঘাতমত্তমেৱ. উতুসমুট্ঠানৰূপধম্মসমূহমত্তমেৱ হি তদা লব্ভতি, মত্ত-সদ্দো ৱা ৱিসেসনিৱত্তিঅত্থো, তেন কম্মজাদিতিসন্ততিৰূপৱিসেসং নিৱত্তেতি. অপ্পৱত্তা হোন্তীতি অপ্পৱত্তিকা হোন্তি, ন উপলব্ভতীতি অত্থো. ৱিঞ্ঞাণে পন জীৱসঞ্ঞী, তস্মা ‘‘ৱিঞ্ঞাণক্খন্ধো গচ্ছতী’’তি আহ, তত্থ অনুপলব্ভনতোতি অধিপ্পাযো.

সন্তত্তঅযোগুড়উপমাৱণ্ণনা

৪২৪. ৱূপসন্ততেজন্তি ৱিগতুস্মং.

৪২৫. আমতোতি এত্থ আ-সদ্দো আমিস-সদ্দো ৱিয উপড্ঢপৰিযাযোতি আহ ‘‘অদ্ধমতো’’তি, আমতোতি ৱা ঈসং দৰথেন উস্মনা যুত্তমৰণো মৰন্তোতি অত্থো. মীযমানো হি অৱিগতুস্মো হোতি, ন মতো ৱিয ৱিগতুস্মো. তেনাহ ‘‘মৰিতুং আৰদ্ধো হোতী’’তি. তথা ৰূপস্স ওধুননং নামস্স ওৰতো পৰিৱত্তনমেৱাতি আহ ‘‘ওৰতো কৰোথা’’তি. ওৰতো কাতুকামস্স পন সংপৰিৱত্তনং সন্ধুননং, তং পন পৰতো কৰণন্তি আহ ‘‘পৰতো কৰোথা’’তি. পৰমুখং কতস্স ইতো চিতো পৰিৱত্তনং নিদ্ধুননন্তি আহ ‘‘অপৰাপৰং কৰোথা’’তি. ইন্দ্ৰিযানি অপৰিভিন্নানীতি অধিপ্পাযেন ‘‘তঞ্চাযতনং ন পটিসংৱেদেতী’’তি ৱুত্তং.

সঙ্খধমউপমাৱণ্ণনা

৪২৬. সঙ্খং ধমতি, ধমাপেতীতি ৱা সঙ্খধমো. উপলাপেত্ৱাতি উপৰূপৰি সদ্দযোগৱসেন সল্লাপেত্ৱা, সদ্দযুত্তং কত্ৱাতি অত্থো. তং পন অত্থতো ধমনমেৱাতি আহ ‘‘ধমিত্ৱা’’তি.

অগ্গিকজটিলউপমাৱণ্ণনা

৪২৮. আহিতো অগ্গি এতস্স অত্থীতি অগ্গিকো, স্ৱাস্স অগ্গিকভাৱো যস্মা অগ্গিহুতমালাৱেদিসম্পাদনেহি চেৱ ইন্ধনধূমবৰিহিসসপ্পিতেলূপহৰণেহি বলিপুপ্ফধূমগন্ধাদিউপহাৰেহি চ তস্স পযিৰুপাসনায ইচ্ছিতো, তস্মা ৱুত্তং ‘‘অগ্গিপৰিচাৰকো’’তি. আযুং পাপুণাপেয্যন্তি যথা চিৰজীৱী হোতি, এৱং আযুং পচ্ছিমৱযং পাপেয্যং. ৱড্ঢিং গমেয্যন্তি সৰীৰাৱযৱে, গুণাৱযৱে চ ফাতিং পাপেয্যং. অৰণী যুগড়ন্তি উত্তৰাৰণী, অধৰাৰণীতি অৰণীদ্ৱযং.

