১৪. সিক্খাপদৱিভঙ্গো

১. অভিধম্মভাজনীযৱণ্ণনা

৭০৩. পতিট্ঠানট্ঠেনাতি সম্পযোগৱসেন উপনিস্সযৱসেন চ ওকাসভাৱেন. পিট্ঠপূৱওদনকিণ্ণনানাসম্ভাৰে পক্খিপিত্ৱা মদ্দিত্ৱা কতা সুৰা নাম. মধুকাদিপুপ্ফপনসাদিফলউচ্ছুমুদ্দিকাদিনানাসম্ভাৰানং ৰসা চিৰপৰিৱাসিতা মেৰযং নাম, আসৱোতি অত্থো.

৭০৪. তংসম্পযুত্তত্তাতি ৱিৰতিসম্পযুত্তত্তা, ৱিৰতিচেতনাসম্পযুত্তত্তা ৱা.

কম্মপথা এৱাতি অসব্বসাধাৰণেসু ঝানাদিকোট্ঠাসেসু কম্মপথকোট্ঠাসিকা এৱাতি অত্থো. সুৰাপানম্পি ‘‘সুৰাপানং, ভিক্খৱে, আসেৱিতং…পে… নিৰযসংৱত্তনিক’’ন্তি (অ. নি. ৮.৪০) ৱিসুং কম্মপথভাৱেন আগতন্তি ৱদন্তি. এৱং সতি একাদস কম্মপথা সিযুং, তস্মাস্স যথাৱুত্তেস্ৱেৱ কম্মপথেসু উপকাৰকত্তসভাগত্তৱসেন অনুপৱেসো দট্ঠব্বো.

সত্তইত্থিপুৰিসাৰম্মণতা তথাগহিতসঙ্খাৰাৰম্মণতায দট্ঠব্বা. ‘‘পঞ্চ সিক্খাপদা পৰিত্তাৰম্মণা’’তি হি ৱুত্তং. ‘‘সব্বাপি হি এতা ৱীতিক্কমিতব্বৱত্থুং আৰম্মণং কত্ৱা ৱেৰচেতনাহি এৱ ৱিৰমন্তী’’তি (ৱিভ. অট্ঠ. ৭০৪) চ ৱক্খতীতি.

গোৰূপসীলকো পকতিভদ্দো. কাকণিকমত্তস্স অত্থাযাতিআদি লোভৱসেন মুসাকথনে ৱুত্তং. দোসৱসেন মুসাকথনে চ নিট্ঠপ্পত্তো সঙ্ঘভেদো গহিতো. দোসৱসেন পৰস্স ব্যসনত্থায মুসাকথনে পন তস্স তস্স গুণৱসেন অপ্পসাৱজ্জমহাসাৱজ্জতা যোজেতব্বা, মন্দাধিমত্তব্যসনিচ্ছাৱসেন চ. নিস্সগ্গিযথাৱৰৱিজ্জামযিদ্ধিমযা সাহত্থিকাণত্তিকেস্ৱেৱ পৱিসন্তীতি দ্ৱে এৱ গহিতা.

পঞ্চপি কম্মপথা এৱাতি চেতনাসঙ্খাতং পৰিযাযসীলং সন্ধায ৱুত্তং, ৱিৰতিসীলং পন মগ্গকোট্ঠাসিকন্তি. তেসং পনাতি সেসসীলানং.

৭১২. ‘‘কোট্ঠাসভাৱেনা’’তি ৱুত্তং, ‘‘পতিট্ঠানভাৱেনা’’তি পন ৱত্তব্বং. এত্থ পন সিক্খাপদৱাৰে পহীনপঞ্চাভব্বট্ঠানস্স অৰহতো ৱিৰমিতব্বৱেৰস্স সব্বথা অভাৱা কিৰিযেসু ৱিৰতিযো ন সন্তীতি ন উদ্ধটা, সেক্খানং পন পহীনপঞ্চৱেৰত্তেপি তংসভাগতায ৱেৰভূতানং অকুসলানং ৱেৰনিদানানং লোভাদীনঞ্চ সব্ভাৱা ৱিৰতীনং উপ্পত্তি ন ন ভৱিস্সতি. অকুসলসমুট্ঠিতানি চ কাযকম্মাদীনি তেসং কাযদুচ্চৰিতাদীনি ৱেৰানেৱ, তেহি চ তেসং ৱিৰতিযো হোন্তেৱ, যতো নফলভূতস্সপি উপৰিমগ্গত্তযস্স অট্ঠঙ্গিকতা হোতি. সিক্খাৱাৰে চ অভাৱেতব্বতায ফলধম্মাপি ন সিক্খিতব্বা, নাপি সিক্খিতসিক্খস্স উপ্পজ্জমানা কিৰিযধম্মাতি ন কেচি অব্যাকতা সিক্খাতি উদ্ধটা.

অভিধম্মভাজনীযৱণ্ণনা নিট্ঠিতা.

২. পঞ্হপুচ্ছকৱণ্ণনা

৭১৪. সম্পত্তৱিৰতিৱসেনাতি সম্পত্তে পচ্চুপ্পন্নে আৰম্মণে যথাৱিৰমিতব্বতো ৱিৰতিৱসেনাতি অত্থো.

পঞ্হপুচ্ছকৱণ্ণনা নিট্ঠিতা.

সিক্খাপদৱিভঙ্গৱণ্ণনা নিট্ঠিতা.