২. পঞ্হপুচ্ছকৱণ্ণনা

২২৩. ইধ অনাভট্ঠন্তি একন্তানাৰম্মণত্তেন ভাসিতং. ‘‘ৰূপমিস্সকত্তা অনাৰম্মণেসু ৰূপধম্মেসু সঙ্গহিত’’ন্তি কস্মা ৱুত্তং, ননু মিস্সকত্তা এৱ জীৱিতিন্দ্ৰিযং অনাৰম্মণেসু অসঙ্গহিতং. ন হি অট্ঠিন্দ্ৰিযা অনাৰম্মণাতি ৱুত্তাতি? সচ্চমেতং, জীৱিতিন্দ্ৰিযএকদেসস্স পন অনাৰম্মণেসু ৰূপধম্মেসু সঙ্গহিততং সন্ধাযেতং ৱুত্তং, অৰূপকোট্ঠাসেন পৰিত্তাৰম্মণাদিতা অত্থীতি সিযাপক্খে সঙ্গহিতন্তি অধিপ্পাযো. অৰূপকোট্ঠাসেন পন পৰিত্তাৰম্মণাদিতা, ৰূপকোট্ঠাসেন চ নৱত্তব্বতা অত্থীতি মিস্সকস্স সমুদাযস্সেৱ ৱসেন সিযাপক্খে সঙ্গহিতং, ন একদেসৱসেনাতি দট্ঠব্বং. ন হি অনাৰম্মণং পৰিত্তাৰম্মণাদিভাৱেন নৱত্তব্বং ন হোতীতি. ‘‘ৰূপঞ্চ নিব্বানঞ্চ অনাৰম্মণা, সত্তিন্দ্ৰিযা অনাৰম্মণা’’তিআদিৱচনঞ্চ অৱিজ্জমানাৰম্মণানাৰম্মণেসু নৱত্তব্বেসু অনাৰম্মণত্তা নৱত্তব্বতং দস্সেতি, ন সাৰম্মণস্সেৱ নৱত্তব্বতং, নৱত্তব্বস্স ৱা সাৰম্মণতং. ন হি নৱত্তব্ব-সদ্দো সাৰম্মণে নিৰুড়্হো. যদিপি সিযা, ‘‘তিস্সো চ ৱেদনা ৰূপঞ্চ নিব্বানঞ্চ ইমে ধম্মা নৱত্তব্বা সুখায ৱেদনায সম্পযুত্তা’’তিআদি ন ৱুচ্চেয্য, অথাপি পৰিত্তাৰম্মণাদিসম্বন্ধো নৱত্তব্ব-সদ্দো সাৰম্মণেস্ৱেৱ ৱত্ততি, ‘‘দ্ৱাযতনা সিযা পৰিত্তাৰম্মণা’’তিআদিং অৱত্ৱা ‘‘মনাযতনং সিযা পৰিত্তাৰম্মণং…পে… অপ্পমাণাৰম্মণ’’ন্তিপি, ‘‘ধম্মাযতনং সিযা পৰিত্তাৰম্মণং…পে… অপ্পমাণাৰম্মণ’’ন্তিপি, ‘‘সিযা অনাৰম্মণ’’ন্তিপি ৱত্তব্বং সিযা. ন হি পঞ্হপুচ্ছকে সাৱসেসা দেসনা অত্থীতি. ‘‘অট্ঠিন্দ্ৰিযা সিযা অজ্ঝত্তাৰম্মণা’’তি এত্থ চ জীৱিতিন্দ্ৰিযস্স আকিঞ্চঞ্ঞাযতনকালে অৰূপস্স ৰূপস্স চ অনাৰম্মণত্তা নৱত্তব্বতা ৱেদিতব্বা.

পঞ্হপুচ্ছকৱণ্ণনা নিট্ঠিতা.

ইন্দ্ৰিযৱিভঙ্গৱণ্ণনা নিট্ঠিতা.