৭. ধম্মকথাৱণ্ণনা

৮৮৭-৮৮৮. ধম্মকথাযং ৰূপট্ঠতো অঞ্ঞস্স ৰূপস্স অভাৱাতি যো ৰূপস্স নিযামো ৱুচ্চেয্য, সো ৰূপট্ঠো নাম কোচি ৰূপতো অঞ্ঞো নত্থীতি ৰূপট্ঠতো অঞ্ঞং ৰূপঞ্চ ন হোতি, তস্মা ৰূপং ৰূপমেৱ, ন ৱেদনাদিসভাৱন্তি অধিপ্পাযেন ‘‘ৰূপং ৰূপট্ঠেন নিযত’’ন্তি ৱত্তব্বং, ন অঞ্ঞথা ৰূপট্ঠেন নিযামেনাতি অধিপ্পাযো. তত্থ ৰূপতো অঞ্ঞস্স ৰূপট্ঠস্স অভাৱে দস্সিতে ৰূপট্ঠতো অঞ্ঞস্স ৰূপস্স অভাৱো দস্সিতোযেৱ নাম হোতীতি তমেৱ ৰূপতো অঞ্ঞস্স ৰূপট্ঠস্স অভাৱং দস্সেন্তো ‘‘ৰূপসভাৱো হী’’তিআদিমাহ. এস ৱোহাৰোতি ৰূপস্স সভাৱো ৰূপসভাৱো, ৰূপস্স অত্থো ৰূপট্ঠোতি এৱং অঞ্ঞত্তং গহেত্ৱা ৱিয পৱত্তো ৰূপসভাৱৱোহাৰো ৰূপট্ঠৱোহাৰো ৱা ৱেদনাদীহি নানত্তমেৱ সো সভাৱোতি নানত্তসঞ্ঞাপনত্থং হোতীতি অত্থো. তস্মাতি ৰূপস্স ৰূপট্ঠেন অনঞ্ঞত্তা. ‘‘ৰূপং ৰূপমেৱ, ন ৱেদনাদিসভাৱ’’ন্তি অৱত্ৱা ‘‘ৰূপং ৰূপট্ঠেন নিযত’’ন্তি ৱদতো তঞ্চ ৱচনং ৱুত্তপ্পকাৰেন সদোসং, অথ কস্মা ‘‘ৰূপঞ্হি ৰূপট্ঠেন নিযতন্তি ৰূপং ৰূপমেৱ, ন ৱেদনাদিসভাৱন্তি অধিপ্পাযেন ৱত্তব্ব’’ন্তি ৱদন্তো ‘‘ৰূপং ৰূপট্ঠেন নিযত’’ন্তি পটিজানাতীতি অত্থো দট্ঠব্বো. ননু চেতং অত্তনাৱ ৱুত্তং, ন পৰেনাতি পটিজানাতীতি ন ৱত্তব্বন্তি? ন, অত্তানম্পি পৰং ৱিয ৱচনতো. ৱত্তব্বন্তি ৱা সকৱাদিনা ৱত্তব্বন্তি ৱুত্তং হোতি. যদি চ তেন ৱত্তব্বং পটিজানাতি চ সো এতমত্থন্তি, অথ কস্মা পটিজানাতি সকৱাদীতি অযমেত্থ অত্থো. অত্থন্তৰৱসেনাতি তত্থ ৱুত্তমেৱ কাৰণং নিগূহিত্ৱা পৰেন চোদিতন্তি তমেৱ কাৰণং দস্সেত্ৱা চোদনং নিৱত্তেতি. ইতো অঞ্ঞথাতি ৰূপাদিসভাৱমত্তং মুঞ্চিত্ৱা তেন পৰিকপ্পিতং নিযতং নত্থীতি তস্স পৰিকপ্পিতস্স নিৱত্তনত্থং পুন তেনেৱ নযেন চোদেতুং ‘‘মিচ্ছত্তনিযত’’ন্তিআদিমাহাতি অত্থো.

ধম্মকথাৱণ্ণনা নিট্ঠিতা.

একৱীসতিমৱগ্গৱণ্ণনা নিট্ঠিতা.