১০. জীৱিতিন্দ্ৰিযকথাৱণ্ণনা

৫৪০. অৰূপজীৱিতিন্দ্ৰিযন্তিপঞ্হে ‘‘অত্থি অৰূপীনং ধম্মানং আযূ’’তিআদিকং পঞ্হং অন্তং গহেত্ৱা ৱদতি. অৰূপধম্মানং চিত্তৱিপ্পযুত্তং জীৱিতিন্দ্ৰিযসন্তানং নাম অত্থীতি ইচ্ছতীতি এত্থ ৰূপাৰূপধম্মানং তং ইচ্ছন্তো অৰূপধম্মানং ইচ্ছতীতি ৱত্তুং যুত্তোতি ‘‘অৰূপধম্মান’’ন্তি ৱুত্তন্তি দট্ঠব্বং.

৫৪১. সত্তসন্তানে ৰূপিনো ৱা ধম্মা হোন্তূতিআদিনাপি তমেৱ জীৱিতিন্দ্ৰিযসন্তানং ৱদতীতি ৱেদিতব্বং.

৫৪২. পুব্বাপৰভাগং সন্ধাযাতি সমাপত্তিযা আসন্নভাৱতো তদাপি সমাপন্নোযেৱাতি অধিপ্পাযো.

৫৪৪-৫৪৫. দ্ৱে জীৱিতিন্দ্ৰিযানীতি ‘‘পুচ্ছা সকৱাদিস্স, পটিঞ্ঞা ইতৰস্সা’’তি পুৰিমপাঠো. ‘‘পুচ্ছা পৰৱাদিস্স, পটিঞ্ঞা সকৱাদিস্সা’’তি পচ্ছিমপাঠো, সো যুত্তো.

জীৱিতিন্দ্ৰিযকথাৱণ্ণনা নিট্ঠিতা.