(৮) ৩. যোধাজীৱৱগ্গো

১-২. পঠমচেতোৱিমুত্তিফলসুত্তাদিৱণ্ণনা

৭১-৭২. ততিযস্স পঠমে অৱিজ্জাপলিঘন্তি এত্থ অৱিজ্জাতি ৱট্টমূলিকা অৱিজ্জা, অযং পচুৰজনেহি উক্খিপিতুং অসক্কুণেয্যভাৱতো দুক্খিপনট্ঠেন নিব্বানদ্ৱাৰপ্পৱেসৱিবন্ধনেন চ ‘‘পলিঘো ৱিযাতি পলিঘো’’তি ৱুচ্চতি. তেনেস তস্সা উক্খিত্তত্তা ‘‘উক্খিত্তপলিঘো’’তি ৱুত্তো. পুনব্ভৱস্স কৰণসীলো, পুনব্ভৱং ৱা ফলং অৰহতীতি পোনোভৱিকা, পুনব্ভৱদাযিকাতি অত্থো. জাতিসংসাৰোতি জাযনৱসেন চেৱ সংসৰণৱসেন চ এৱংলদ্ধনামানং পুনব্ভৱক্খন্ধানং পচ্চযো কম্মাভিসঙ্খাৰো. জাতিসংসাৰোতি হি ফলূপচাৰেন কাৰণং ৱুত্তং. তঞ্হি পুনপ্পুনং উপ্পত্তিকাৰণৱসেন পৰিক্খিপিত্ৱা ঠিতত্তা ‘‘পৰিখা’’তি ৱুচ্চতি সন্তানস্স পৰিক্খিপনতো. তেনেস তস্স সংকিণ্ণত্তা ৱিকিণ্ণত্তা সব্বসো খিত্তত্তা ৱিনাসিতত্তা ‘‘সংকিণ্ণপৰিখো’’তি ৱুত্তো.

তণ্হাসঙ্খাতন্তি এত্থ তণ্হাতি ৱট্টমূলিকা তণ্হা. অযঞ্হি গম্ভীৰানুগতট্ঠেন ‘‘এসিকা’’তি ৱুচ্চতি. লুঞ্চিত্ৱা উদ্ধৰিত্ৱা. ওৰম্ভাগিযানীতি ওৰম্ভাগজনকানি কামভৱে উপপত্তিপচ্চযানি কামৰাগসংযোজনাদীনি. এতানি হি কৱাটং ৱিয নগৰদ্ৱাৰং চিত্তং পিদহিত্ৱা ঠিতত্তা ‘‘অগ্গড়া’’তি ৱুচ্চন্তি. তেনেস তেসং নিগ্গতত্তা ভিন্নত্তা ‘‘নিৰগ্গড়ো’’তি ৱুত্তোতি. অগ্গমগ্গেন পন্নো অপচিতো মানদ্ধজো এতস্সাতি পন্নদ্ধজো. পন্নভাৰোতি খন্ধভাৰকিলেসভাৰঅভিসঙ্খাৰভাৰা ওৰোপিতা অস্সাতি পন্নভাৰো. ৱিসংযুত্তোতি চতূহি যোগেহি সব্বকিলেসেহি চ ৱিসংযুত্তো. অস্মিমানোতি ৰূপে অস্মীতি মানো, ৱেদনায, সঞ্ঞায, সঙ্খাৰেসু, ৱিঞ্ঞাণে অস্মিমানো. এত্থ হি পঞ্চপি খন্ধে অৱিসেসতো ‘‘অস্মী’’তি গহেত্ৱা পৱত্তমানো অস্মিমানোতি অধিপ্পেতো.

