(২২) ২. অক্কোসকৱগ্গো

১-২. অক্কোসকসুত্তাদিৱণ্ণনা

২১১-২. দুতিযস্স পঠমে দসহি অক্কোসৱত্থূহি অক্কোসকোতি ‘‘বালোসি, মূড়্হোসি, ওট্ঠোসি, গোণোসি, গদ্ৰভোসী’’তিআদিনা দসহি অক্কোসৱত্থূহি অক্কোসকো. ‘‘হোতু, মুণ্ডকসমণ, অদণ্ডো অহন্তি কৰোসি, ইদানি তে ৰাজকুলং গন্ত্ৱা দণ্ডং আৰোপেস্সামী’’তিআদীনি ৱদন্তো পৰিভাসকো নামাতি আহ ‘‘ভযদস্সনেন পৰিভাসকো’’তি. লোকুত্তৰধম্মা অপাযমগ্গস্স পৰিপন্থভাৱতো পৰিপন্থো নামাতি আহ ‘‘লোকুত্তৰপৰিপন্থস্স ছিন্নত্তা’’তি, লোকুত্তৰসঙ্খাতস্স অপাযমগ্গপৰিপন্থস্স ছিন্নত্তাতি অত্থো. দুতিযে নত্থি ৱত্তব্বং.

অক্কোসকসুত্তাদিৱণ্ণনা নিট্ঠিতা.

৩-১০. সীলসুত্তাদিৱণ্ণনা

২১৩-২২০. ততিযে (দী. নি. টী. ২.১৪৯) দুস্সীলোতি এত্থ দু-সদ্দো অভাৱত্থো ‘‘দুপ্পঞ্ঞো’’তিআদীসু (ম. নি. ১.৪৪৯) ৱিয, ন গৰহণত্থোতি আহ ‘‘অসীলো নিস্সীলো’’তি. ভিন্নসংৱৰোতি এত্থ সমাদিন্নসীলো কেনচি কাৰণেন সীলভেদং পত্তো, সো তাৱ ভিন্নসংৱৰো হোতু. যো পন সব্বেন সব্বং অসমাদিন্নসীলো আচাৰহীনো, সো কথং ভিন্নসংৱৰো নাম হোতীতি? সোপি সাধুসমাচাৰস্স পৰিহৰণীযস্স ভেদিতত্তা ভিন্নসংৱৰো এৱ নাম. ৱিনট্ঠসংৱৰো সংৱৰৰহিতোতি হি ৱুত্তং হোতি. তং তং সিপ্পট্ঠানং. মাঘাতকালেতি ‘‘মা ঘাতেথ পাণীন’’ন্তি এৱং মাঘাতঘোসনং ঘোসিতদিৱসে. অব্ভুগ্গচ্ছতি পাপকো কিত্তিসদ্দো. অজ্ঝাসযেন মঙ্কু হোতিযেৱ ৱিপ্পটিসাৰিভাৱতো.

তস্সাতি দুস্সীলস্স. সমাদায ৱত্তিতট্ঠানন্তি উট্ঠায সমুট্ঠায কতকাৰণং. আপাথং আগচ্ছতীতি তং মনসো উপট্ঠাতি. উম্মীলেত্ৱা ইধলোকন্তি উম্মীলনকালে অত্তনো পুত্তদাৰাদিৱসেন ইধলোকং পস্সতি. নিমীলেত্ৱা পৰলোকন্তি নিমীলনকালে গতিনিমিত্তুপট্ঠানৱসেন পৰলোকং পস্সতি. তেনাহ ‘‘চত্তাৰো অপাযা’’তিআদি. পঞ্চমপদন্তি ‘‘কাযস্স ভেদা’’তিআদিনা ৱুত্তো পঞ্চমো আদীনৱকোট্ঠাসো. ৱুত্তৱিপৰিযাযেনাতি ৱুত্তত্থায আদীনৱকথায ৱিপৰিযাযেন ‘‘অপ্পমত্তো তং তং কসিৱণিজ্জাদিং যথাকালং সম্পাদেতুং সক্কোতী’’তিআদিনা. পাসংসং সীলমস্স অত্থীতি সীলৱা. সীলসম্পন্নোতি সীলেন সমন্নাগতো সম্পন্নসীলোতি এৱমাদিকং পন অত্থৱচনং সুকৰন্তি অনামট্ঠং. চতুত্থাদীনি উত্তানত্থানেৱ.

সীলসুত্তাদিৱণ্ণনা নিট্ঠিতা.

অক্কোসকৱগ্গৱণ্ণনা নিট্ঠিতা.