৭. দিব্বচক্খুকথাৱণ্ণনা

৩৭৩. উপত্থদ্ধন্তি যথা ৱিসযানুভাৱগোচৰেহি ৱিসিট্ঠং হোতি, তথা পচ্চযভূতেন কতবলাধানন্তি অত্থো. তংমত্তমেৱাতি পুৰিমং মংসচক্খুমত্তমেৱ ধম্মুপত্থদ্ধং ন হোতীতি অত্থো. অনাপাথগতন্তি মংসচক্খুনা গহেতব্বট্ঠানং আপাথং নাগতং. এত্থ চ ৱিসযস্স দীপকং আনুভাৱগোচৰানমেৱ অসদিসতং ৱদন্তো যাদিসো মংসচক্খুস্স ৱিসযোতি ৱিসযগ্গহণং ন ৱিসযৱিসেসদস্সনত্থং, অথ খো যাদিসে ৱিসযে আনুভাৱগোচৰৱিসেসা হোন্তি, তাদিসস্স ৰূপৱিসযস্স দস্সনত্থন্তি দীপেতি, সদিসস্স ৱা ৱিসযস্স আনুভাৱগোচৰৱিসেসোৱ ৱিসেসং.

ন চ মংসচক্খুমেৱ দিব্বচক্খূতি ইচ্ছতীতি ধম্মুপত্থদ্ধকালে পুৰিমং মংসচক্খুমেৱাতি ন ইচ্ছতীতি অধিপ্পাযো. মংসচক্খুস্স উপ্পাদো মগ্গোতি মংসচক্খুপচ্চযতাদস্সনত্থমেৱ ৱুত্তং, ন তেন অনুপাদিন্নতাসাধনত্থং. ৰূপাৱচৰিকানন্তি ৰূপাৱচৰজ্ঝানপচ্চযেন উপ্পন্নানি মহাভূতানি ৰূপাৱচৰিকানীতি সো ইচ্ছতীতি অধিপ্পাযো. এস নযো ‘‘অৰূপাৱচৰিকান’’ন্তি এত্থাপি. অৰূপাৱচৰক্খণে ৰূপাৱচৰচিত্তস্স অভাৱা পটিক্খিপতীতি তস্মিংযেৱ খণে ৰূপাৱচৰং হুত্ৱা অৰূপাৱচৰং ন জাতন্তি পটিক্খিপতীতি অধিপ্পাযো.

৩৭৪. কিঞ্চাপি দিব্বচক্খুনো ধম্মুপত্থদ্ধস্স পঞ্ঞাচক্খুভাৱং ন ইচ্ছতি, যেন তীণি চক্খূনি ধম্মুপত্থম্ভেন চক্খুন্তৰভাৱং ৱদতো ভৱেয্যুন্তি অধিপ্পাযো.

দিব্বচক্খুকথাৱণ্ণনা নিট্ঠিতা.