৪২৯. এৱন্তি ‘‘বালো পাযাসিৰাজঞ্ঞো’’তিআদিপ্পকাৰেন. তযাতি থেৰং সন্ধায ৱদতি. ৱুত্তযুত্তকাৰণমক্খলক্খণেনাতি ৱুত্তযুত্তকাৰণস্স মক্খনসভাৱেন. যুগগ্গাহলক্খণেনাতি সমধুৰগ্গহণলক্খণেন. পলাসেনাতি পলাসেতীতি পলাসো, পৰস্স গুণে উত্তৰিতৰে ডংসিত্ৱা ৱিয ছড্ডেন্তো অত্তনো গুণেহি সমে কৰোতীতি অত্থো. সমকৰণৰসো হি পলাসো, তেন পলাসেন.

দ্ৱেসত্থৱাহউপমাৱণ্ণনা

৪৩০. হৰিতকপত্তন্তি হৰিতব্বপত্তং, অপ্পপত্তন্তি অত্থো. তেনাহ ‘‘অন্তমসো’’তিআদি. সন্নদ্ধধনুকলাপন্তি এত্থ কলাপন্তি তূণীৰমাহ, তঞ্চ সন্নয্হতো ধনুনা ৱিনা ন সন্নয্হতীতি আহ ‘‘সন্নদ্ধধনুকলাপ’’ন্তি. আসিত্তোদকানি ৱটুমানীতি গমনমগ্গা চেৱ তংতংউদকমগ্গা চ সম্মদেৱ দেৱেন ফুট্ঠত্তা তহং তহং পগ্ঘৰিতউদক সন্দমানউদকা. তেনাহ ‘‘পৰিপুণ্ণসলিলা মগ্গা চ কন্দৰা চা’’তি.

যথাভতেনাতি সকটেসু যথাঠপিতেন, যথা ‘‘অম্ম ইতো কৰোহী’’তি ৱুত্তে ঠপেসীতি অত্থো কৰণকিৰিযায কিৰিযাসামঞ্ঞৱাচীভাৱতো. তস্মা যথাৰোপিতেন, যথাগহিতেনাতি অত্থো ৱুত্তো.

অক্খধুত্তকউপমাৱণ্ণনা

৪৩৪. পৰাজযগুড়ন্তি যেন গুড়েন, যায সলাকায ঠিতায চ পৰাজযো হোতি, তং অদস্সনং গমেন্তো গিলতি.পজ্জোহনন্তি পকাৰেহি জুহনকম্মং. তং পন বলিদানৱসেন কৰীযতীতি আহ ‘‘বলিকম্ম’’ন্তি.

সাণভাৰিকউপমাৱণ্ণনা

৪৩৬. গামপত্তন্তি গামো এৱ হুত্ৱা আপজ্জিতব্বং, সুঞ্ঞভাৱেন অনাৱসিতব্বং. তেনাহ ‘‘ৱুট্ঠিতগামপদেসো’’তি. গামপদন্তি যথা পুৰিসস্স পাদনিক্খিত্তট্ঠানং অধিগতপৰিচ্ছেদং ‘‘পদ’’ন্তি ৱুচ্চতি, এৱং গামৱাসীহি আৱসিতট্ঠানং অধিগতনিৱুত্থাগাৰং ‘‘গামপদ’’ন্তি ৱুত্তং. তেনাহ ‘‘অযমেৱত্থো’’তি. সুসন্নদ্ধোতি সুখেন গহেত্ৱা গমনযোগ্যতাৱসেন সুট্ঠু সজ্জিতো. তং পন সুসজ্জনং সুট্ঠু বন্ধনৱসেনেৱাতি আহ ‘‘সুবদ্ধো’’তি.

অযাদীনম্পি লোহভাৱে সতিপি লোহ-সদ্দো সাসনে তম্বলোহে নিৰুড়্হোতি আহ ‘‘লোহন্তি তম্বলোহ’’ন্তি.

সৰণগমনৱণ্ণনা

৪৩৭. অভিৰদ্ধোতি আৰাধিতচিত্তো, সাসনস্স আৰাধিতচিত্ততা পসীদনৱসেনাতি আহ ‘‘অভিপ্পসন্নো’’তি. পঞ্হুপট্ঠানানীতি পঞ্হেসু উপট্ঠানানি মযা পুচ্ছিতত্থেসু তুম্হাকং ৱিস্সজ্জনৱসেন ঞাণুপট্ঠানানি.