নগৰদ্ৱাৰস্স পৰিস্সযপটিবাহনত্থঞ্চেৱ সোধনত্থঞ্চ উভোসু পস্সেসু এসিকাথম্ভে নিখণিত্ৱা ঠপেতীতি আহ ‘‘নগৰদ্ৱাৰে উস্সাপিতে এসিকাথম্ভে’’তি. পাকাৰৱিদ্ধংসনেনেৱ পৰিখাভূমিসমকৰণং হোতীতি আহ ‘‘পাকাৰং ভিন্দিত্ৱা পৰিখং ৱিকিৰিত্ৱা’’তি. ‘‘এৱ’’ন্তিআদি উপমাসংসন্দনং. সন্তো সংৱিজ্জমানো কাযো ধম্মসমূহোতি সক্কাযো, উপাদানক্খন্ধপঞ্চকং. দ্ৱত্তিংসকম্মকাৰণা দুক্খক্খন্ধে আগতদুক্খানি. অক্খিৰোগসীসৰোগাদযো. অট্ঠনৱুতি ৰোগা, ৰাজভযাদীনি পঞ্চৱীসতিমহাভযানি. দুতিযং উত্তানমেৱ.

পঠমচেতোৱিমুত্তিফলসুত্তাদিৱণ্ণনা নিট্ঠিতা.

৩-৪. পঠমধম্মৱিহাৰীসুত্তাদিৱণ্ণনা

৭৩-৭৪. ততিযে নিযকজ্ঝত্তেতি অত্তনো সন্তানে. মেত্তায উপসংহৰণৱসেন হিতং এসন্তেন. কৰুণায ৱসেন অনুকম্পমানেন. পৰিগ্গহেত্ৱাতি পৰিতো গহেত্ৱা, ফৰিত্ৱাতি অত্থো. পৰিচ্চাতি পৰিতো কত্ৱা, সমন্ততো ফৰিত্ৱা ইচ্চেৱ অত্থো. ‘‘পটিচ্চা’’তিপি পাঠো. মা পমজ্জিত্থাতি ‘‘ঝাযথা’’তি ৱুত্তসমথৱিপস্সনানং অননুযুঞ্জনেন অঞ্ঞেন ৱা কেনচি পমাদকাৰণেন মা পমাদং আপজ্জিত্থ. নিয্যানিকসাসনে অকত্তব্বকৰণং ৱিয কত্তব্বাকৰণম্পি পমাদোতি. ৱিপত্তিকালেতি সত্তঅসপ্পাযাদিৱিপত্তিযুত্তে কালে. সব্বেপি সাসনে গুণা ইধেৱ সঙ্গহং গচ্ছন্তীতি আহ ‘‘ঝাযথ মা পমাদত্থ…পে… অনুসাসনী’’তি. চতুত্থে নত্থি ৱত্তব্বং.

পঠমধম্মৱিহাৰীসুত্তাদিৱণ্ণনা নিট্ঠিতা.

৫. পঠমযোধাজীৱসুত্তৱণ্ণনা

৭৫. পঞ্চমে যুজ্ঝনং যোধো, সো আজীৱো এতেসন্তি যোধাজীৱা. তেনাহ ‘‘যুদ্ধূপজীৱিনো’’তি. সন্থম্ভিত্ৱা ঠাতুং ন সক্কোতীতি বদ্ধো ধিতিসম্পন্নো ঠাতুং ন সক্কোতি. সমাগতেতি সম্পত্তে. ব্যাপজ্জতীতি ৱিকাৰমাপজ্জতি. তেনাহ ‘‘পকতিভাৱং জহতী’’তি.

ৰজগ্গস্মিন্তি পচ্চত্তে ভুম্মৱচনন্তি আহ ‘‘কিং তস্স পুগ্গলস্স ৰজগ্গং নামা’’তি. ৱিনিব্বেঠেত্ৱাতি গহিতগ্গহণং ৱিস্সজ্জাপেত্ৱা. মোচেত্ৱাতি সৰীৰতো অপনেত্ৱা.

পঠমযোধাজীৱসুত্তৱণ্ণনা নিট্ঠিতা.

