৮. অৰহত্তৱগ্গো

১-৩. দুক্খসুত্তাদিৱণ্ণনা

৭৫-৭৭. অট্ঠমস্স পঠমাদীসু নত্থি ৱত্তব্বং. ততিযে তিৱিধং কুহনৱত্থুন্তি পচ্চযপ্পটিসেৱনসামন্তজপ্পনইৰিযাপথপ্পৱত্তনসঙ্খাতং তিৱিধং কুহনৱত্থুং. উক্খিপিত্ৱাতি ‘‘মহাকুটুম্বিকো মহানাৱিকো মহাদানপতী’’তিআদিনা পগ্গণ্হিত্ৱা লপনং. অৱক্খিপিত্ৱাতি ‘‘কিং ইমস্স জীৱিতং, বীজভোজনো নামায’’ন্তি হীড়েত্ৱা লপনং.

দুক্খসুত্তাদিৱণ্ণনা নিট্ঠিতা.

৪. সুখসোমনস্সসুত্তৱণ্ণনা

৭৮. চতুত্থে যথাৱুত্তধম্মাদীসু তস্স কিলেসনিমিত্তং দুক্খং অনৱস্সনন্তি ‘‘সুখসোমনস্সবহুলো ৱিহৰতী’’তি ৱুত্তং. কাযিকসুখঞ্চেৱ চেতসিকসোমনস্সঞ্চ বহুলং অস্সাতি সুখসোমনস্সবহুলো. যৱতি তেন ফলং মিস্সিতং ৱিয হোতীতি যোনি, একন্তিকং কাৰণং. অস্সাতি যথাৱুত্তস্স ভিক্খুনো. পৰিপুণ্ণন্তি অৱিকলং অনৱসেসং.

সুখসোমনস্সসুত্তৱণ্ণনা নিট্ঠিতা.

৫. অধিগমসুত্তৱণ্ণনা

৭৯. পঞ্চমে আগচ্ছন্তি এতেন কুসলা ৱা অকুসলা ৱাতি আগমনং, কুসলাকুসলানং উপ্পত্তিকাৰণং. তত্থ কুসলোতি আগমনকুসলো. এৱং ধম্মে মনসিকৰোতো কুসলা ৱা অকুসলা ৱা ধম্মা অভিৱড্ঢন্তীতি এৱং জানন্তো. অপগচ্ছন্তি কুসলা ৱা অকুসলা ৱা এতেনাতি অপগমনং. তেসং এৱ অনুপ্পত্তিকাৰণং, তত্থ কুসলোতি অপগমনকুসলো. এৱং ধম্মে মনসিকৰোতো কুসলা ৱা অকুসলা ৱা ধম্মা নাভিৱড্ঢন্তীতি এৱং জানন্তো. উপাযকুসলোতি ঠানুপ্পত্তিকপঞ্ঞাসমন্নাগতো. ইদঞ্চ অচ্চাযিককিচ্চে ৱা ভযে ৱা উপ্পন্নে তস্স তিকিচ্ছনত্থং ঠানুপ্পত্তিযা কাৰণজাননৱসেন ৱেদিতব্বং.

অধিগমসুত্তৱণ্ণনা নিট্ঠিতা.

৬-৭. মহন্তত্তসুত্তাদিৱণ্ণনা

৮০-৮১. ছট্ঠে সম্পত্তেতি কিলেসে সম্পত্তে. সত্তমং উত্তানমেৱ.

মহন্তত্তসুত্তাদিৱণ্ণনা নিট্ঠিতা.

৮-১০. দুতিযনিৰযসুত্তাদিৱণ্ণনা

৮২-৮৪. অট্ঠমে কাযপাগব্ভিযাদীহীতি আদি-সদ্দেন ৱচীপাগব্ভিযং মনোপাগব্ভিযঞ্চ সঙ্গণ্হাতি. নৱমাদীনি উত্তানত্থানেৱ.

দুতিযনিৰযসুত্তাদিৱণ্ণনা নিট্ঠিতা.

অৰহত্তৱগ্গৱণ্ণনা নিট্ঠিতা.