১১. মগ্গঙ্গৱিভঙ্গো

২. অভিধম্মভাজনীযৱণ্ণনা

৪৯০. অভিধম্মে লোকুত্তৰচিত্তভাজনীযেপি ‘‘তস্মিং খো পন সমযে চত্তাৰো খন্ধা হোন্তি…পে… অট্ঠঙ্গিকো মগ্গো হোতী’’তি (ধ. স. ৩৩৭) ৱুত্তত্তা ইধাপি অভিধম্মভাজনীযে অভিধম্মানুৰূপং দেসনং কৰোন্তো ‘‘অট্ঠঙ্গিকো মগ্গো’’তি অৰিযোপপদতং ন কৰোতি.

৪৯৩. তস্মিং সমযেতি লোকিযকালেন এতেসং অতিৰেককিচ্চং দস্সেতি. ৱিৰতিউপ্পাদনেন মিচ্ছাৱাচাদীনি পুগ্গলং পজহাপেন্তীতি সম্মাদিট্ঠাদীনি পঞ্চ ‘‘কাৰাপকঙ্গানী’’তি ৱুত্তানি. সম্মাৱাচাদিকিৰিযা হি ৱিৰতি, তঞ্চ এতানি কাৰাপেন্তীতি. ৱিৰতিৱসেনাতি ৱিৰমণকিৰিযাৱসেন, ন কাৰাপকভাৱেন কত্তুভাৱেন চাতি অত্থো. ইমং…পে… কিচ্চাতিৰেকতং দস্সেতুন্তি লোকুত্তৰক্খণেপি ইমানেৱ পঞ্চ সম্মাৱাচাদিত্তযস্স একক্খণে কাৰাপকানীতি দস্সেতুন্তি অত্থো. মিচ্ছাদিট্ঠাদিকা দস, তপ্পচ্চযা অকুসলা চ দসাতি ৱীসতি অকুসলপক্খিযা, সম্মাদিট্ঠাদিকা দস, তপ্পচ্চযা চ কুসলা দসাতি ৱীসতি কুসলপক্খিযা চ মহাচত্তাৰীসকসুত্তে (ম. নি. ৩.১৩৬) ৱুত্তাতি তস্স এতং নামং.

পুঞ্ঞভাগিযাতি পুঞ্ঞকোট্ঠাসে ভৱা, পুঞ্ঞাভিসঙ্খাৰেকদেসভূতাতি অত্থো. খন্ধোপধিং ৱিপচ্চতি, তত্থ ৱা ৱিপচ্চতীতি উপধিৱেপক্কা.

পঞ্চঙ্গিকমগ্গং উদ্দিসিত্ৱা তত্থ একেকং পুচ্ছিত্ৱা তস্স তস্সেৱ সমযৱৱত্থানং কত্ৱা ৱিস্সজ্জনং ‘‘পাটিযেক্কং পুচ্ছিত্ৱা পাটিযেক্কং ৱিস্সজ্জন’’ন্তি ৱুত্তং. সহ পন পুচ্ছিত্ৱা পঞ্চন্নম্পি সমযৱৱত্থানং কত্ৱা ৱিস্সজ্জনে ‘‘তত্থ কতমা সম্মাদিট্ঠিযা পঞ্ঞা’’তিআদিকো পটিনিদ্দেসো একতো ৱিস্সজ্জনপটিনিদ্দেসত্তা ন পাটিযেক্কং পুচ্ছাৱিস্সজ্জনং নাম হোতীতি. তত্থ পঞ্চঙ্গিকৱাৰে এৱ পাটিযেক্কং পুচ্ছাৱিস্সজ্জনং সম্মাদিট্ঠাদীসু কাৰাপকঙ্গেসু একেকমুখায ভাৱনায মগ্গুপ্পত্তিং সন্ধায কতন্তি ৱেদিতব্বং. ৱাচাদীনি হি পুব্বসুদ্ধিযা সিজ্ঝন্তি, ন মগ্গস্স উপচাৰেনাতি.

অভিধম্মভাজনীযৱণ্ণনা নিট্ঠিতা.

মগ্গঙ্গৱিভঙ্গৱণ্ণনা নিট্ঠিতা.