৬. দুতিযযোধাজীৱসুত্তৱণ্ণনা

৭৬. ছট্ঠে চম্মন্তি ইমিনা চম্মমযং চম্মমিতি সিব্বিতং, অঞ্ঞং ৱা কেটকফলকাদিং সঙ্গণ্হাতি. ধনুকলাপং সন্নয্হিত্ৱাতি ধনুঞ্চেৱ তূণিৰঞ্চ সন্নয্হিত্ৱা সজ্জেত্ৱা. ধনুদণ্ডস্স জিযাযত্তভাৱকৰণাদিপি হি ধনুনো সন্নয্হনং. তেনেৱাহ ‘‘ধনুঞ্চ সৰকলাপঞ্চ সন্নয্হিত্ৱা’’তি. যুদ্ধসন্নিৱেসেন ঠিতন্তি দ্ৱিন্নং সেনানং ব্যূহনসংৱিধাননযেন কতো যো সন্নিৱেসো, তস্স ৱসেন ঠিতং, সেনাব্যূহসংৱিধানৱসেন সন্নিৱিট্ঠন্তি ৱুত্তং হোতি. উস্সাহঞ্চ ৱাযামঞ্চ কৰোতীতি যুজ্ঝনৱসেন উস্সাহং ৱাযামঞ্চ কৰোতি. পৰিযাপাদেন্তীতি মৰণপৰিযন্তিকং অপৰং পাপেন্তি. তেনাহ ‘‘পৰিযাপাদযন্তী’’তি, জীৱিতং পৰিযাপাদযন্তি মৰণং পটিপজ্জাপেন্তীতি ৱুত্তং হোতি.

অৰক্খিতেনেৱ কাযেনাতিআদীসু হত্থপাদে কীড়াপেন্তো গীৱং ৱিপৰিৱত্তেন্তো কাযং ন ৰক্খতি নাম. নানপ্পকাৰং দুট্ঠুল্লং কৰোন্তো ৱাচং ন ৰক্খতি নাম. কামৱিতক্কাদযো ৱিতক্কেন্তো চিত্তং ন ৰক্খতি নাম. অনুপট্ঠিতায সতিযাতি কাযগতায সতিযা অনুপট্ঠিতায. ৰাগেন অনুগতোতি ৰাগেন অনুপহতো. ৰাগপৰেতোতি ৱা ৰাগেন ফুট্ঠো ফুট্ঠৱিসেন ৱিয সপ্পেন.

অনুদহনট্ঠেনাতি অনুপাযপ্পটিপত্তিযা. সম্পতি আযতিঞ্চ মহাভিতাপট্ঠেন. অনৱত্থিতসভাৱতায ইত্তৰপচ্চুপট্ঠানট্ঠেন. মুহুত্তৰমণীযতায তাৱকালিকট্ঠেন. ব্যত্তেহি অভিভৱনীযতায সব্বঙ্গপচ্চঙ্গপলিভঞ্জনট্ঠেন. ছেদনভেদনাদিঅধিকৰণভাৱেন উগ্ঘট্টনসদিসতায অধিকুট্টনট্ঠেন. অৱণে ৱণং উপ্পাদেত্ৱা অন্তো অনুপৱিসনসভাৱতায ৱিনিৱিজ্ঝনট্ঠেন. দিট্ঠধম্মিকসম্পৰাযিক অনত্থনিমিত্ততায সাসঙ্কসপ্পটিভযট্ঠেন.

দুতিযযোধাজীৱসুত্তৱণ্ণনা নিট্ঠিতা.

