৫. উপোসথৱগ্গো
১-৮. সংখিত্তূপোসথসুত্তাদিৱণ্ণনা
৪১-৪৮. পঞ্চমস্স পঠমাদীসু নত্থি ৱত্তব্বং. ছট্ঠে (সং. নি. টী. ১.১.১৬৫) পঞ্চ অঙ্গানি এতস্সাতি পঞ্চঙ্গং, পঞ্চঙ্গমেৱ পঞ্চঙ্গিকং, তস্স পঞ্চঙ্গিকস্স. মহতী দদ্দৰী ৱীণাৱিসেসোপি আততমেৱাতি ‘‘চম্মপৰিযোনদ্ধেসূ’’তি ৱিসেসনং কতং. একতলতূৰিযং কুম্ভথুনদদ্দৰিকাদি. উভযতলং ভেৰিমুদিঙ্গাদি. চম্মপৰিযোনদ্ধং হুত্ৱা ৱিনিবদ্ধং আততৱিততং. সব্বসো পৰিযোনদ্ধং নাম চতুৰস্সঅম্বণং পণৱাদি চ. গোমুখীআদীনম্পি এত্থেৱ সঙ্গহো দট্ঠব্বো. ৱংসাদীতি আদি-সদ্দেন সঙ্খাদীনং সঙ্গহো. সম্মাদীতি সম্মতাড়কংসতাড়সিলাসলাকতাড়াদি. তত্থ সম্মতাড়ং নাম দন্তমযতাড়ং. কংসতাড়ং লোহমযং. সিলামযং অযোপত্তেন চ ৱাদনতাড়ং সিলাসলাকতাড়ং. সুমুচ্ছিতস্সাতি সুট্ঠু পটিযত্তস্স. পমাণেতি নাতিদড়্হনাতিসিথিলসঙ্খাতে মজ্ঝিমে মুচ্ছনাপমাণে. ছেকোতি পটু পট্ঠো. সো চস্স পটুভাৱো মনোহৰোতি আহ ‘‘সুন্দৰো’’তি. ৰঞ্জেতুন্তি ৰাগং উপ্পাদেতুং. খমতেৱাতি ৰোচতেৱ. ন নিব্বিন্দতীতি ন তজ্জেতি, সোতসুখভাৱতো পিযাযিতব্বোৱ হোতি.
ভত্তাৰং নাতিমঞ্ঞতীতি সামিকং মুঞ্চিত্ৱা অঞ্ঞং মনসাপি ন পত্থেতি. উট্ঠাহিকাতি উট্ঠানৱীৰিযসম্পন্না. অনলসাতি নিক্কোসজ্জা. সঙ্গহিতপৰিজ্জনাতি সম্মাননাদীহি চেৱ ছণাদীসু পেসেতব্ব-পিযভণ্ডাদিপণ্ণাকাৰপেসনাদীহি চ সঙ্গহিতপৰিজনা. ইধ পৰিজনো নাম সামিকস্স চেৱ অত্তনো চ ঞাতিজনো. সম্ভতন্তি কসিৱণিজ্জাদীনি কত্ৱা আভতধনং. সত্তমট্ঠমানি উত্তানত্থানি.
সংখিত্তূপোসথসুত্তাদিৱণ্ণনা নিট্ঠিতা.
৯-১০. পঠমইধলোকিকসুত্তাদিৱণ্ণনা
৪৯-৫০. নৱমে ইধলোকৱিজযাযাতি ইধলোকৱিজিননত্থায অভিভৱত্থায. যো হি দিট্ঠধম্মিকং অনত্থং পৰিৱজ্জনৱসেন অভিভৱতি, ততো এৱ তদত্থং সম্পাদেতি, সো ইধলোকৱিজযায পটিপন্নো নাম হোতি পচ্চত্থিকনিগ্গণ্হনতো সদত্থসম্পাদনতো চ. তেনাহ ‘‘অযংস লোকো আৰদ্ধো হোতী’’তি. (পসংসাৱহতো তযিদং পসংসাৱহনং কিত্তিসদ্দেন ইধলোকে সদ্দানং চিত্ততোসনৱিদ্ধেয্যভাৱাপাদনেন চ হোতীতি দট্ঠব্বং.) সুসংৱিহিতকম্মন্তোতি যাগুভত্তপচনকালাদীনি অনতিক্কমিত্ৱা তস্স তস্স সাধুকং কৰণেন সুট্ঠু সংৱিহিতকম্মন্তো. পৰলোকৱিজযাযাতি পৰলোকস্স ৱিজিননত্থায অভিভৱত্থায. যো হি সম্পৰাযিকং অনত্থং পৰিৱজ্জনৱসেন অভিভৱতি, ততো এৱ তদত্থং সম্পাদেতি, সো পৰলোকৱিজযায পটিপন্নো নাম হোতি. সেসং সব্বত্থ উত্তানমেৱ.
পঠমইধলোকিকসুত্তাদিৱণ্ণনা নিট্ঠিতা.
উপোসথৱগ্গৱণ্ণনা নিট্ঠিতা.
পঠমপণ্ণাসকং নিট্ঠিতং.