৯-১০. অভিসন্দসুত্তাদিৱণ্ণনা

৩৯-৪০. নৱমে পুঞ্ঞাভিসন্দাতি পুঞ্ঞনদিযো. কুসলাভিসন্দাতি কুসলানং পৱাহা. সুখস্সাহাৰাতি সুখপচ্চযা. অগ্গানীতি ঞাতত্তা অগ্গঞ্ঞানি. চিৰৰত্তং ঞাতত্তা ৰত্তঞ্ঞানি. অৰিযানং সাধূনং ৱংসানীতি ঞাতত্তা ৱংসঞ্ঞানি. পোৰাণানং আদিপুৰিসানং এতানীতি পোৰাণানি. সব্বসো কেনচিপি পকাৰেন সাধূহি ন কিণ্ণানি ন খিত্তানি ছড্ডিতানীতি অসংকিণ্ণানি. অযঞ্চ নযো নেসং যথা অতীতে, এৱং এতৰহি অনাগতে চাতি আহ ‘‘অসংকিণ্ণপুব্বানি ন সংকিযন্তি ন সংকিযিস্সন্তী’’তি. ততো এৱ অপ্পটিকুট্ঠানি. ন হি কদাচি ৱিঞ্ঞূ সমণব্ৰাহ্মণা হিংসাদিপাপধম্মং অনুজানন্তি. অপৰিমাণানং সত্তানং অভযং দেতীতি সব্বেসু ভূতেসু নিহিতদণ্ডত্তা সকলস্সপি সত্তকাযস্স ভযাভাৱং দেতি. অৱেৰন্তি ৱেৰাভাৱং. অব্যাবজ্ঝন্তি নিদ্দুক্খতং. এৱমেত্থ সঙ্খেপতো পাড়িৱণ্ণনা ৱেদিতব্বা. দসমে নত্থি ৱত্তব্বং.

অভিসন্দসুত্তাদিৱণ্ণনা নিট্ঠিতা.

দানৱগ্গৱণ্ণনা নিট্ঠিতা.