যঞ্ঞকথাৱণ্ণনা

৪৩৮. সঙ্ঘাতন্তি সং-সদ্দো পদৱড্ঢনমত্তন্তি আহ ‘‘ঘাত’’ন্তি. ৱিপাকফলেনাতি সদিসফলেন. মহপ্ফলো ন হোতি গৱাদিপাণঘাতেন উপক্কিলিট্ঠভাৱতো. গুণানিসংসেনাতি উদ্দযফলেন. আনুভাৱজুতিযাতি পটিপক্খৱিগমনজনিতেন সভাৱসঙ্খাতেন তেজেন. ন মহাজুতিকো হোতি অপৰিসুদ্ধভাৱতো. ৱিপাকৱিপ্ফাৰতাযাতি ৱিপাকফলস্স ৱিপুলতায, পাৰিপূৰিযাতি অত্থো. দুট্ঠুখেত্তেতি উসভাদিদোসেহি দূসিতখেত্তে, তং পন ৱপ্পাভাৱতো অসাৰং হোতীতি আহ ‘‘নিস্সাৰখেত্তে’’তি. দুব্ভূমেতি কুচ্ছিতভূমিভাগে, স্ৱাস্স কুচ্ছিতভাৱো অসাৰতায ৱা সিযা নিন্নতাদিদোসৱসেন ৱা. তত্থ পঠমো পক্খো পঠমপদেন দস্সিতোতি ইতৰং দস্সেন্তো ‘‘ৱিসমভূমিভাগে’’তি আহ. দণ্ডাভিঘাতাদিনা ছিন্নভিন্নানি. পূতীনীতি গোমযলেপদানাদিসুখেন অসুক্খাপিতত্তা পূতিভাৱং গতানি. তানি পন যস্মা সাৰৱন্তানি ন হোন্তি, তস্মা ৱুত্তং ‘‘নিস্সাৰানী’’তি. ৱাতাতপহতানীতি ৱাতেন চ আতপেন চ ৱিনট্ঠবীজসামত্থিযানি. তেনাহ ‘‘পৰিযাদিন্নতেজানী’’তি. যং যথাজাতৱীহিআদিগতেন তণ্ডুলেন অঙ্কুৰুপ্পাদনযোগ্যবীজসামত্থিযং, তং তণ্ডুলসাৰো, তস্স আদানং গহণং তথাউপ্পজ্জনমেৱ. এতানি পন বীজানি ন তাদিসানি খণ্ডাদিদোসৱন্ততায. ধাৰায খেত্তে অনুপ্পৱেসনং নাম ৱস্সনমেৱ, তং পটিক্খেপৱসেন দস্সেন্তো আহ ‘‘ন সম্মা ৱস্সেয্যা’’তি. অঙ্কুৰমূলপত্তাদীহীতি চেত্থ অঙ্কুৰকন্দাদীহি উদ্ধং ৱুদ্ধিং, মূলজটাদীহি হেট্ঠা ৱিৰুড়্হিং, পত্তপুপ্ফাদীহি সমন্ততো চ ৱেপুল্লন্তি যোজনা.

অপৰূপঘাতেনাতি পৰেসং ৱিবাধনেন. উপ্পন্নপচ্চযতোতি নিব্বত্তিতঘাসচ্ছাদনাদিদেয্যধম্মতো. গৱাদিঘাতেনপি হি তত্থ পটিগ্গাহকানং ঘাসো সঙ্কীযতি. ‘‘অপৰূপঘাতিতাযা’’তি ইদং সীলৱন্ততায কাৰণৱচনং. গুণাতিৰেকন্তি গুণাতিৰিত্তং, সীলাদিলোকুত্তৰগুণেহি ৱিসিট্ঠন্তি অত্থো. ৱিপুলাতি সদ্ধাসম্পদাদিৱসেন উড়াৰা.

