২. ফগ্গুনসুত্তৱণ্ণনা

৫৬. দুতিযে সমধোসীতি সমন্ততো অধোসি. সব্বভাগেন পৰিফন্দনচলনাকাৰেন অপচিতিং দস্সেতি. ৱত্তং কিৰেতং বাড়্হগিলানেনপি ৱুড্ঢতৰং দিস্ৱা উট্ঠিতাকাৰেন অপচিতি দস্সেতব্বা. তেন পন ‘‘মা চলি মা চলী’’তি ৱত্তব্বো, তং পন চলনং উট্ঠানাকাৰদস্সনং হোতীতি আহ ‘‘উট্ঠানাকাৰং দস্সেতী’’তি. সন্তিমানি আসনানীতি পঠমমেৱ পঞ্ঞত্থাসনং সন্ধায ৱদতি. বুদ্ধকালস্মিঞ্হি একস্সপি ভিক্খুনো ৱসনট্ঠানে – ‘‘সচে সত্থা আগচ্ছিস্সতি, আসনং পঞ্ঞত্তমেৱ হোতূ’’তি অন্তমসো ফলকমত্তম্পি পণ্ণসন্থাৰমত্তম্পি পঞ্ঞত্তমেৱ. খমনীযং যাপনীযন্তি কচ্চি দুক্খং খমিতুং, ইৰিযাপথং ৱা যাপেতুং সক্কাতি পুচ্ছতি. সীসৱেদনাতি কুতোচি নিক্খমিতুং অলভমানেহি ৱাতেহি সমুট্ঠাপিতা বলৱতিযো সীসৱেদনা হোন্তি.

ফগ্গুনসুত্তৱণ্ণনা নিট্ঠিতা.