৭-৮. পঠমঅনাগতভযসুত্তাদিৱণ্ণনা

৭৭-৭৮. সত্তমে ৱিসেসস্স পত্তিযা ৱিসেসস্স পাপুণনত্থং. ৱীৰিযন্তি পধানৱীৰিযং. তং পন চঙ্কমনৱসেন কৰণে ‘‘কাযিক’’ন্তিপি ৱত্তব্বতং লভতীতি আহ – ‘‘দুৱিধম্পী’’তি. সত্থকৱাতাতি সন্ধিবন্ধনানি কত্তৰিযা ছিন্দন্তা ৱিয পৱত্তৱাতা. তেনাহ – ‘‘সত্থং ৱিযা’’তিআদি. কতকম্মেহীতি কতচোৰকম্মেহি. তে কিৰ কতকম্মা যং নেসং দেৱতং আযাচিত্ৱা কম্মং নিপ্ফন্নং, তস্স উপকাৰত্থায মনুস্সে মাৰেত্ৱা গললোহিতানি গণ্হন্তি. তে ‘‘অঞ্ঞেসু মনুস্সেসু মাৰিযমানেসু কোলাহলং উপ্পজ্জিস্সতি, পব্বজিতং পৰিযেসন্তো নাম নত্থী’’তি মঞ্ঞমানা ভিক্খূ গহেত্ৱা মাৰেন্তি. তং সন্ধাযেতং ৱুত্তং. অকতকম্মেহীতি অটৱিতো গামং আগমনকালে কম্মনিপ্ফত্তত্থং পুৰেতৰং বলিকম্মং কাতুকামেহি. তেনেৱাহ – ‘‘চোৰিকং কত্ৱা নিক্খন্তা কতকম্মা নামা’’তিআদি. অট্ঠমে নত্থি ৱত্তব্বং.

পঠমঅনাগতভযসুত্তাদিৱণ্ণনা নিট্ঠিতা.

৯. ততিযঅনাগতভযসুত্তৱণ্ণনা

৭৯. নৱমে পাড়িগম্ভীৰাতি (সং. নি. টী. ২.২.২২৯) পাড়িৱসেন গম্ভীৰা অগাধা দুক্খোগাহা সল্লসুত্তসদিসা. সল্লসুত্তঞ্হি (সু. নি. ৫৭৯) ‘‘অনিমিত্তমনঞ্ঞাত’’ন্তিআদিনা পাড়িৱসেন গম্ভীৰং, ন অত্থগম্ভীৰং. তথা হি তত্থ তা তা গাথা দুৱিঞ্ঞেয্যৰূপা তিট্ঠন্তি. দুৱিঞ্ঞেয্যঞ্হি ঞাণেন দুক্খোগাহন্তি কত্ৱা ‘‘গম্ভীৰ’’ন্তি ৱুচ্চতি. পুব্বাপৰংপেত্থ কাসঞ্চি গাথানং দুৱিঞ্ঞেয্যতায দুক্খোগাহমেৱ, তস্মা পাড়িৱসেন গম্ভীৰং. অত্থগম্ভীৰাতি অত্থৱসেন গম্ভীৰা মহাৱেদল্লসুত্তসদিসা, মহাৱেদল্লসুত্তস্স (ম. নি. ১.৪৪৯ আদযো) অত্থৱসেন গম্ভীৰতা পাকটাযেৱ. লোকং উত্তৰতীতি লোকুত্তৰো, সো অত্থভূতো এতেসং অত্থীতি লোকুত্তৰা. তেনাহ – ‘‘লোকুত্তৰধম্মদীপকা’’তি. সুঞ্ঞতাপটিসংযুত্তাতি সত্তসুঞ্ঞধম্মপ্পকাসকা. তেনাহ ‘‘খন্ধধাতুআযতনপচ্চযাকাৰপ্পটিসংযুত্তা’’তি. উগ্গহেতব্বং পৰিযাপুণিতব্বন্তি চ লিঙ্গৱচনৱিপল্লাসেন ৱুত্তন্তি আহ ‘‘উগ্গহেতব্বে চেৱ ৱড়ঞ্জেতব্বে চা’’তি. কৱিনো কম্মং কৱিতা. যস্স পন যং কম্মং, তং তেন কতন্তি ৱুচ্চতীতি আহ ‘‘কৱিতাতি কৱীহি কতা’’তি. কাৱেয্যন্তি কব্যং, কব্যন্তি চ কৱিনা ৱুত্তন্তি অত্থো. তেনাহ ‘‘তস্সেৱ ৱেৱচন’’ন্তি. চিত্তক্খৰাতি চিত্ৰাকাৰঅক্খৰা. ইতৰং তস্সেৱ ৱেৱচনং. সাসনতো বহিদ্ধা ঠিতাতি ন সাসনাৱচৰা. বাহিৰকসাৱকেহীতি ‘‘বুদ্ধা’’তি অপ্পঞ্ঞাতানং যেসং কেসঞ্চি সাৱকেহি. সুস্সূসিস্সন্তীতি অক্খৰচিত্ততায চেৱ সৰসম্পত্তিযা চ অত্তমনা হুত্ৱা সামণেৰদহৰভিক্খুমাতুগামমহাগহপতিকাদযো ‘‘এস ধম্মকথিকো’’তি সন্নিপতিত্ৱা সোতুকামা ভৱিস্সন্তি.