উত্তৰমাণৱৱত্থুৱণ্ণনা

৪৩৯. অথ খো তেহি সকুণ্ডকেহি তণ্ডুলেহি সিদ্ধংভত্তং উত্তণ্ডুলমেৱ হোতীতি আহ ‘‘উত্তণ্ডুলভত্ত’’ন্তি. বিলঙ্গং ৱুচ্চতি আৰনালং বিলঙ্গতো নিব্বত্তনতো, তদেৱ কঞ্জিযতো জাতন্তি কঞ্জিযং, তং দুতিযং এতস্সাতি বিলঙ্গদুতিযং, তং ‘‘কঞ্জিকদুতিয’’ন্তি চ ৱুত্তং. ধোৰকানীতি ধোৱিযানি. যস্মা থূলতৰানিপি ‘‘থূলানী’’তি ৱত্তব্বতং অৰহন্তি, তস্মা ‘‘থূলানি চা’’তি ৱুত্তং. গুড়দসানীতি সুত্তানং থূলতায, কঞ্জিকস্স বহলতায চ পিণ্ডিতদসানি. তেনাহ ‘‘পুঞ্জপুঞ্জ…পে… দসানী’’তি. অনুদ্দিসতীতি অনু অনু কথেতি.

৪৪০. অসক্কচ্চন্তি ন সক্কচ্চং অনাদৰকাৰং, তং পন কম্মফলসদ্ধায অভাৱেন হোতীতি আহ ‘‘সদ্ধাৱিৰহিত’’ন্তি. অচিত্তীকতন্তি চিত্তীকাৰপচ্চুপট্ঠাপনৱসেন ন চিত্তীকতং. তেনাহ ‘‘চিত্তীকাৰৱিৰহিত’’ন্তিআদি. চিত্তীকাৰৰহিতং ৱা অচিত্তীকতং, যথা কতং পৰেসং ৱিম্হযাৱহং হোতি, তথা অকতং. চিত্তস্স উড়াৰপণীতভাৱো পন অসক্কচ্চদানেনেৱ বাধিতো. অপৱিদ্ধন্তি ছড্ডনীযধম্মং ৱিয অপৱিদ্ধং কত্ৱা, এতেন তস্মিং দানে গাৰৱাকৰণং ৱদতি. সেৰীসকং নামাতি ‘‘সেৰীসক’’ন্তি এৱং নামকং. তুচ্ছন্তি পৰিজনপৰিচ্ছেদৱিৰহতো ৰিত্তং.

পাযাসিদেৱপুত্তৱণ্ণনা

৪৪১. তস্সানুভাৱেনাতি তস্স দানস্স আনুভাৱেন. সিৰীসৰুক্খোতি পভস্সৰখন্ধৱিটপসাখাপলাসসম্পন্নো মনুঞ্ঞদস্সনো দিব্বো সিৰীসৰুক্খো. অট্ঠাসীতি ফলস্স কম্মসৰিক্খতং দস্সেন্তো ৱিমানদ্ৱাৰে নিব্বত্তিত্ৱা অট্ঠাসি. পুব্বাচিণ্ণৱসেনাতি পুৰিমজাতিযং তত্থ নিৱাসপৰিচযনৱসেন. ন কেৱলং পুব্বাচিণ্ণৱসেনেৱ, অথ খো উতুসুখুমৱসেন পীতি দস্সেন্তো ‘‘তত্থ কিৰস্স উতুসুখং হোতী’’তি আহ.

সোতি উত্তৰো মাণৱো. যদি অসক্কচ্চং দানং দত্ৱা পাযাসি তত্থ নিব্বত্তো, পাযাসিস্স পৰিচাৰিকা সক্কচ্চং দানং দত্ৱা কথং তত্থ নিব্বত্তাতি আহ ‘‘পাযাসিস্স পনা’’তি. নিকন্তিৱসেনাতি পাযাসিম্হি সাপেক্খাৱসেন, পুব্বেপি ৱা তত্থ নিৱুত্থপুব্বতায. দিসাচাৰিকৱিমানন্তি আকাসট্ঠং হুত্ৱা দিসাসু ৱিচৰণকৱিমানং, ন ৰুক্খপব্বতসিখৰাদিসম্বন্ধং. ৱট্টনিঅটৱিযন্তি ৱিমানৱীথিযন্তি.

পাযাসিৰাজঞ্ঞসুত্তৱণ্ণনায লীনত্থপ্পকাসনা.