৯. সীতিৱগ্গো

১. সীতিভাৱসুত্তৱণ্ণনা

৮৫. নৱমস্স পঠমে সীতিভাৱন্তি নিব্বানং, কিলেসৱূপসমং ৱা. নিগ্গণ্হাতীতি অচ্চাৰদ্ধৱীৰিযতাদীহি উদ্ধতং চিত্তং উদ্ধচ্চপক্খতো ৰক্খণৱসেন নিগ্গণ্হাতি. পগ্গণ্হাতীতি অতিসিথিলৱীৰিযতাদীহি লীনং চিত্তং কোসজ্জপাততো ৰক্খণৱসেন পগ্গণ্হাতি. সম্পহংসেতীতি সমপ্পৱত্তচিত্তং তথাপৱত্তিযং পঞ্ঞায তোসেতি উত্তেজেতি ৱা. যদা ৱা পঞ্ঞাপযোগমন্দতায উপসমসুখানধিগমেন ৱা নিৰস্সাদং চিত্তং ভাৱনায ন পক্খন্দতি, তদা জাতিআদীনি সংৱেগৱত্থূনি পচ্চৱেক্খিত্ৱা সম্পহংসেতি সমুত্তেজেতি. অজ্ঝুপেক্খতীতি যদা পন চিত্তং অলীনং অনুদ্ধতং অনিৰস্সাদং আৰম্মণে সমপ্পৱত্তং সম্মদেৱ ভাৱনাৱীতিং ওতিণ্ণং হোতি, তদা পগ্গহনিগ্গহসম্পহংসনেসু কিঞ্চি ব্যাপাৰং অকত্ৱা সমপ্পৱত্তেসু অস্সেসু সাৰথী ৱিয অজ্ঝুপেক্খতি, উপেক্খকোৱ হোতি. পণীতাধিমুত্তিকোতি পণীতে উত্তমে মগ্গফলে অধিমুত্তো নিন্নপোণপব্ভাৰো.

সীতিভাৱসুত্তৱণ্ণনা নিট্ঠিতা.

২-১১. আৱৰণসুত্তাদিৱণ্ণনা

৮৬-৯৫. দুতিযে অচ্ছন্দিকোতি কত্তুকম্যতাকুসলচ্ছন্দৰহিতো. উত্তৰকুৰুকা মনুস্সা অচ্ছন্দিকট্ঠানং পৱিট্ঠা. দুপ্পঞ্ঞোতি ভৱঙ্গপঞ্ঞায পৰিহীনো. ভৱঙ্গপঞ্ঞায পন পৰিপুণ্ণাযপি যস্স ভৱঙ্গং লোকুত্তৰস্স পচ্চযো ন হোতি, সোপি দুপ্পঞ্ঞো এৱ নাম. অভব্বো নিযামং ওক্কমিতুং কুসলেসু ধম্মেসু সম্মত্তন্তি কুসলেসু ধম্মেসু সম্মত্তনিযামসঙ্খাতং অৰিযমগ্গং ওক্কমিতুং অধিগন্তুং অভব্বো. ন কম্মাৱৰণতাযাতিআদীসু অভব্বৱিপৰিযাযেন অত্থো ৱেদিতব্বো. চতুত্থাদীনি উত্তানত্থানি.

আৱৰণসুত্তাদিৱণ্ণনা নিট্ঠিতা.

সীতিৱগ্গৱণ্ণনা নিট্ঠিতা.