ততিযঅনাগতভযসুত্তৱণ্ণনা নিট্ঠিতা.

১০. চতুত্থঅনাগতভযসুত্তৱণ্ণনা

৮০. দসমে পঞ্চৱিধেন সংসগ্গেনাতি ‘‘সৱনসংসগ্গো, দস্সনসংসগ্গো, সমুল্লাপসংসগ্গো, সম্ভোগসংসগ্গো, কাযসংসগ্গো’’তি এৱং ৱুত্তেন পঞ্চৱিধেন সংসগ্গেন. সংসজ্জতি এতেনাতি সংসগ্গো, ৰাগো. সৱনহেতুকো, সৱনৱসেন ৱা পৱত্তো সংসগ্গো সৱনসংসগ্গো. এস নযো সেসেসুপি. কাযসংসগ্গো পন কাযপৰামাসো. তেসু পৰেহি ৱা কথিযমানং ৰূপাদিসম্পত্তিং অত্তনা ৱা সিতলপিতগীতসদ্দং সুণন্তস্স সোতৱিঞ্ঞাণৱীথিৱসেন উপ্পন্নো ৰাগো সৱনসংসগ্গো নাম. ৱিসভাগৰূপং ওলোকেন্তস্স পন চক্খুৱিঞ্ঞাণৱীথিৱসেন উপ্পন্নো ৰাগো দস্সনসংসগ্গো নাম. অঞ্ঞমঞ্ঞআলাপসল্লাপৱসেন উপ্পন্নৰাগো সমুল্লাপসংসগ্গো নাম. ভিক্খুনো ভিক্খুনিযা সন্তকং, ভিক্খুনিযা ভিক্খুস্স সন্তকং গহেত্ৱা পৰিভোগকৰণৱসেন উপ্পন্নৰাগো সম্ভোগসংসগ্গো নাম. হত্থগ্গাহাদিৱসেন উপ্পন্নো ৰাগো কাযসংসগ্গো নাম.

অনেকৱিহিতন্তি অন্নসন্নিধিপানসন্নিধিৱত্থসন্নিধিযানসন্নিধিসযনসন্নিধিগন্ধসন্নিধি- আমিসসন্নিধিৱসেন অনেকপ্পকাৰং. সন্নিধিকতস্সাতি এতেন ‘‘সন্নিধিকাৰপৰিভোগ’’ন্তি (ধ. স. তিকমাতিকা ১০) এত্থ কাৰ-সদ্দস্স কম্মত্থতং দস্সেতি. যথা ৱা ‘‘আচযং গামিনো’’তি ৱত্তব্বে অনুনাসিকলোপেন ‘‘আচযগামিনো’’তি নিদ্দেসো কতো, এৱং ‘‘সন্নিধিকাৰং পৰিভোগ’’ন্তি ৱত্তব্বে অনুনাসিকলোপেন ‘‘সন্নিধিকাৰপৰিভোগ’’ন্তি ৱুত্তং, সন্নিধিং কত্ৱা পৰিভোগন্তি অত্থো.

