২. নত্থিঅৰহতোঅকালমচ্চূতিকথাৱণ্ণনা

৭৮০. অযোনিসো গহেত্ৱাতি অলদ্ধৱিপাকৱাৰানম্পি কম্মানং ব্যন্তীভাৱং ন ৱদামীতি অত্থং গহেত্ৱাতি অধিপ্পাযো. কেচি পন ‘‘কম্মানং ৱিপাকং অপ্পটিসংৱিদিত্ৱা পুগ্গলস্স ব্যন্তীভাৱং ন ৱদামীতি এৱং অযোনিসো অত্থং গহেত্ৱা’’তি ৱদন্তি.

৭৮১. তাৱ ন কমতীতি লদ্ধিযা পটিক্খিপতীতি তাৱ ন কমতি, ততো পৰং কমতীতি লদ্ধিযা পটিক্খিপতীতি অধিপ্পাযো. এত্থ কিৰ ‘‘সতি জীৱিতে জীৱিতাৱসেসে জীৱিতা ৱোৰোপেতী’’তি ৱচনতো অত্তনো ধম্মতায মৰন্তং কোট্টেন্তস্স ৱা সীসং ৱা ছিন্দন্তস্স নত্থি পাণাতিপাতোতি আচৰিযা ৱদন্তি. পাণো পাণসঞ্ঞিতা ৱধকচিত্তউপক্কমমৰণেসু ৱিজ্জমানেসুপি ন তেন উপক্কমেন মতোতি নত্থি পাণাতিপাতোতি অধিপ্পাযো. এৱং পন মৰন্তেন তেন একচিত্তৱাৰম্পি ধম্মতামৰণতো ওৰতো ন মতোতি দুব্বিঞ্ঞেয্যমেতং.

নত্থিঅৰহতোঅকালমচ্চূতিকথাৱণ্ণনা নিট্ঠিতা.