৯. আনন্দসুত্তৱণ্ণনা

৫১. নৱমে থেৰা ভিক্খূ ৱিহৰন্তি বহুস্সুতা আগতাগমাতিআদিপাড়িপদেসু ইমিনাৱ নযেন অত্থো দট্ঠব্বো – সীলাদিগুণানং থিৰভাৱপ্পত্তিযা থেৰা. সুত্তগেয্যাদি বহু সুতং এতেসন্তি বহুস্সুতা. ৱাচুগ্গতধাৰণেন সম্মদেৱ গৰূনং সন্তিকে আগমিতভাৱেন আগতো পৰিযত্তিধম্মসঙ্খাতো আগমো এতেসন্তি আগতাগমা. সুত্তাতিধম্মসঙ্খাতস্স ধম্মস্স ধাৰণেন ধম্মধৰা. ৱিনযধাৰণেন ৱিনযধৰা. তেসংযেৱ ধম্মৱিনযানং মাতিকায ধাৰণেন মাতিকাধৰা. তত্থ তত্থ ধম্মপৰিপুচ্ছায পৰিপুচ্ছতি. তং অত্থপৰিপুচ্ছায পৰিপঞ্হতি ৱীমংসতি ৱিচাৰেতি. ইদং, ভন্তে, কথং, ইমস্স ক্ৱত্থোতি পৰিপুচ্ছনপঞ্হনাকাৰদস্সনং. আৱিৱটঞ্চেৱ পাড়িযা অত্থং পদেসন্তৰপাড়িদস্সনেন আগমতো ৱিৱৰন্তি. অনুত্তানীকতঞ্চ যুত্তিৱিভাৱনেন উত্তানীকৰোন্তি. কঙ্খাট্ঠানিযেসু ধম্মেসু সংসযুপ্পত্তিযা হেতুযা গণ্ঠিট্ঠানভূতেসু পাড়িপদেসু যাথাৱতো ৱিনিচ্ছযদানেন কঙ্খং পটিৱিনোদেন্তি.

আনন্দসুত্তৱণ্ণনা নিট্ঠিতা.