‘‘সন্নিধিকতস্স পৰিভোগ’’ন্তি এত্থ (দী. নি. অট্ঠ. ১.১২) পন দুৱিধা কথা ৱিনযৱসেন সল্লেখৱসেন চ. ৱিনযৱসেন তাৱ যং কিঞ্চি অন্নং অজ্জ পটিগ্গহিতং অপৰজ্জু সন্নিধিকাৰং হোতি, তস্স পৰিভোগে পাচিত্তিযং. অত্তনা লদ্ধং পন সামণেৰানং দত্ৱা তেহি লদ্ধং ৱা পাপেত্ৱা দুতিযদিৱসে ভুঞ্জিতুং ৱট্টতি, সল্লেখো পন ন হোতি. পানসন্নিধিম্হিপি এসেৱ নযো. ৱত্থসন্নিধিম্হি অনধিট্ঠিতাৱিকপ্পিতং সন্নিধি চ হোতি, সল্লেখঞ্চ কোপেতি. অযং নিপ্পৰিযাযকথা. পৰিযাযতো পন তিচীৱৰসন্তুট্ঠেন ভৱিতব্বং, চতুত্থং লভিত্ৱা অঞ্ঞস্স দাতব্বং. সচে যস্স কস্সচি দাতুং ন সক্কোতি, যস্স পন দাতুকামো হোতি, সো উদ্দেসত্থায ৱা পৰিপুচ্ছত্থায ৱা গতো, আগতমত্তে দাতব্বং, অদাতুং ন ৱট্টতি. চীৱৰে পন অপ্পহোন্তে, সতিযা ৱা পচ্চাসায অনুঞ্ঞাতকালং ঠপেতুং ৱট্টতি. সূচিসুত্তচীৱৰকাৰকানং অলাভে ততোপি ৱিনযকম্মং কত্ৱা ঠপেতুং ৱট্টতি ‘‘ইমস্মিং জিণ্ণে পুন ঈদিসং কুতো লভিস্সামী’’তি পন ঠপেতুং ন ৱট্টতি, সন্নিধি চ হোতি, সল্লেখঞ্চ কোপেতি.

যানসন্নিধিম্হি যানং নাম ৱয্হং ৰথো সকটং সন্দমানিকা পাটঙ্কীতি. ন পনেতং পব্বজিতস্স যানং, উপাহনং পন যানং. একভিক্খুস্স হি একো অৰঞ্ঞৱাসত্থায, একো ধোতপাদকত্থাযাতি উক্কংসতো দ্ৱে উপাহনসঙ্ঘাটকা ৱট্টন্তি, ততিযং লভিত্ৱা অঞ্ঞস্স দাতব্বো. ‘‘ইমস্মিং জিণ্ণে অঞ্ঞং কুতো লভিস্সামী’’তি ঠপেতুং ন ৱট্টতি, সন্নিধি চ হোতি, সল্লেখঞ্চ কোপেতি. সযনসন্নিধিম্হি সযনন্তি মঞ্চো. একস্স ভিক্খুনো একো সযনগব্ভে, একো দিৱাট্ঠানেতি উক্কংসতো দ্ৱে মঞ্চা ৱট্টন্তি. ততো উত্তৰিং লভিত্ৱা অঞ্ঞস্স ভিক্খুনো, গণস্স ৱা দাতব্বো, অদাতুং ন ৱট্টতি, সন্নিধি চেৱ হোতি, সল্লেখো চ কুপ্পতি. গন্ধসন্নিধিম্হি ভিক্খুনো কণ্ডুকচ্ছুছৱিদোসাদিআবাধে সতি গন্ধা ৱট্টন্তি. গন্ধত্থিকেন গন্ধঞ্চ আহৰাপেত্ৱা তস্মিং ৰোগে ৱূপসন্তে অঞ্ঞেসং ৱা আবাধিকানং দাতব্বং, দ্ৱাৰে পঞ্চঙ্গুলিঘৰধূপনাদীসু ৱা উপনেতব্বং. ‘‘পুন ৰোগে সতি ভৱিস্সতী’’তি ঠপেতুং ন ৱট্টতি, গন্ধসন্নিধি চ হোতি, সল্লেখঞ্চ কোপেতি.

