৬-৮. ৱিনিবন্ধসুত্তাদিৱণ্ণনা

২০৬-৮. ছট্ঠে পৱত্তিতুং অপ্পদানৱসেন কুসলচিত্তং ৱিনিবন্ধন্তীতি চেতসোৱিনিবন্ধা. তং পন ৱিনিবন্ধন্তা মুট্ঠিগ্গাহং গণ্হন্তা ৱিয হোন্তীতি আহ ‘‘চিত্তং ৱিনিবন্ধিত্ৱা’’তিআদি. কামগিদ্ধো পুগ্গলো ৱত্থুকামেপি কিলেসকামেপি অস্সাদেতি অভিনন্দতীতি ৱুত্তং ‘‘ৱত্থুকামেপি কিলেসকামেপী’’তি. অত্তনো কাযেতি অত্তনো নামকাযে, অত্তভাৱে ৱা. বহিদ্ধাৰূপেতি পৰেসং কাযে অনিন্দ্ৰিযবদ্ধৰূপে চ. উদৰং অৱদিহতি উপচিনোতি পূৰেতীতি উদৰাৱদেহকং. সেয্যসুখন্তি সেয্যায সযনৱসেন উপ্পজ্জনকসুখং. সম্পৰিৱত্তকন্তি সম্পৰিৱত্তিত্ৱা. পণিধাযাতি তণ্হাৱসেনেৱ পণিদহিত্ৱা. ইতি পঞ্চৱিধোপি লোভৱিসেসো এৱ ‘‘চেতোৱিনিবন্ধো’’তি ৱুত্তোতি ৱেদিতব্বো. সত্তমট্ঠমেসু নত্থি ৱত্তব্বং.

ৱিনিবন্ধসুত্তাদিৱণ্ণনা নিট্ঠিতা.