আমিসন্তি ৱুত্তাৱসেসং দট্ঠব্বং. সেয্যথিদং – ইধেকচ্চো ভিক্খু ‘‘তথাৰূপে কালে উপকাৰায ভৱিস্সন্তী’’তি তিলতণ্ডুলমুগ্গমাসনাড়িকেৰলোণমচ্ছসপ্পিতেলকুলালভাজনাদীনি আহৰাপেত্ৱা ঠপেতি. সো ৱস্সকালে কালস্সেৱ সামণেৰেহি যাগুং পচাপেত্ৱা পৰিভুঞ্জিত্ৱা ‘‘সামণেৰ উদককদ্দমে দুক্খং গামং পৱিসিতুং, গচ্ছ অসুককুলং গন্ত্ৱা ময্হং ৱিহাৰে নিসিন্নভাৱং আৰোচেহি, অসুককুলতো দধিআদীনি আহৰা’’তি পেসেতি. ভিক্খূহি ‘‘কিং, ভন্তে, গামং পৱিসিস্সামা’’তি ৱুত্তেপি ‘‘দুপ্পৱেসো, আৱুসো, ইদানি গামো’’তি ৱদতি. তে ‘‘হোতু, ভন্তে, অচ্ছথ তুম্হে, মযং ভিক্খং পৰিযেসিত্ৱা আহৰিস্সামা’’তি গচ্ছন্তি. অথ সামণেৰো দধিআদীনি আহৰিত্ৱা ভত্তঞ্চ ব্যঞ্জনঞ্চ সম্পাদেত্ৱা উপনেতি, তং ভুঞ্জন্তস্সেৱ উপট্ঠাকা ভত্তং পহিণন্তি, ততোপি মনাপমনাপং ভুঞ্জতি. অথ ভিক্খূ পিণ্ডপাতং গহেত্ৱা আগচ্ছন্তি, ততোপি মনাপমনাপং ভুঞ্জতিযেৱ. এৱং চতুমাসম্পি ৱীতিনামেতি. অযং ৱুচ্চতি ভিক্খু মুণ্ডকুটুম্বিকজীৱিকং জীৱতি, ন সমণজীৱিকন্তি. এৱৰূপো আমিসসন্নিধি নাম হোতি. ভিক্খুনো পন ৱসনট্ঠানে একা তণ্ডুলনাড়ি একো গুড়পিণ্ডো কুডুৱমত্তং সপ্পীতি এত্তকং নিধেতুং ৱট্টতি অকালে সম্পত্তচোৰানং অত্থায. তে হি এত্তকং আমিসপটিসন্থাৰং অলভন্তা জীৱিতা ৱোৰোপেয্যুং, তস্মা সচে হি এত্তকং নত্থি, আহৰাপেত্ৱাপি ঠপেতুং ৱট্টতি. অফাসুককালে চ যদেত্থ কপ্পিযং, তং অত্তনাপি পৰিভুঞ্জিতুং ৱট্টতি. কপ্পিযকুটিযং পন বহুং ঠপেন্তস্সপি সন্নিধি নাম নত্থি.

চতুত্থঅনাগতভযসুত্তৱণ্ণনা নিট্ঠিতা.

যোধাজীৱৱগ্গৱণ্ণনা নিট্ঠিতা.